Antolamendua

Patxi Arregui (Iruñea, Nafarroa, 1969) industria ingeniaria da Donostiako Goi Ingeniaritza Eskolan, Tecnun izenekoan (1994), eta, 1995ean Nafarroako Unibertsitate Publikoan sartu ondoren, Telekomunikazio Ingeniaritzako doktore titulua lortu zuen (2000). NUPen irakasle eta ikertzaile gisako zenbait kargu izan eta gero, Teknologia Elektronikoaren Arloko katedra eskuratu zuen 2010. urtean, eta, geroztik, arlo horretako 10 doktoretza-tesiren zuzendarikide izan da. Errektoreorde izendatu zutenean, Ingeniaritza Elektriko eta Elektronikoaren eta Komunikazio Ingeniaritzaren Saileko zuzendaria zen, baita sailetako zuzendarien ordezkaria ere NUPeko Gobernu Kontseiluan, eta organo horretako Batzorde Iraunkorreko kide. Halaber, saileko idazkaria eta zuzendariordea ere izan da, eta NUPeko Ikerketa Batzordeko kide 2012az geroztik, baita Batzorde Iraunkorreko, Patenteen Batzordeko eta Ekitaldien Batzordeko kide ere.

Bere aztergai nagusiak zuntz optikoko sentsoreekin eta estaldura nanoegituratuekin daude lotuak. AEBko Virginia Tech Unibertsitatean ikerketarako hiru egonaldi egin zituen 1998an, 2000n eta 2004an, eta, hango talde batean, "Layer-by-Layer nano-assembly" teknikan oinarritutako zuntz optikoko lehenbiziko sentsorea fabrikatu zuen (1998).

NUPeko beste ikertzaile batzuekin lankidetzan, 400 argitalpen zientifiko baino gehiago egin ditu; horien artean, 170etik gora artikulu argitaratu ditu eragin-adierazlea duten hainbat aldizkaritan. Lan horiek 6.000 alditan baino gehiagotan aipatu dira Scopus-en h=42 parametroarekin (8.000 erreferentzia inguru Google Scholar-en h=48 parametroarekin).

Modu aktiboan hartzen du parte nazioarteko zenbait aldizkariren argitalpen kontseiluan, eta horietako baten fundatzailea eta argitaratzaileen burua izan da, Journal of Sensors aldizkarian hain zuzen, zeinaren kolaboratzaile izan baitzen 2007 eta 2011 bitartean. Gainera, argitaratzaile elkartu edo gonbidatu izan da zenbait aldizkaritan, hala nola IEEE Journal of Selected Topics in Quantum Electronics, IEEE Sensors Journal, aipatutako Journal of Sensors eta Sensors (MDPI) izenekoetan (JCR indizedunak guztiak). Halaber, Espainiako eta nazioarteko zenbait biltzarretako batzorde zientifikoan hartu du parte, honako hauetan esaterako: “IEEE Sensors Conference”, “Eurosensors”, “CLEO Europe”, “SPIE Microtechnologies”, “ICST International Conference on Sensing Technology” eta “Single-Molecule Sensors and NanoSystems International Conference”.

Sensors based on nanostructured materials liburuaren argitaratzailea da, baita, beste batzuekin batera, Optochemical nanosensors liburuarena ere, eta elektronika digitalari buruzko irakaskuntzako bi liburu egin ditu lankidetzan: Solved problems in digital electronics eta Problemas resueltos de electrónica digital. Bestalde, nazioarteko liburuetarako 20 kapitulu baino gehiago egin ditu, bakarrik nahiz lankidetzan, baita nazioarteko kongresuetarako 170etik gora ekarpen ere (horietako bost, sarituak), zeinetatik 17 gonbidatu gisa emandako hitzaldiak izan baitira, esaterako Eurosensors kongresuari hasiera emateko osoko hitzaldia.

