Antolamendua

2019az geroztik Nafarroako Unibertsitate Publikoan Enpresen Antolaketako katedradun izateaz gain, Martin Larraza Kintana (Arbizu, Nafarroa, 1970) diplomaduna da Enpresa Zientzietan (1992) eta lizentziaduna Enpresen Administrazioan eta Zuzendaritzan (1994), biak ere Nafarroako Unibertsitate Publikoan lortuak. Ekonomiako doktoretza eskuratu zuen Madrilgo Karlos III.a Unibertsitatean (2000), nota gorenarekin. Doktoretza egin bitartean, bekaduna izan zen Hezkuntza eta Zientzia Ministerioaren programa sektorial batean, unibertsitateko irakasleei eta ikertzaileei prestakuntza ematekoan hain zuzen. Denbora tarte laburrean Madrilgo Karlos III.a Unibertsitatean fakultateko irakasle laguntzaile aritu eta gero, eginkizun berean hasi zen Nafarroako Unibertsitate Publikoan 1999an. NUPen irakasle eta ikertzaile postu desberdinetatik pasatu ondoren, 2019an lortu zuen katedra.  Egonaldiak eginak ditu Essexeko, Arizonako Estatuko eta Cranfieldeko unibertsitateetan.

Bere ibilbide akademiko zabalean, Enpresen Antolaketaren arloko irakasle ibili da beti, eta zenbait irakasgai eman ditu graduetan eta graduondoetan (masterrak eta doktoretzak).

Garatu duen ikerketak argi uzten du nolako interesa duen pertsonek erabakiak hartzerakoan duten jokabideaz eta, batik bat, enpresen barrenean jarduera profesionala duten pertsonenaz.  Oinarri hori abiapuntu duela, 20 urtetik gorako ikerlanari esker, ekarpenak egin ahal izan dizkio arlo hauetako nazioarteko eztabaida zientifikoari, hau da, Giza Baliabideen Kudeaketaren, Zuzendaritza Estrategikoaren, Familia-enpresaren eta Ekintzailetzaren gaineko eztabaidari. Egindako lanak 48 artikulu akademiko ditu fruitu; haietako batzuk Enpresen Antolaketaren arloko aldizkari akademiko ospetsuenetan argitaratuak dira, esateko baterako "Academy of Management Journal", "Administrative Science Quarterly", "Strategic Management Journal", "Journal of Management", "Entrepreneurship Theory and Practice", "Journal of International Business Studies", "Small Business Economics" eta "Human Resource Management" izenekoetan. Gainera, liburuko 4 kapitulu argitaratu ditu, 4 doktoretza-tesitan parte hartu, eta mintegiak egin ditu Espainiako eta atzerriko zenbait unibertsitatetan. Bestalde, 80 ekarpenetik gora eginak ditu Espainiako eta nazioarteko biltzarretan. Bere irakasle-lanak hainbat sariren bidezko aintzatespena jaso du; haien artean, hauek nabarmenenak: 2009-2010 aldiko Gizarte Zientzietako Ekarpen Zientifiko Hoberenaren saria, eta Giza eta Gizarte Zientzien eta Zientzia Juridiko eta Ekonomikoen arloetako ikertzaile-ibilbidearen saria, biak ere Nafarroako Unibertsitate Publikoak emanak.

Deialdi publikoen bidez finantzatutako zenbait ikerketa-proiektutan hartu du parte. Nabarmentzekoa da ikertzaile nagusia izan dela I+G-rako Plan Nazionalaren hiru proiektutan. Bestalde, enpresentzako transferentzia proiektu batzuetan esku hartu du, eta, gaur den egunean, Enpresen Antolaketako ikerketa-taldearen arduraduna da. Esparru honetan, azpimarratzekoa da Hezkuntza eta Zientzia Ministerioarentzako aditu-lanean ari dela Plan Nazionalaren ikerketa-proiektuak ebaluatzeko.

Kudeaketaren arloan, idazkaria izan da Ekonomia eta Enpresa Zientzien Fakultatean, baita Nafarroako Unibertsitate Publikoaren Sarbideko koordinatzaile nagusia ere. Ekonomiako Gradua Europako Unibertsitate Eremura egokitzeko ikasketa-plana egin zuen lantaldeko kidea izan zen, eta jakintza-arloko koordinatzailea Enpresen Administrazioko eta Zuzendaritzako Graduan. Gaur egun, Ekonomia eta Enpresa Zientzien Fakultatearen Kalitatearen Berme Batzordeko kidea da, baita Nafarroako Unibertsitate Publikoko Familia-enpresen Katedraren Jarraipen Batzorde Mistokoa ere. 1998az geroztik, Iberoamerican Academy of Management-eko Board-eko kidea da, eta, bertan, idazkari, diruzain eta lehendakariorde aritu da. Gaur egun, nazioarteko "Management Research" aldizkari akademikoaren argitaratzaile arduraduna da.

Santiago Sánchez Alegría
Tel: 948 41 7846/948 41 7802
Helbide elektronikoa: direccion.areacampustudela@unavarra.es

Santiago Sánchez Alegría, Nafarroako Unibertsitate Publikoko (NUP) Enpresen Kudeaketa Saileko zuzendaria, kontabilitatean doktorea da Nafarroako Unibertsitate Publikoan, aho batez bikain “cum laude” kalifikazioa jaso zuen tesiarekin.

