Atzo, astelehena, martxoak 31, “Zero hondakin” tailerraren beste edizio bat egin zen. Erakunde akademikoko AN Taldearen Katedrak antolatu zuen ekimena, Mycelium Gastronomy sarearekin lankidetzan. Arrosadiko campusean egindako jardunaldiak NUPeko Elikagaien Industriako Teknologiako eta Jasangarritasuneko Unibertsitate Masterreko eta Ilundain Fundazioko 25 ikasle bildu zituen zientziak, berrikuntzak eta sukaldaritzako jardunak xahutzen diren elikagaien kantitatea murrizteko irtenbide berritzaileak asmatzeko asmoz, nekazaritzako elikagaien sektoreko profesionalen eskutik. Zehazki, ikasleek AN Taldearen produktuekin prestatutako proposamen sortzaileak eta “zero hondakin” errezetak diseinatu zituzten.
Alumnado de la UPNA y de la Fundación Ilundain y profesionales del sector posan en una de las plantas piloto de la ETSIAB.
Jardunaldiko tailer praktikoak NUPeko Nekazaritzako Ingeniaritzako eta Biozientzietako Goi Mailako Eskola Teknikoaren (NIBGMET) instalazio pilotuetako batean egin ziren, eta elikagaiak xahutzeari buruzko benetako erronketan zentratu ziren. Horri esker, ikasleek brokoli “coleslawa” (entsalada), zainzurien “kimchia” (prestakuntza hartzitua) eta “panzanella” (entsalada) prestatu zituzten.
Lantegien aurretik Zero Waste Talks hitzaldiak egin ziren. Hitzaldi horietan gastronomiaren eta zientziaren arloko profesionalek parte hartu zuten esperientziak eta ideia praktikoak partekatzeko. Horien artean, Eneko Izcue sukaldaria (Basque Culinary Center), elikagaien aprobetxamenduari aplikatutako hartzidura-tekniketan aditua; Paula Torán-Pereg ikertzailea, elikagaien ekodiseinuan aditua; eta Julián Imaz, Dantza Kontserben I+G+b arduraduna (AN Taldea), zeinak industrian produktuei zein prozesuei aplikatutako aurrerapenak azaldu baitzituen, galerak minimizatzeko eta azpiproduktuak balorizatzeko.
Elikadura-kate jasangarriagoa
Jarduera hasteko, ongietorri instituzionala egin zuten Maite Muruzabal AN Taldea Fundazioko zuzendariak eta Estefanía Simón Mycelium Gastronomyko ordezkariak. Gastronomiako adituen sare global horrek elikagaien industria eraldatzen dihardu, berrikuntzaren, jasangarritasunaren eta diziplinen arteko lankidetzaren bidez. “AN Taldearen Katedrak ezagutza akademikoa enpresaren benetako beharrekin lotu nahi du, eta Zero hondakin elikadura-kate eraginkorrago eta jasangarriago baterantz nola aurrera egin dezakegun erakusten duen adibide argia da”, nabarmendu zuen Muruzabalek.
Jardunaldia amaitzeko, tailerrean sortutako sukaldaritza-proposamenen dastaketa-bazkaria egin zen, prestakuntza-prozesuaren amaiera gisa: ezagutzatik ekintzara, esperimentaziotik pasatuz.
AN Taldearen Katedra
AN Taldearen Katedra NUPek eta AN Taldeak 2014an sinatutako lankidetza-hitzarmen baten emaitza da, hezkuntza-ingurunea enpresa-errealitatera hurbiltzeko helburuarekin, nekazaritzako elikagaien sektorean berrikuntza eta jasangarritasuna bultzatuko duten baterako proiektuak sustatuz.
Zero hondakin tailerraren edizio hori AN Taldearen Katedraren jardueren barruan dago, gazteen talentua, jasangarritasuna eta Unibertsitatearen eta nekazaritzako elikagaien arloko enpresa-sarea sustatzeko.