Ezkerretik eskuinera, Ferran Muntané Isart ikertzailea, Belén González Osasun Ministerioko Osasun Mentaleko komisarioa; eta Joan Benach eta Pablo Ruisoto ikertzaileak.

NUPeko irakasleak, gaur egun JHU-UPF Politika Publikoen Zentroko ikertzaile bisitariak (John Hopkins University-Universitat Pompeu Fabra), txostenaren aurkezpen ofizialean parte hartu du uda honetan Madrilen, Joan Benach eta Ferran Muntané aipatu zentroko ikertzaileekin eta argitalpenaren egileekin batera.

Esparru integrala, azterketa eta prebentzioa

Dokumentuak esparru integral bat eskaintzen du lan-baldintza prekarioek, ezegonkorrek eta kaltegarriek osasun mentalean dituzten ondorioak ulertzeko; baita lehen mailako arretako profesionalei arrisku horiek identifikatzeko eta lantzeko orientabideak emateko ere; enpleguarekin lotutako osasun mentalaren narriadura monitorizatzeko eta prebenitzeko alerta goiztiarreko sistema bat ezartzeko; eta sektoreen arteko ekintzak eta administrazioen arteko lankidetza garatzeko, egiturazko aldaketen eta politiken aldaketen bidez ongizate mentala sustatzeko.

Ebidentzia eta landa-esperientzia zabal batean oinarrituta, txostenak ikuspegi sistemiko baten premia larria nabarmentzen du. “Lan-baldintzek osasun mentalean duten eragina ezin da arazo indibidual edo kliniko gisa soilik hartu”, argudiatu dute txostenaren egileek. “Egiturazko gaia da, eta politika publikoen esku-hartzea eta arreta-, enplegu- eta gizarte-babeseko sistemen antolaketaren birplanteamendua eskatzen ditu”.