Nafarroako Unibertsitate Publikoko Geografia eta Historia Sailak abian jarri du Geografia, Historia eta Literaturako mintegia (GEHILI). Jarduera horren bidez aztergai izango diren gaiak landu nahi dituzte literaturako lan handiak analizatuz, iruzkinduz eta eztabaidatuz. Mintegia Irakasle Graduko ikasleei zuzenduta dago batez ere, baina Gizarte Laneko eta Soziologia Aplikatuko graduetako ikasleek ere badute izena emateko aukera.

Izena emateko epea irailaren 30era arte dago irekita, eta tramiteak Unibertsitateko Geografia eta Historia Sailean egingo dira (www.unavarra.es/dep-geografiaehistoria). Ikasleek jarduera horretan parte hartzen badute, gehienez ere 6 ECTS kreditu lortzeko aukera izango dute.

Ikastaroak hiru urteko ziklo desberdin ditu (GEHILI lehenengoa eta GEHILI bigarrena eta GEHILI hirugarrena), eta urtero bat eskaintzen da. Ziklo bakoitzean hiru mintegi antolatzen dira, eta mintegietan liburu bat edo bi, edo liburu bat eta bere filma (mintegia bertan ikusiko da) iruzkinduko dira.

Nahikoa aurrerapenaz, ikasleek proposatutako irakurgaien fitxa bat jasotzen dute, egileari buruzko informazioarekin, nobelaren eta filmaren sinopsi kritiko batekin eta erantzun beharreko galdera batzuekin.

Proposatutako irakurgaiak

Edizio honetan proposatutako lanak hauek dira: El camino cruel, Ella Maillart-ena (lehen saioa, azaro amaieran); Diarios de motocicleta. Notas de un viaje por América Latina, Che Guevararena (otsail amaieran); eta Historias de Londres, Enric Gonzálezena (apiril amaieran).

Mintegiaren helburua da irakurketaren gozamena zabaltzea, eta, horretaz gainera, batez ere Irakasle graduko ikasleentzat edukiak transmititzeko erabilgarria izan daitekeen tresna bat hobe ezagutzeko. Lehen GEHILI mintegia aurreko ikasturtean egin zen, eta historia garaikidean giltzarri diren bi gertakari izan zituen aztergai: Lehen Mundu Gerra eta errusiar iraultza.