![zoom](http://www.unavarra.es/img/bt.zoom.png)
![Ezkerretik eskuinera: Íñigo Mugueta, Félix Segura, Maika Munárriz eta Ana Mendióroz, Nafarroako Artxibo Nagusian](http://www2.unavarra.es/filestore/8/6/0/1/4/86014_225126_100000archivos.jpg)
Ezkerretik eskuinera: Íñigo Mugueta, Félix Segura, Maika Munárriz eta Ana Mendióroz, Nafarroako Artxibo Nagusian
Narroako Unibertsitate Publikoko (NUP) Geografia eta Historia Sailak lankidetza proiektu bat abian jarri du Nafarroako Gobernuaren Artxiboen eta Dokumentu Ondarearen Zerbitzuarekin (bereziki, Nafarroako Artxibo Nagusiarekin), Bigarren Hezkuntzako Irakasletza Masterreko Historia espezialitateko ikasleek lan egin dezaten artxiboko iturri historikoen egokitzapen didaktikoan Bigarren Hezkuntzara. "Hezkuntza maila horretako ikasleek, beren irakasleek egoki baderitzote, aukera izango dute beren pentsamendu historikoa sortzeko, artxibo-iturrietatik abiatuz, eta, aldi berean, Nafarroako ondare historiko-dokumentala balioesten ikasten duten bitartean", azaldu du Íñigo Mugueta Morenok. NUPeko irakaslea da eta ekimen honen bultzatzaileetako bat, Ana Mendióroz Lacambra NUPeko irakasle eta Joaquim Llansó Sanjuan Foru Gobernuko Artxiboen eta Dokumentu Ondarearen Zerbitzuaren zuzendariarekin.
“Eskolako eskuliburuetan lehen mailako iturriak edo artxiboko iturriak erabili ohi dituzte —esan du Íñigo Muguetak—, baina lan sakonagoa egin behar da iturri horiekin, eta, ahal den neurrian, historialariek iturri historiko baten aurrean daudenean egiten duten lanaren antzekoa egin behar da. Finean, ikasleak Historia ulertu eta hari buruzko ikuspegia osatu behar du historialariek garatzen dituzten ikerketa prozeduren ezagutza sakonagoarekin: ikerketa, iturrien interpretazio dedukzioaren bidez, imajinazio historikoa, enpatia historikoa... Historiaren didaktikaren ikuspegitik ‘pentsamendu historikoa eratzea´ esaten zaio horri egun”.
Master amaierako lanak
Proiektu horren barruan, transposizio didaktikoari buruzko master amaierako bi lan zuzenduko dituzte gutxienez ere. Artxiboko iturri historikoak ikasgelara egokitzeko prozedura da transposizio didaktikoa. Ana Mendióroz eta Íñigo Muguetak diseinatu dute prozedura hori, didaktikan espezialistak direnek egindako proposamenetatik abiatuz, hala nola Ivo Mattozzik eta Gemma Tribók. “Prozesu baten bidez Bigarren Hezkuntzako ikasleen eta artxibo-dokumentuaren artean dagoen tartea gainditzea da helburua. Prozesu horrek euskarria eta edukia aztertzeko ditu, eta ikerketa, analisia eta jokoaz baliatuko diren estrategia didaktikoak edukiko ditu”, esan du Ana Mendiórozek.
Nafarroako Gobernuaren Artxiboen eta Dokumentu Ondarearen Zerbitzua, Nafarroako Errege Artxibo Nagusiko zuzendariaren (Félix Segura Urra) eta bertako teknikarietako baten bidez (Maika Munárriz Elizondo), arduratuko da unibertsitateko ikasleei aholkularitza emateaz bere proposamenak egiteko erabilgarritasun praktiko bat izan dezaten, Bigarren Hezkuntzako lanera egokitutako material didaktikoak osa ditzaten eta ikasle eta irakasleek Nafarroako Artxibo Nagusira bisita fisiko edo birtualak egitea bultzatzeko. “Alde horretatik, ikerketak eta irakaskuntza batera joatea nahi dute nafar gizarteari hezkuntzan egindako inbertsioa itzultzeko Bigarren Hezkuntza zuzendutako kalitateko material didaktikoen bidez”, esan du Íñigo Muguetak.
Proiektu horretarako, etorkizunean Nafarroako Gobernuarekin lankidetza-hitzarmen espezifiko bat izatea espero du NUPek, eta Didactas.hist ekimenean esku hartzen duten Historiako espezialitateko Bigarren Hezkuntzako irakasleek parte hartzea ere espero du. Didactas.hist ekimena 2015etik sustatzen ari dira, Bigarren Hezkuntzan Historiaren irakaskuntza hobeki irakastea sustatzeko. Hain zuzen, Didaktika Gogoetako II. Jardunaldiak Bigarren Hezkuntzan “Didactas.Hist: Nafarroako eskolako historia: gaur eta bihar” izenburua dutenak larunbat honetan, azaroak 19, egingo dira NUPeko Arrosadiko Campusean, eta ekimen pedagogiko hau aurkezteko balioko dute.