NADOE - Nafarroako Doktoretza Eskola

IBERUS NAZIOARTEKO BIKAINTASUNEKO CAMPUSAREN X. DOKTORETZA JARDUNALDIAK (JAKA, 2024ko irailaren 30etik urriaren 2ra)  

Ezagutu nahi al dituzu beste unibertsitate batzuetako doktoregaiak, diziplina guztietakoak?
Gai al zara transmititzeko zeinen liluragarria den zure tesi lana?
Probatu nahi duzu nolako trebetasunak dituzun zure ikerketaren komunikatzaile gisa?
 

BAI erantzun baduzu, Campus Iberusen Doktoretza Jardunaldien hamargarren edizioan parte hartzera animatzen zaitugu. 2024ko irailaren 30etik urriaren 2ra arte eginen dira, Jakako egoitza unibertsitarioan.

Jardunaldi hauen helburua Campus Iberuseko doktoregaien arteko erlazioak eta komunikazioa indartzea da, kontuan hartu gabe zein den bakoitzaren ikerketa-arloa. Zenbait jarduera eskaintzen dira horretarako, prestakuntzan dauden ikertzaileen zeharkako gaitasunak hobetzeko bereziki.

Jardueren programan tailerrak, hitzaldiak eta parte hartzeko zenbait saio daude. Halaber, doktoregaiek beren tesi lanen azalpenak egiteko eta besteekin eztabaidatzeko saioak egonen dira. Antolatzaileek azpimarratu dute oso garrantzitsua dela aurkezpenei ikuspuntu ulergarria ematea beste diziplinetako ikertzaileentzat. 

Nahitaezkoa ez bada ere, lanak ingelesez aurkeztera animatzen ditugu parte hartzaileak. Ahozko azalpena gaztelaniaz eginen bada ere, posterrak ingelesez prestatu behar dira.

Norentzat dira jardunaldi hauek?

Campus Iberus osatzen duten lau unibertsitateetako edozein doktoretza-programatan matrikula egin duten doktoregaiak daude parte hartzera gonbidatuak.

INSKRIPZIOA

Jardunaldietarako inskripzioa doakoa da, eta, harekin, parte-hartzaileek ostatua eta gosariak doan izanen dituzte Jakako egoitza unibertsitarioan, eta bazkaria ere emanen zaie.  Informazio gehiago nahi izanez gero, kontsultatu X. Doktoretza Jardunaldien webgunea.

Aurreinskripziorako eskaerak online egin behar dira, webgunearen estekaren bidez, eta eskatutako agiriak aurkeztu behar dira.  Inskripzioa egiteko unean, ekarpenaren laburpena (doktoretzako ikerketari buruzkoa) eta motibazio-gutun labur bat erantsi beharko dira, zeinek tesiaren zuzendariaren oniritzia izan behar baitute.

Aurreinskripzioa egiteko epea zabalik egonen da 2024ko irailaren 10eko 14:00ak arte.

Webgune honen bidez daude ikusgai izena emateko prozedurari buruzko xehetasunak eta jardunaldiei buruzko gainerako informazio garrantzitsua.  Behin-behineko programa ere bertan dago kontsultatzeko, eta eguneratzen joango gara.

Zalantzarik izanez gero, idatzi antolatzaileei webgunearen hasierako orrialdean HARREMANETARAKO botoian klik eginez. 

ANIMA ZAITEZTE ETA PARTE HARTU!

***********************