Lakuntzako Herri Eskolakoak, Lehen Hezkuntzako 3., 4. eta 5. ikasmailen kategoriako irabazleak, honako hauekin: Ramón Gonzalo (NUPeko errektorea), Javier Remírez (Nafarroako Gobernuko lehendakariordea), Gurutze Pérez Artieda (Emakumearen, Zientziaren eta Teknologiaren Katedrako zuzendaria), Amaia kantautorea eta “Yo quiero ser científica” antzezlanaren egile eta aktoreetako bi: Patricia Aranguren (Marie Sklodowska-Curie, 1.a ezkerretik hasita) eta Leyre Catalán (Hipatia Alexandriakoa, 1.a eskuinetik hasita).
Lakuntzako Herri Eskolak eta Barañaingo Santa Luisa de Marillac Ikastetxeak irabazi dute “Yo quiero ser científica” antzezlanean oinarriturik Nafarroako Unibertsitate Publikoko (NUP) ikertzaile batzuek bultzatu duten eskola-lehiaketa. Sakanako ikastetxeak lehen saria lortu du Lehen Hezkuntzako 3., 4. eta 5. ikasmailen kategorian, eta Iruñerrikoak, berriz, Lehen Hezkuntzako 6. eta DBHko 1. ikasmailen kategorian. Horrez gain, honako hauek lortu dituzte accesitak: Zangozako Luis Gil Ikastetxea, Iruñeko San Cernin Ikastetxeko Ariadna Macas Romero ikaslea eta Lakuntzako ikastetxea bera.
Eskola-lehiaketa honen sari-banaketa joan den ostiralean izan zen, urriak 11, Iruñeko Arrosadiko campuseko Liburutegian, zerbitzu horren 25. urteurrena ospatzeko ekitaldian (1994-2019). Honako hauek eman zituzten sariak: Ramón Gonzalo García (NUPeko errektorea), Javier Remírez Apesteguía (Nafarroako Gobernuko lehenbiziko lehendakariordea eta Lehendakaritzako, Berdintasuneko, Funtzio Publikoko eta Barneko kontseilaria), Gurutze Pérez Artieda (Emakumearen, Zientziaren eta Teknologiaren Katedraren zuzendaria eta “Yo quiero ser científica” antzezlanaren egile eta aktoreetako bat) eta Amaia kantautorea, zeina ekitaldira eskuzabaltasunez etorri baitzen aipatutako Katedrako jarduerei babesa emateko. Antzezlan horren egile eta aktore diren NUPeko gainerako irakasleek ere hartu zuten parte. Hori dela-eta, zientzialari historikoak interpretatzeko erabiltzen dituzten jantziekin agertu ziren. Sarituak beren senitartekoekin eta irakasleekin joan ziren ekitaldira.
Barañaingo Santa Luisa de Marillac Ikastetxekoak, Lehen Hezkuntzako 6. eta DBHko 1. ikasmailen kategoriako irabazleak, honako hauekin: Amaia, errektorea, Nafarroako Gobernuko lehendakariordea, Emakumearen, Zientziaren eta Teknologiaren Katedrako zuzendaria eta “Yo quiero ser científica” antzezlanaren gainerako egile eta aktoreak.
Unibertsitate Proiekzioko, Kulturako eta Dibulgazioko Errektoreordetzak antolatutako lehiaketa joan den ikasturtean "Yo quiero ser científica” antzezlana ikustera joan ziren ikasleei irekita zegoen. Antzezlanean agertzen diren iraganeko edo egungo emakume zientzialariekin loturiko lan bat egitea zen lehiaketaren helburua. Lan hori idazlana, marrazkia, bideoa edo beste formaturen bat izan zitekeen. Bi sari-kategoria zeuden modalitate bakoitzerako: lehen saria, tableta elektroniko bat (ikastetxearentzat) eta NUPen sustapeneko materiala (ikasleentzat); eta bi accesit, kasu honetan ere erakunde akademikoaren artikuluak eta, orobat, Iruñeko Planetariorako eta Donostiako Eureka Zientzia Museorako sarrerak. Gainera, saritutako ikasleen ikastetxeek liburu sortak jaso zituzten.
Ikasle saridunak
Lakuntzako Herri Eskolako hamar ikaslek jaso dute Lehen Hezkuntzako 3., 4. eta 5. ikasmailen kategoriako lehen saria, “Zientzia berdintasunaren bidean” ipuin digitalagatik. Hauek izan dira egileak: Alain Berestiegui, Djibril Diouf, Iker Escudero, Laida Garciandia, Osama Handi, Julen Larraza, Luca Martínez, Idoia Miranda, Ekain Ramajo eta Olaia Razkin. Ikasle horiek berek lortu dute kategoria honetako accesita, “Mary Anning” aurkezpen digitalagatik.
