Ikasle batzuk NUPen.

Gainera, ikasturte honetan, Nekazaritza Jasangarrirako Abangoardiako Teknologietako Erasmus Mundus Masterra hasiko da. Azaroan ireki zen masterreko aukeraketa prozesua. “Nazioarteko master oso berritzailea da, NUPen abian jartzen den Erasmus Mundus deialdi ospetsuko lehena”, adierazi du Irakaskuntzako Errektoreordetzak.

Etorkizuneko ikasleek eskaintza horren xehetasunak ezagutu ditzaten, NUPek “online” saio informatibo batzuk antolatu ditu. Saioak martxoaren 24tik 27ra bitartean eginen dira, eta interesa duen edonorentzat dira. Saioetan parte hartzeko, izena eman behar da aldez aurretik. NUPeko masterren gainerako eskaintza, aipatutako berritasunetatik aparte, aurreko ikasturtekoaren berdina da. Eskaintzako sei masterrek lanbidean aritzeko gaitzen dute, hau da, nahitaezkoak dira lanbide arautu batzuetan aritzeko.

NUPen eskainitako master berrien xehetasunak

Espainiako Wind Energyko Masterra gai horretan aipamen duala duen lehena da Espainian. Horrek esan nahi du bere kredituetatik 27 sektoreko enpresa batean egin daitezkeela, eta horrek aukera emanen dio ikasleari proiektu eolikoak diseinatzeko teknikei eta tresnei buruzko ezagutza sakona lortzeko eta enpresen kudeaketaren beste eremu batzuekin elkarreraginean aritzeko, hala nola giza baliabideen kudeaketa edo finantza-kudeaketa.

Proiektuetan oinarritutako ikaskuntza erabiltzen duen masterra da, eta ikasleak, oso modu aplikatuan, energia eolikoko industria-proiektu oso bat garatzeko beharrezkoak diren ezagutzetan trebatuko dira, haren bideragarritasunetik, errotorearen hautaketatik, sistema elektrikoaren eta kontrol-sistemaren diseinutik eta egiturazko diseinutik proposatutako soluzioaren simulaziora eta ziurtapenera arte. Horretarako, ikasle bakoitzak aerosorgailuen parke baten diseinu integrala eginen du bere azpisistema guztiekin, eta industria eolikoan ohikoa den diseinu prozesua kopiatuko du. Proiektuaren barruan daude kokalekuaren aukeraketa, bideragarritasun-azterketa, amaierako diseinua eta makinaren ziurtapena.

Bestalde, Machine Learningeko Masterrak aukera emanen die ikasleei adimen artifizialaren eragin handieneko arloan espezializatzeko. Ikasleak ikasiko du algoritmoak diseinatzen eta programatzen, makinei aukera ematen dietenak datuetatik ikasteko, arazo konplexuak ebazteko eta giltzarri diren sektoreetan (osasuna, industria, retaila, automozioa, logistika, marketina, etab.) erabakiak hobe hartzeko soluzioak sortzeko.

Masterrak ikuspegi teoriko-praktikoa du, eta ikasleei aukera eskainiko die enpresei zuzendutako transferentziarako benetako proiektuetan parte hartzeko. Ikasten dutenak gai izanen dira ikusmen-arazo zehatzak ordenagailu bidez ebazteko, hizkuntza naturala prozesatzeko eta denbora-serieak aztertzeko, bai eta adimen artifizialeko ereduak diseinatu, inplementatu eta entrenatzeko edo ebaluatzeko eta haien mugak identifikatzeko ere.