Klusterra osatzen duten entitateen ordezkariak. Ezkerretik eskuinera, Miriam Zabalza, Padre Menni osasun zentroa; Marisol Gómez, NUPeko irakaslea; Ramón Gonzalo, NUPeko Ikerketako errektoreordea; Francisco Fernández, ADACENeko zuzendari kudeatzailea eta NUPeko alumni nabarmena 2017an; Myriam Flores, Koine Equalitas Fundazioaren zuzendari teknikoa, Sonia Ibañez, Carmen Aldave Egoitzaren zuzendaria (Aspace) eta Julen Etxebeste, Nafarroako Berrikuntza Sozialeko Unitatearen arduraduna.
Nafarroako Unibertsitate Publikoak (NUP) Bizi Kalitatea Hobetzeko Teknologia Berritzaileen Klusterraren sorrera bultzatu du Ikerketako Errektoreordetzaren bidez ADACENekin batera (Nafarroako Kalte Zerebralaren Elkartea). Beste zazpi nafar erakunde hauek sinatu dute plataforma hori sortzeko akordioa: Padre Menni Klinika, Movalsys (NUPeko spin-off enpresa), OSF, Koine Aequalitas, Aspace, Mutua Navarra eta Aldakin. Nafarroako Berrikuntza Sozialeko Unitatearen babesa ere badu.
Konponbideen ekosistema berritzaile baten sustapenean laguntzea da klusterraren helburua (helburu amankomun baten alde lan egiten duten entitate edo enpresen multzoa da), prebentzioa, errehabilitazioa eta bizitza autonomoa indartuko duten sistemak behar dituzten adinekoen eta/edo desgaitasuna dutenen bizi kalitatea hobetzeko. Finean, zahartzearen eta mendekotasunaren aurrean teknologia baliatzen duten arreta-ereduak garatzen lagundu nahi da, eragin sozial eta ekonomiko positiboa duten programa edo zerbitzu jasangarriak diseinatuz.
Zehazki, bi proiektu lantzen ari dira orain klusterrean: aulki gurpildunetan ezartzen ahal den eta oztopoak detektatzen dituen sentsore-sistema bat diseinatzea eta garatzea da lehenengo proiektuaren xedea. “Hala, alboko desgaitasun motorren bat pairatzen duten eta, horrenbestez, aulki gurpildunak behar dituzten pertsonek kostu txikiko aulki motorizatu bat eduki lezakete”, azaldu dute klusterrekoek.
Honako hau da bigarren proiektuaren xedea: IKT tresna bat garatzea, alde batetik, adineko pertsonentzat problemak sortzen dituzten eguneroko alderdien jarraipena egiteko aukera emango duena, eta, bestetik, “bakarrik ez daudela ikusaraztea, edozein gauza gertatzen dela ere komunikaziorako kanal iraunkor bat eskainiz”, esan dute arduradunek.
Osasuna zahartzearen eta mendekotasunaren aurrean
Klusterraren jarduera-lerroetan jasotzen da lankidetza proiektuak sortuko direla, Europa, nazio eta eskualde mailakoak diren eta klusterraren helburuekin lotuta dauden I+G+Bko deialdietara aurkezteko. Horretaz gainera, administrazio publikoek eta zerbitzu-emaileek zahartzearen eta mendekotasunaren aurrean teknologia baliatzen duten arreta-ereduak hartzeko erraztasunak eta laguntza ematea ere jasotzen da. Laguntza eman nahi da, halaber, prebentzioaren arloan konponbide berritzaile zehatzak garatzeko eta merkaturatzeko, etxean bizitzen jarraitzeko eta neuroerrehabilitazioa egiteko, bai eta prestakuntza, ikaskuntza eta entitateen arteko praktika onak hobetzeko.
Klusterraren arduradunek azaldu dutenez, “desgaitasunarekin eta mendekotasunarekin lotutako gai guztietan prebentziorako, errehabilitaziorako eta pertsonentzako arreta zerbitzuak emateko sistema tradizionalak berriz definitu behar dira”. “IKT teknologiak errehabilitazioan, gizarte eta osasun laguntzan eta komunitateko bizitzan erabiliz paradigma berriak irekitzen dira, bizi-kalitatea ez ezik arreta-ereduetan efizientzia eta eraginkortasuna hobetzen dutenak”, azpimarratu dute.
Testuinguru honetan, klusterrak nabarmendu du “Nafarroak ekosistema bat duela, eredu bihurtzeko ahalmena duena nazio eta Europa mailan, adinekoen eta/edo desgaitasuna dutenen bizi kalitatean eta produktuk eta zerbitzuen balio katearen maila bakoitzean zuzeneko eragina duten konponbide berritzaileen dinamizazioan (ikerketa-zentro, unibertsitate, elkarte, enpresa teknologiko edo administrazio publikoek osatzen dute ekosistema)”. “Hori guztia bereziki nabarmenduz proiektuek diseinu fasean eragin sozialeko adierazleak jasotzeak duen garrantzia”, jakinarazi dute sortu berria den plataformatik.