Lakuntzako Herri Eskolakoak, Lehen Hezkuntzako 3., 4. eta 5. ikasmailen kategoriako accesita eskuratu dutenak, honako hauekin: Marisol Gómez (Emmy Noëther, 1.a ezkerretik hasita) eta Alicia Martínez (Sofia Kovalévskaya, 1.a eskuinetik hasita), beste batzuen artean.
Lehen Hezkuntzako 6. eta DBHko 1. ikasmailen kategorian, Santa Luisa de Marillac Ikastetxeko bost ikasle izan dira irabazleak, “Yo quiero ser científica” izeneko bideoagatik. Egileak Leyre Ecay Callén, Lucía Echarri Díez, Ana Fernández López, Amaia García Vergara eta Naiara Mendive Resa izan dira.
Hauek lortu dituzte accesitak: San Cernin Ikastetxeko Ariadna Macas ikaslea, “Carta de Mary Somerville a Ada Lovelace” lanagatik, eta Luis Gil Ikastetxeko hamar ikasle, “Los de 6.ºA por la igualdad” horma-irudiagatik. Hauek izan dira egileak: Samuel Arbea Irigoyen, Iñaki Arina Gracia, Iván Bandrés Ozcoidi, Irene Carlos Toucedo, Adriano Fernández Saavedra, Iker Ferrer Samonete, Ohiane Ibero Cervera, Rubén Pardo Ibáñez, Alba San Martín Jurío eta Daniel Sarvide Zudaire.
Iraganeko eta egungo emakume zientzialariak
“Yo quiero ser científica” antzezlanean, NUPeko ingeniaritzako zenbait titulaziotan eskola ematen duten bederatzi emakume irakaslek aurreko mendeetako emakume zientzialarien bizitza eta lana berreskuratu dituzte: Hipatia Alexandriakoa, matematikaria, astronomoa eta filosofoa (IV.-V. mendeak); Maria Sibylla Merian, entomologoa eta margolaria (1647-1717); Ada Lovelace (Ada Byron izenaz ere ezaguna), matematikaria eta lehen informatikaria (1815-1852); Sofia Kovalévskaya, matematikaria eta astronomoa (1850-1891); Marie Sklodowska-Curie, kimikaria eta fisikaria (1867-1934); Emmy Noëther, matematikaria (1882-1935); Edith Clarke, ingeniari elektrikoa (1883-1959); Klara Von Neumann, informatikaria (1911-1963); eta Hedy Lamarr, telekomunikazio ingeniaria (1914-2000).
Zangozako Luis Gil Ikastetxekoak, accesitetako bat lortu dutenak, honako hauekin: Silvia Díaz (Hedy Lamarr, 1.a ezkerretik hasita) eta Aránzazu Jurío (Klara Von Neumann, 1.a eskuinetik hasita), beste batzuen artean.
Bederatzi emakume irakasleek sortu eta interpretatzen duten antzezlanak emakume zientzialariak agerian jarri nahi ditu, batetik, zientziaren historiaren parte ezezagun bat gogora ekartzeko, eta, bestetik, neska gazteak zientziaren eta teknologiaren arloko emakume gailenekin identifika daitezen, eta inspirazio iturri gisa har ditzaten.
Hauek dira proiektuan esku hartu hartu duten ikertzaileak: Patricia Aranguren Garacochea (doktorea Industria Ingeniaritzan), Edurne Barrenechea Tartas (doktorea Ingeniaritza Informatikoan), Leyre Catalán Ros (doktoretzako ikaslea Komunikazioetako, Bioingeniaritzako eta Energia Berriztagarrietako Teknologiak programan Tecomber), Silvia Díaz Lucas (doktorea Telekomunikazio Ingeniaritzan), Marisol Gómez Fernández (doktorea Matematikan), Aránzazu Jurío Munárriz (doktorea Ingeniaritza Informatikoan), Alicia Martínez Ramírez (doktorea Telekomunikazio Ingeniaritzan), Gurutze Pérez Artieda (doktorea Industria Ingeniaritzan eta ekimenaren arduraduna) eta Idoia San Martín Biurrun (doktorea Industria Ingeniaritzan). Guztiek NUPeko ikerketa institutuetako bitan egiten dute lan: Smart Cities Institutuan (ISC) eta Material Aurreratuen Institutuan (InaMat).
Ariadna Macas Romero, San Cernin Ikastetxeko ikaslea, accesitetako baten irabazlea, Edurne Barrenechearekin (Ada Lovelace, 2.a ezkerretik hasita), beste batzuen artean.
Sari banaketaren ekitaldiko antolatzaile eta gonbidatuetako batzuk. Ezkerretik eskuinera: Aránzazu Jurío, Leyre Catalán, Silvia Díaz, Marisol Gómez, Ramón Gonzalo, Amaia Romero, Javier Remírez, Alicia Martínez, Patricia Aranguren, Edurne Barrenechea eta Gurutze Pérez Artieda.