Antolamendua

Roldán Jimeno Arangurenek Zuzenbideko lizentziatura egin zuen UHUNen, Historiakoa Nafarroako Unibertsitatean (aparteko saria eta karrera amaierako hirugarren sari nazionala irabazi zituen), Historiako doktoretza Nafarroako Unibertsitatean, Filosofiako eta Hezkuntza Zientzietako doktoretza EHUn eta Zuzenbideko doktoretza Deustuko Unibertsitatean. Gaur egun, Zuzenbidearen Historiako irakasle titularra da Nafarroako Unibertsitate Publikoan.

NUPen, zuzendari izan da Ikasleen gaietarako, Enplegurako eta Ekintzailetzarako Errektoreordetzan, eta idazkaria I-Communitas-Institute for Advanced Social Research institutuan eta Zuzenbide Publikoko Sailean.

Halaber, NUPen lan egin aurretik, irakasle aritu da Nafarroako Unibertsitatean (1996-2001) eta Paueko eta Aturrialdeko Unibertsitatean (2001-2003). Ikerketako zenbait egonaldi egin ditu Estatu Batuetako, Italiako, Frantziako eta Irlandako zentro akademiko batzuetan.

Hogeiren bat libururen egilea da, ehun artikulutik gora argitaratu ditu aldizkari espezializatuetan eta hainbat elkarlan egin ditu. Bere azken argitalpenen artetik, hauek dira nabarmentzekoak: "Matrimonio y otras uniones afines en el Derecho histórico navarro (siglos VIII-XVIII)" (Dykinson, 2015), "El régimen económico matrimonial en el Derecho navarro (1839-2015)" (Aranzadi, 2015), "Miguel Javier Urmeneta (1915-1988). Segunda República, Franquismo y Transición" (Pamiela, 2015), "Los Fueros de Navarra" (Agencia Estatal Boletín Oficial del Estado, 2016) eta "Amnesties, pardons and transitional justice: Spain’s Pact of Forgetting" (Routledge, 2018).

Gainera, José María Jimeno Juríoren 50 liburuki baino gehiago argitaratuak dituen Obras completas bildumaren zuzendaria da.

Horrez gain, Nafarroako Gobernuak argitaratzen duen "Príncipe de Viana" aldizkariaren zuzendaria da, eta "Iura Vasconiae. Revista de Derecho histórico y Autonómico de Vasconia" izenekoaren idazkaria. Nafarroako Foru Zuzenbide Zibilaren Aholkularitza Batzordeko kidea da, baita Nafarroako Kultura Kontseilukoa ere.