Azaroaren 2an omenaldia eginen zaio Nafarroako Unibertsitate Publikoan (NUP) sorginen fenomeno historiko eta antropologikoaren arloan aditu hoberena den Gustav Henningsen ikertzaileari, baita Marisa-Rey Henningsen bere emazteari ere, Nafarroako sorginkeria eta inkisizioa ikertzen egindako ekarpena eskertzeko. Omenaldia NUPek (ikertzailearen funts dokumentala eta bibliografikoa jaso baitu dohaintzan) eta Nafarroako Gobernuak eskainiko dute. Bereziki, Zugarramurdiko, Urdazubiko eta Baztan osoko sorginkeriari buruzko ikerketak aitortu nahi dira, non ezaguna den Logroñoko 1610eko fede autoan egindako epaiketa; izan ere, haren ondoren ikerketa bat abiarazi zen, nazioartean sorginen jazarpenaren amaiera ekarri zuena.
Ekitaldi instituzionala goizeko 10:00etan hasiko da, eta Ramón Gonzalo Unibertsitateko errektorea eta Rebeca Esnaola Nafarroako Gobernuko Kulturako kontseilaria izanen ditu buru. Osasun arrazoiak direla-eta omenduak ezin izanen dira ekitaldira etorri, baina haien alaba Mariah Rey Markvigek ordezkatuko ditu. Haiei ohore egiteko, Henningsenena berarena den “En busca de la verdad sobre la brujería. Los memoriales del inquisidor Salazar y otros documentos relevantes sobre el auto de fe de 1610” liburua emanen zaio, NUPek aukera honetarako argitaratua, baita Nafarroako Gobernuko Kultura Zuzendaritza Nagusiak argitaratzen duen Príncipe de Viana aldizkariaren bi ale monografiko ere, ikertzaile daniarrari eskainitakoak. Ez da sarrerarik behar, eta aretoa bete arte onartuko da jendea.
Gustav Henningsen, Danimarkan, bere funtsak NUPi emateko agiriak sinatzen.
Funts bibliografiko eta dokumentalaren dohaintza
Omenaldia zenbait jarduerarekin osatuko da, dohaintzan emandako funts dokumentala eta bibliografikoa ezagutzera emateko. Lehenik eta behin, 10:30ean, bisita gidatua eginen da bi erakusketatara: “Gustav Henningsenen eta Marisa Rey-Henningsenen legatua NUPen”, Liburutegian kokatua, eta Gustav Henningsenen “Europako Brujomania. Gertakariak eta Mitoak”, Ikasgelategiko bigarren solairuan kokatua.
Ondoren, 12:00etan, “Gustav Henningsenen eta Marisa Rey-Henningsenen funts dokumental eta bibliografikoa NUPen” aurkezpena izanen da, Soforak eraikineko batzar aretoan. Bertan parte hartuko dute Roldán Jimeno Aranguren Unibertsitateko idazkari nagusiak, Ignacio Panizo Santos Liburutegi Nazionaleko Artxiboaren Ataleko buru eta Inkisizioari buruzko ikerketetan adituak, Iñaki Montoya Ortigosa NUPeko Agirien Kudeaketaren eta Artxibo Nagusiaren Ataleko buruak eta Carmen Echeverría Arambillet NUPeko Liburutegiko zuzendariak. 13:00etan, bisita gidatua eginen da funts dokumentalera, Soforak eraikinean hasi eta Liburutegian amaituko dena.
Gustav Henningsenen legatua
Henningsen-Rey funts dokumental eta bibliografikoa Gustav Henningsenen ikerketa-proiektuetarako sortutako, jasotako edo bildutako dokumentuek eta liburuek osatzen dute, bereziki Espainiako sorginkeriaren eta Inkisizioaren azterketarekin lotutakoek eta nazioarteko komunitate zientifikoan eragin nabarmena izan dutenek. Bere artxibo pribatuaren parte bat ere badago, ikerketa horiek ulertzen eta testuinguruan kokatzen laguntzen duena.
“Europako eta Espainiako hainbat erakunde publiko eta pribatuk agertu zuten interesa funts horiek jasotzeko, baina, aukerak aztertu ondoren, Henningsen-Rey senar-emazteek funts gehienak Nafarroako Unibertsitate Publikoari ematea erabaki zuten, eta parte txiki bat Galiziako Herriaren Museoari/Museo do Pobo Galegori eta Liburutegi Nazionalari”, azaldu du Iñaki Montoya Ortigosak Nafarroako Gobernuaren “Príncipe de Viana” aldizkari zientifikoaren separata batean, non dohaintzan emandako funtsen xehetasunak eta garrantzia azaltzen baitira. 2020an, aldizkari horretan bertan, Ignacio Panizo Santosek senar-emazte ikertzaileen ibilbidea eta lana ere azaldu zituen.
Gustav Henningsenen biografia
Gustav Henningsen Folkloristika Nordikoko Magister artium da Kopenhageko Unibertsitatean (1962), eta Filosofian doktorea unibertsitate berean, The Witches’ Advocate doktoretza tesiarekin. Hortik, El abogado de las brujas. Brujería vasca eta Inquisición española liburua sortu zen, 1980an ingelesez eta 1983an gaztelaniaz argitaratua. Tesi horren bigarren partea, gaztelaniaz argitaratu gabea, NUP prestatzen ari den argitalpen baten xede izanen da.
Danish Folklore Archives-en ikerketako zuzendaria izan da 1965etik 2002ra bitarte. Sorginei eta Inkisizioari buruz egin dituen ikerketei esker, gai horietan munduan den espezialista hoberena da. Bere emazte Marisa Rey-Henningsenek itzuli ditu lanak gaztelaniara.