Lehiaketarako deialdi publikoetako 31 ikerketa-proiektutan hartu du parte (horietako 9tan ikertzaile nagusi gisa), eta proiektuen eta ikerketako jardueren ebaluatzaile lanak ere egin ditu hainbat ebaluazio agentziarentzat: Europako Ikerketa Kontseilua (ERC), Ingeniaritzako eta Zientzia Fisikoetako Ikerketarako Kontseilua (EPSRC, Erresuma Batua), Zientziaren Txekiar Fundazioa, Ikerketa Sustatzeko Austriar Agentzia (FFG), Ebaluaziorako eta Prospektibarako Agentzia Nazionala (ANEP, Espainia), Zientziaren Austriar Funtsa (FWF), Zientziarako eta Teknologiarako Fundazioa (FCT, Portugal), Kolonbiako Unibertsitate Nazionala eta Zientzia eta Teknologia Sustatzeko Agentzia Nazionala (ANPCyT, Argentina).

Ekoizpen sektorerako ezagutzaren transferentziari dagokionez, 25 OTRI kontratutan hartu du parte entitate pribatuekin (horietako 11tan ikertzaile nagusi gisa), eta, beste lankide batzuekin batera, 17 patente edo baliagarritasun modelo asmatu ditu. Era berean, oinarri teknologikoko bost enpresaren bazkide sustatzaile izan da, eta horien artean nabarmentzekoak dira NADETECH INNOVATIONS SL (2009ko Nafarroako EIBT sarearen saria, 2011ko Ideactiva saria, Campus Iberusen 2014ko enpresa-proiektu onenaren saria); EVERSENS SL (2015eko Impulso Emprendedor saria, Campus Iberusen 2015eko Emprende saria, H2020 - SME Instrument Phase I) eta PYROISTECH SL (accesita 2019ko Iníciate sarietan). Horiek guztiak NUPeko spin-off enpresa gisa aitortu dituzte.

Antonio Jesús López Martín
Tfno: 948 16 9311
Correo electrónico: area.investigacion@unavarra.es

Antonio López Martín (Iruñea, 1972) Telekomunikazio ingeniaria da (1995). Doktoretza NUPen egin zuen (1999), eta Doktoretzako Aparteko Saria ere eman zioten. Seinalearen Teorian eta Komunikazioetan katedraduna da 2011tik.

Antonio López Martínen ikergai nagusia kontsumo ultra txikiko zirkuitu integratuen diseinua eta haririk gabeko komunikazioak dira. Ikertzaile aritu da Espainiako Astronomia Zentroan (1995), Zuricheko ETH unibertsitateko Institute for Signal and Information Processing institutuan (1997) eta New Mexico State Universityko VLSI Lab and NASA Center for Autonomous Control Engineering zentroan (hamar egonaldi 1996tik 2012ra). Gainera, hainbat sari irabazi ditu, hauek besteak beste: Berrikuntza Teknologikoaren Talgo Saria (2012), Urteko Ingeniari Nafar Onenaren Saria (2008), Nafarroako Kutxaren Ikerketa Saria (2007) eta Madrilgo Unibertsitate Konplutentseko Zientzia eta Teknologiaren arloko Gaztearen Saria (2007). Editore laguntzailea da edo izan da nazioarteko 10 aldizkaritan eta batzorde teknikoko kide nazioarteko 47 biltzarretan. Era berean, 425 bat artikulu idatzi ditu talde-lanean zenbait liburutan, aldizkaritan eta nazioarteko biltzarretan, eta nazioarteko 6 patenteren egileetako bat da. Erakunde publikoetarako eta enpresetarako 65 ikerketa-proiektutan hartu du parte, eta liderra izan da 22 proiektutan eta 8 doktoretza-tesiren zuzendaria izan da. Proiektuen ebaluatzaile aritzen da autonomia erkidegoetako, nazioko eta nazioarteko zenbait agentziarentzat.

Bere kudeaketa lanari dagokionez, Telekomunikazio eta Industria Ingeniarien GMETeko zuzendariordea izan da (2008-2014) eta NUPeko Smart Cities Institutukoa (2015-2017), bai eta 6 titulazioren koordinatzailea, TIIGMETeko Eskola Batzordeko kidea eta 5 titulaziotako ikasketa planak egiteko lantaldeetako kidea ere. Komunikazioa, Seinaleak eta Mikrouhinak ikerketa taldearen arduraduna da (ANEPek nazioarteko bikaintasun kalifikazioa eman dio), bai eta Argitalpen Kontseiluko kidea, Ikerketa Batzordekoa, Klaustrokoa eta Unibertsitate - Gizarte Fundazioko patronoa ere.