Nafarroako Unibertsitate Publikoko Hizkuntzen Goi Mailako Ikastegiak epea ireki du gaur, ekainak 22, heldu den 2023-2024 ikasturterako matrikula egiteko, eta irailaren 6ra arte egonen da zabalik. Ikasturtea irailaren 11ko astean hasiko da, eta 998 ikaspostu baino gehiago eskaintzen dira, 75 ikastarotan banatuak. Matrikula Hizkuntzen Goi Mailako Ikastegiaren webgunean egiten ahal da, eta webgune horretan bertan kontsultatzen ahal da egutegi akademikoa.
Hizkuntzak ikasteko liburuak.
Ingelesa, frantsesa, alemana eta atzerritarrentzako espainiera ikasteko ikastaro orokorrak eskaintzen dira. Horrez gain, ingeleseko azterketa ofizialak prestatzeko prestakuntza espezifikoa ere egin daiteke, baita Zaragozako Unibertsitateko Konfuzio Ikasgelak ematen dituen txinerako ikastaroak ere.
Ikastaroak Unibertsitateko komunitateko nahiz kanpoko pertsonentzat
Ikastaroak denentzat dira: bai Unibertsitateko komunitateko kideentzat (graduko edo graduondoko ikasleak, irakasle eta ikertzaileak eta administrazioko eta zerbitzuetako langileak), bai NUPeko tituludunentzat, bai eta Unibertsitatekoak ez direnentzat ere. Unibertsitateko ikasle ohiei eta adiskideei zuzendutako A3U Programan izena emana duten kideek –inskripzioa doakoa da– deskontu bereziak dauzkate.
Ikastaroen diseinuak aukera ematen du hizkuntzen ikaskuntza norberaren neurrira, beharretara eta mailara egokitzeko, komunikazioa eta parte-hartzea errazten duten metodoen bitartez, hizkuntzaren komunikazio gaitasunean benetan aurrera egiteko.
Ikastegiko ikasle berriek, hizkuntza bat ikasi nahi eta aldez aurretiko ezagutzak badituzte, beren maila egiaztatu beharko dute, dela egiaztapen ofizial baten bidez, dela ikastegian bertan proba bat eginez (Arrosadiko campuseko Sario eraikina, 3. modulua, 1. solairua). Proba horretarako, beharrezkoa da aldez aurretiko inskripzioa egitea, eta astelehenetik ostiralera egin daiteke, 09:00etatik 14:00ak arte abuztuan eta 08:00etatik 15:30 arte irailean. Ingelesaren kasuan ordenagailu bidezko test bat eta idazlan bat egin behar dira, eta, frantsesaren, alemanaren eta espainieraren kasuan, berriz, gehienez ordubete iraunen duen proba idatzi bat.
NUPeko Hizkuntzen Goi Mailako Ikastegia
NUPeko Hizkuntzen Goi Mailako Ikastegia duela 20 urte baino gehiago ari da hizkuntzak irakasten. Denbora horretan guztian, 30.000 ikasletik gora izan dira bertan. Gainera, akreditatutako zentro aztertzailea da honako hauen azterketa ofizialetarako: Cambridge eta TOEFL iBT (ingelesa), DELF-DALF (frantsesa), DELE (gaztelania) eta CCSE (nazionalitate espainiarra eskuratzeko) eta YCT, HSK eta HSKK (txinera).
Ikastaro eta zerbitzu horiei buruzko argibide guztiak Hizkuntzen Goi Mailako NUPeko Ikastegiaren webgunean kontsultatu daitezke, eta, orobat, 948 169791 telefono zenbakira deituta edo helbide elektroniko honetara mezu bat igorrita: centro.idiomas@unavarra.es.