NUPeko Ekonomia eta Enpresa Zientzien Fakultateko gradu eta masterretan kanpoko eta barneko kontabilitatea irakasteaz gain, Informazio Sistema Integratuen bidezko Prozesuen Kudeaketako Unibertsitate Masterreko (ERP) eta Enpresen Zuzendaritzako Unibertsitate Masterreko zuzendari akademikoa izan da Santiago Sánchez Alegría. Irakaskuntza berrikuntzako zenbait proiektutan ere parte hartu du, eta Estados contables: elaboración, análisis e interpretación (ediciones Pirámide) eskuliburuaren edizioan lagundu du. Eskuliburuaren zazpigarren argitaraldia egin da. 

Kudeaketa-lanei dagokienez, Tuterako Campuseko Arloko zuzendari berria zortzi urte baino gehiago aritu da Enpresen Kudeaketako Saileko idazkari-lanetan eta kontabilitate arloko koordinatzaile-lanetan. 

Orobat Santiago Sánchez Alegría NUPeko INARBE Institutuko (Institute for Advanced Research in Business and Economics) ikertzailea da, eta kontabilitateko informazioaren eta auditoretza-txostenaren kalitatea eta horrek erabakiak hartzeko duen erabilgarritasuna ikertzen dihardu. Berriki, bere ikerketa-lerroak zabaldu ditu arrisku-kapitaleko enpresek egindako eragiketak ikertzeko, bereziki "Leverage buyout (LBO)" izenekoak, eta enpresa-porrota aurreikusteko ereduak aztertzeko.

2010ean, komunikazio hoberenen ASEPUC aipamena eman zioten (Kontabilitateko Unibertsitate Irakasleen Espainiako Elkartea), eta, urtebete lehenago, Kontabilitateko eta Kontu Auditoretzako Institutuaren (ICAC) kontabilitateko eta auditoretzako ikerketa-lan laburren Carlos Cubillo saria. 

Bere lan zientifikoa dela eta, nazio mailako hainbat ikerketa-proiektutan eta nazioko eta nazioarteko 25 biltzar baino gehiagotan parte hartu du, eta ikertzaile nagusiaren lanetan aritu da zenbait ikerketa-kontratutan. Hamalau artikulu argitaratu ditu aldizkari zientifikoetan parekoen ebaluazioarekin; guztiak JCRn indexatuta. Zenbait ikerketa-egonaldi ere egin ditu unibertsitate batzuetan, hala nola Copenhagen Business School (Danimarka) eta Norwegian School of Economics (Norvegia). 

Azkenik, bere ikerketa-lanaren emaitzak zabaldu ditu argitalpen profesionaletan, hala nola UCEIF Fundazioaren (Kantabriako Unibertsitatearen Fundazioa Finantza Sektorea Aztertzeko eta Ikertzeko)  Cuadernos de Investigación eta Kontabilitateko eta Kontu Auditoretzako Institutuaren (ICAC) aldizkaria.
 

Mónica Cortiñas Ugalde
Tel: 948 16 9895
Helbide elektroikoa: direccion.areaplanificacion@unavarra.es

Mónica Cortiñas Enpresen Administrazioko eta Zuzendaritzako lizentziaduna eta doktorea da NUPen eta ikerketa egonaldiak egin ditu Rotterdameko Erasmus Universiteit-en (Herbehereak) eta egonaldi laburrak Essexeko Unibertsitatean (Erresuma Batua) eta Maastrichteko Unibertsitatean (Herbehereak).

Marketinaren ikerketa da bere ikerketa-ildo nagusia eta, batez ere, eta horren barruan, online kontsumitzailearen jokabidea, ekonomia digitala, merkataritza elektronikoa, marketin interaktiboa eta zabalkunde kanalen kudeaketa. Hogeitik gora lan argitaratu ditu indexatutako nazioarteko aldizkarietan. Halaber, ikerketa proiektu askotan parte hartu izan du, ikuskatzaile lanetan aritzen da entzute handiko nazioarteko zenbait aldizkaritan eta doktoretza-tesi baten zuzendarikidea izan da. Espainiako Marketin Akademikoko eta Profesionaleko Elkartearen Zuzendaritza Batzordeko kidea da.

Enpresen Zuzendaritzako Masterreko Kalitatearen arduraduna eta masterreko batzorde akademikoko kidea izan da eta egun titulu bereki honetako zuzendari akademikoa da: Marketina Industriaren Ikuspegitik. Eskolak ematen ditu Ekonomia eta Enpresa Zientzien Fakultatean eta Telekomunikazio eta Industria Ingeniarien Goi Mailako Eskola Teknikoan.

Bere kudeaketa jarduerari dagokionez, Enpresen Kudeaketako Saileko Batzorde Iraunkorreko kidea izan da, Merkaturatzea eta Merkatuen Ikerketa arloko arduraduna, Ekonomia eta Enpresa Zientzien Fakultateko Batzordeko kidea eta Unibertsitateko Klaustroko kidea.