Itsaso Aranguren Erice, NUPeko campusean, saria egiaztatzen duen diplomarekin.

Teledetekzio izeneko teknikak plataforma espazialetan instalatutako sentsoreetatik lurrazaleko datuak eskuratzeko balio du, lurraren eta sentsorearen arteko elkarrekintza elektromagnetikoa atzemanez. Hain zuzen ere, saritutako lanak, “Relleno de huecos en series temporales de índices Sentinel-2 en cubiertas agrícolas con datos procedentes de Sentinel-1” izenekoak, aitorpen berezia jaso du “bai Sentinel-1 (radarra) eta Sentinel-2 (optiko-multiespektrala) sateliteetatik jasotako irudiak konbinatzeagatik, atmosferan hodeiak egoteak eragindako informazio falta betetzeko, baita nekazaritzako laboreetan duen aplikagarritasunagatik ere”.

Egileak azaldu duenez, teledetekzio bidez lortutako datuek aukera ematen dute, nekazaritzaren kasuan, laboreen segimendua egiteko eta anomaliak detektatzeko (oro har landareen osasunarekin, nutrizioarekin edo egoera hidrikoarekin lotuak), zeinak zuzentzeko modukoak baitira behaketa egokiak eginez gero. Gainera, teknologiaren bilakaerak errendimendu handiko sentsore berriak garatzea eta datuen bolumen handia sortu ahal izatea ekarri du berekin. “Informazio kantitate handi hori, landaredi-indizeen bidez, parametro fisikoen arabera interpretatzen ahal da: laborearen hezetasun-edukia, hostoen egitura zelularra eta abar”.

Sentinel sateliteak

Europako Espazio Agentziak Lurrari behatzeko programa bat du, eta haren helburu nagusia informazioa ematea da, doan eta modu irekian, datu orokorrak ia-ia denbora errealean emanez. Horretarako, satelite propio batzuk ditu, horien artean Sentinel-1 eta Sentinel-2 izenekoak. “Satelite horien artean desberdintasun nagusi bat dago –adierazi du Itsaso Arangurenek–. Batetik, Sentinel-1ek irudiak espektroaren banda batean hartzen ditu, zeinak aukera ematen baitu informazioa egunean eta/edo gauean eskuratzeko, ia edozein baldintza klimatikotan; bestetik, Sentinel-2 sentsore optiko pasibo bat da, eta hodeien presentziaren eta argiztapenik ezaren eragina duten bandetan lan egiten du.

Nekazaritzaren arloan, erabili ohi diren landaredi-indizeak Sentinel-2ren eta gisa horretako sentsoreen bidez lortu ohi dira, eta horrek esan nahi du litekeena dela datuek eskuragarri egoteari uztea hodeiak daudenean. Itsaso Arangurenen master amaierako lanaren helburua denborazko serieen datu falta hori osatzeko teknikak ebaluatzea izan zen.

Itsaso Arangurenek Nekazaritzako Elikagaien eta Landa Ingurunearen Ingeniaritzako Gradua ikasi zuen NUPen, eta Nekazaritzako Ingeniaritzako eta Ingeniaritzako eta Arkitekturako Irudikapeneko eta Diseinuko Master Bikoitza Kordobako Unibertsitatean. Gero, Nafarroako Unibertsitate Publikora itzuli zen Informazio Geografikoko Sistemetako eta Teledetekzioko Unibertsitate Masterra egitera, eta, gaur egun, doktoretza-tesia egiten ari da, NUPeko Teledetekzio Laborategian proiektuko lankide diharduen aldi berean.

Lehiaketa eta sarituak

Lehiaketaren edizio honetan 47 lan aurkeztu dira (gradu amaierako 18 lan eta master amaierako 29). 37 Espainiako 14 unibertsitatetakoak ziren, eta 10 atzerrikoak, Australiako, Brasilgo, Kolonbiako, Kubako, Ekuadorreko eta Guatemalako unibertsitateetakoak.

Lanak baloratzeko irizpideen artean, epaimahaiak honako hauek hartu zituen kontuan: konplexutasuna eta berrikuntza, kalitatea eta zorroztasun zientifikoa eta teknikoa; aplikatutako metodologiaren eta teknologiaren alderdi berritzaileak; landutako gaiaren garrantzia eta mundu errealean duen aplikagarritasuna; eta aurkezpenaren alderdi formalak, hala nola egitura, azalpenaren argitasuna, bibliografia, etab.

Lehenbiziko saria –1.500 euro eta Francisco Coello de Portugal y Quesadaren brontzezko busto bat– Alfonso López Ruizek irabazi du (Jaéngo Unibertsitatea), “Simulación de escaneos 3D” lanagatik; hirugarrena –500 euro–, berriz, Sini Belamrik (Jaéngo Unibertsitatea), “Aplicación de las técnicas InSAR multitemporales para la monitorización del yacimiento de gas de Hassi R’Mel (Argelia) usando Sentinel-1” lanarengatik.