Lan-esperientzia duten 40 urtetik gorakoentzako sarbidea

40 urtetik gorakoek graduko ikasketa ofizialak egin ditzakete, curriculumaren balorazioa eta elkarrizketa pertsonal bat eginez. Prozedura horren bidez sartu ahal izateko, baldintza hauek bete behar dituzte:

• Probak egiten diren urtean 40 urte izatea edo betetzea.
• Onarpena eskatzen den graduko unibertsitate-titulu ofizialari lotutako lan-esperientzia eta esperientzia profesionala egiaztatzea.
• 25 urtetik gorakoen proba 2005. urtea baino lehen gaindituta dutenak BAI aurkeztu ahal izango dute.
  25 urtetik gorakoen proba 2005 urtetik aurrera gaindituta dutenak EZIN izango dira aurkeztu, eta 25 urtetik gorakoen proba errepikatu ahal izango dute.
• Espainian unibertsitateko ikasketak egiteko aukera ematen duen titulurik ez izatea.
  Espainiako hezkuntza-sistemako Batxilergoa amaitu dutenek aukera dute, baita ere, USPa gainditzeko, 25 urtetik gorakoentzako proba gainditzeko edo 45 urtetik gorakoentzako proba gainditzeko.

Graduko titulazio bakar batean onar dezaten eskatzeko baino ezin da erabili prozedura hori.

Baldintzak betetzen dituzten ikasleek zilegi izanen dute NUPek 40 urtetik gorakoak Unibertsitatean sartzeko urtero antolatzen duen prozedurara aurkeztea.

Sartzeko prozedura Unibertsitatean bertan gainditu dutenek bakarrik eskatzen ahalko dute ikaspostua. Ikaspostuen % 3ko erreserba-kupoa dute.

Probaren kalifikazioa

Sartzeko probaren azken kalifikazioa curriculumaren balorazioan* eta banakako elkarrizketan lortutako kalifikazioen batezbesteko aritmetikoa izanen da, hurbilen dagoen milarenera biribilduta eta, distantzia bera egonez gero, goikora biribilduta, betiere izangaiak bi fase horietan gutxienez 4ko nota lortu badu.

Unibertsitatean sartzeko prozedura hori gainditutzat jotzeko, gutxienez 5 puntu lortu beharko dira azken kalifikazioan.

Hautagaiek zilegi izanen dute ebaluazio-batzordearen ebazpenari buruzko erreklamazioa aurkeztea errektoreari, hamar egun balioduneko epean, kalifikazioak argitaratu eta hurrengo egunetik kontatzen hasita.

* Erizaintzako Gradurako curriculuma baloratzeko irizpideak
* Fisioterapiako Gradurako curriculuma baloratzeko irizpideak
* Jarduera Fisikoaren eta Kirolaren Zientzietarako Gradurako curriculuma baloratzeko irizpideak

Ikasketetan onartua izateko nota

Ikasketetan onartua izateko nota 40 urtetik gorakoentzako proban lortutako azken kalifikazioa izanen da (10 puntu gehienez).

Eskatutako ikasketekin lotutako eremu eta jardueretan interesdunak zer-nolako lan-esperientzia eta esperientzia profesionala duen, zenbat denbora aritu den eta gaitasunei dagokienez zer maila lortu duen ebaluatzen da fase horretan. Alderdi horiek egiaztatzeko, kasuan kasuko enpresen edo erakundeen ziurtagiriak, lan-kontratuak eta lan-bizitzari buruzko txostenak aurkeztu beharko dira, lanbide-kategoria eta egindako jardueren xehetasunak adierazten dituztenak.

Ez da baloratuko curriculumean behar bezala egiaztatuta ez dagoen alderdirik.

Fase honetan 10etik gutxienez 4 puntu lortzen dituztenak banakako elkarrizketa batera deituko dituzte.

Elkarrizketak 20 minutu iraunen du gehienez, eta hautagaiaren ezagutzak eta gaitasunak tituluaren gaitasunetara egokitzen diren baloratuko da.

Hautagaiek 10etik 4 puntu lortu behar dituzte gutxienez aurreko faseko puntuazioarekin batezbestekoa egin ahal izateko.