APERNAk antolatutako lehiaketako epaimahaikideak, finalistak eta irabazleak. Ezkerretik eskuinera: Alejandro González Inza (finalista), Iranzu Oyarzábal Oquiñena (irabazlea), Sandra Miñés Belío (finalista), Idoia San Martín Biurrun (epaimahaikidea), Leyre Catalán Ros (epaimahaikidea), Cristina Azcárate Camio (epaimahaikidea), Alain Xabier López Martínez (finalista) eta Adrián Villafranca Hernández (bigarrena).
Iranzu Oyarzábal Oquiñena Nafarroako Unibertsitate Publikoko (NUP) Industria Teknologietako Ingeniaritzan graduatuak eta Industria Ingeniaritzako Masterreko ikasleak irabazi du energia berriztagarriei buruzko ikasketa amaierako lanen hirugarren poster-lehiaketa. Sariaren antolatzailea Energia Berriztagarriak Nafarroan Sustatzeko Elkartea (APERNA) da, zeina Unibertsitatean sortu baitzen eta erakunde horretako Energia Berriztagarrien Katedrari lotuta baitago. Bigarren postuan sailkatu da Adrián Villafranca Hernández, hura ere Industria Teknologietako Ingeniaritzan graduatua, eta irabazlea egiten ari den master bereko ikaslea. Lehen sailkatuak 200 euroko saria irabazi du, eta, bigarrenak, 100 eurokoa.
Iranzu Oyarzábalek poster bat aurkeztu zuen bere gradu amaierako lanari buruz, zeinak “Optimización de contactos de células de silicio cristalino” izena baitauka eta zelula fotovoltaikoen efizientzia hobetzeko modu bat proposatzen baitu. Ikerketa hori CENER (Energia Berriztagarrien Zentro Nazionala) zentroan egin zenez, tutore lanetan aritu ziren Andoni Urtasun Erburu NUPeko Ingeniaritza Elektriko eta Elektronikoko Saileko irakasle eta instituzio horretako Institute of Smart Cities-ISC institutuko ikertzailea eta Eugenia Zugasti Rosende, erakunde hartzailearen aldetik.
Bestalde, Adrián Villafrancaren posterrak “Requerimientos energéticos para el control de rampas en parques eólicos” izeneko gradu amaierako lana jaso du, hiru kontrol-estrategiaren analisi enpirikoaren bidez haize-energia sarean integratzeko prozesua hobetzeari buruzkoa. Ikerketa horretan, Ingeniaritza Elektriko eta Elektronikoko Saileko bi irakasle aritu dira tutore: Iñigo de la Parra Laita (Institute Smart Cities-ISC institutuko ikertzailea) eta Javier Marcos Álvarez.
Epaimahaikideak
Lehiaketa graduko eta masterreko ikasleei zuzendua dago, eta epaimahaiko kideak hauek izan dira: Idoia San Martín Biurrun, Energia Berriztagarrien Katedrako idazkari teknikoa eta Ingeniaritza Elektriko eta Elektronikoko Saileko irakaslea; Cristina Azcárate Camio, Estatistika eta Ikerketa Operatiboko Saileko irakaslea; eta Leyre Catalán Ros, TECOMBER (Komunikazioetako, Bioingeniaritzako eta Energia Berriztagarrietako Teknologiak) programako doktoretzako ikaslea eta APERNAko lehendakaria.
APERNA elkartearen helburua energia garbiak sustatzea eta zabaltzea da, eta, horretarako, Unibertsitateko Energia Berriztagarrien Katedrarekin lan egiten du, bereziki ikasleen parte-hartzea edukiko duten jarduerak antolatzeko.