María Arias ikaslea, Jesús Álvarez Masterreko zuzendariaren eta Lourdes Albizua praktiketako tutorearen artean
María Arias Cuencak, Nafarroako Unibertsitate Publikoko (NUP) Informazio Geografikoko Sistemetako eta Teledetekzioko Unibertsitate Masterreko (IGSTUM) bigarren promozioko (2016-2017) espediente onena (8,8) duen tituludunak, ordaindutako praktikak egingo ditu Trabajos Catastrales de Navarra (Tracasa) enpresan, bi erakundeek sinatutako hitzarmen baten bidez. María Ariasen tutore Lourdes Albizua Huarte enpresa publiko horretako Lurralde Ingeniaritza arloko Teledetekzio atalaren arduraduna da.
Tracasa enpresako zenbait arlotan eta informazio-sistemetako eta teledetekzioko zenbait jardueratan egingo du lan María Ariasek, eta, hortaz, garapen-fase desberdinetan dauden era askotako proiektuak ezagutuko ditu. Praktiken helburua da, batetik, tituludunek masterrean ikasitakoa eta enpresaren beharrak egiazko ingurunean uztartzea eta, bestetik, bekadunaren enplegagarritasuna eta ekintzailetza sustatzea. Masterreko lehen promozioan espediente onena izan zuen ikasleak, Mikel Viñualesek, ere Tracasan egin zituen praktikak, eta enpresa publiko horretan segitzen du gaur egun lanean.
María Arias NUPeko nekazaritza-ingeniariak beste 12 lagunekin batera egin zuen Informazio Geografikoko Sistemetako eta Teledetekzioko Masterra, zeinaren bigarren edizioa 2017ko irailean bukatu baitzen. Lehenengo edizioan dozena bat ikasle aritu ziren, eta aurten ere 13 ikasle daude matrikulatuta. 2018ko apirilaren 9an zabalduko da graduondoko master horretan 2018-2019 ikasturterako aurrez izena emateko epea, eta Unibertsitatearen webgunean egin daiteke aurreinskripzioa.
IGSTUMeko praktika eskaintza zabala
Informazio Geografikoko Sistemetako eta Teledetekzioko Masterreko irakasle-taldearen burua Jesús Álvarez Mozos da, NUPeko Landa Ingeniaritza eta Proiektuen Saileko irakaslea, eta Landa Ingeniaritza eta Proiektuen Saileko, Automatika eta Konputazio Saileko eta Estatistika eta Ikerketa Operatiboko Saileko zenbait irakaslek eta sektoreko enpresetako kanpo-profesionalek osatzen dute taldea.
Jesús Álvarez Mozosen esanean, graduondoko master hori sendotzen ari da, “eta praktikak egiteko eskaintza erakargarria du; izan ere, gero eta enpresa gehiagok erakusten dute gure egresatuenganako interesa, dela nekazaritza, ingurumena edo basozaintza sektoreetakoek, dela informazio geografikoak ustiatzearen balio erantsia interesatzen zaien mankomunitate eta enpresa teknologikoek”. Zehazki, 26 lanpostutan praktikak egiteko aukera izan dute edizio honetako ikasleek (13 ikaslek, gorago aipatu bezala); zehatz-mehatz, entitate hauetan: INTIA, NILSA, Estudios GIS, Basartea, Nafarroako Ingurumen Kudeaketa, TESICNOR, Servicios Arga-Valdizarbe, Foresna/Zurgaia, Hazi Fundazioa, Kunak Technologies, TECHNIDRONE, Aguacanal, Embeblue, Airestudio Geoinformation Technologies, Nafarroako Gobernua, Nasuvinsa, Jurramendiko Mankomunitatea, Gipuzkoako Mendizale Federazioa eta Tracasa bera, jakina. Ikasleek diziplina askotako profilak dituzte: geografoak eta Agronomia, Topografia, Baso, Telekomunikazio eta Informatika ingeniaritzetako graduatuak, gehienak.