Ateak Zabaltzeko Egunaren aurtengo ekitaldiko irudia, apirilean.

Nafarroako Unibertsitate Publikoak Ateak zabaltzeko hiru egun antolatu ditu heldu den udaberrirako (bat Tuterako campusean, 2012ko martxoaren 10ean, larunbatean, eta bi Iruñeko campusean, martxoaren 24an eta 31n, biak larunbatak). Egun horietan, orientazio-hitzaldiak emango ditu 2012-2013 ikasturterako eskaintzen dituen 16 graduei eta bi gradu bikoitzei buruz. Egun hauek hurrengo urtean Unibertsitatean sartu nahi duten Batxilergoko eta Lanbide Heziketako ikasleentzat prestatu dira. Ateak Zabaltzeko Egunak Aurreinskripzio Astea baino pixka bat lehentxeago egingo dira. Aste horretan, 2012ko apirilaren 16a eta 20a bitartean, unibertsitateko ikasketak egin nahi dituztenek modua izango dute Interneten bidez aurreinskripzioa egiteko.

Nafarroako Unibertsitate Publikoak 2012-2013 ikasturteko irakaskuntza-eskaintza aurkezteko berriki egin duen ekitaldian, datu hauen berri eman zitzaien Nafarroako Bigarren Hezkuntzako ikastetxeetako zuzendari, irakasle eta orientatzaileei. Lan-saio hartan parte hartu zuten Paloma Vírseda Chamorro Ikasleen Gaietarako errektoreordeak eta Jesús María Pintor Borobia Irakaskuntzako errektoreordeak.

Hitzaldiak bi campusetan

Ikastegi eta titulazioek antolatu dituzte Ateak Zabaltzeko Egunak, eta bai ikasle eta bai gurasoek parte hartzen ahalko dute. Halaber, hainbat karreratako informazio-hitzaldiak eta unibertsitateko instalazioetara bisitak egiten dira egun horietan, bereziki laborategi eta lantegietara, ingeniaritzen eta osasun arloko karrerei dagokienez. Halaber, interesa dutenek aukera izango dute kirol instalazioak eta Urkiak Unibertsitateko Egoitza ezagutzeko.

Zehazki, martxoaren 10ean, larunbatean, Tuterako campusak (Tarazonako etorbidea, z/g) Erriberako hiriburuan ematen diren bi titulazio hauek ezagutzeko interesa duten pertsonak hartuko ditu: Fisioterapia eta Diseinu Mekanikoko Ingeniaritza.

Jardunaldi hauek bi aste geroago, martxoaren 24an, larunbatean, jarraituko dute, Iruñeko campusean. Egun horretan, hitzaldiak emango dira honako titulazio hauei buruz: Osasun Ikasketen Unibertsitate Eskola (Erizaintza eta Fisioterapia), Zientzia Juridikoen Fakultatea (Zuzenbidea eta Lan Harremanak eta Giza Baliabideak), Giza eta Gizarte Zientziak (Haur Hezkuntza, Lehen Hezkuntza, Gizarte Lana, eta Soziologia Aplikatua), eta Ekonomia eta Enpresa Zientziak (Ekonomia, Enpresen Administrazio eta Zuzendaritza, Ekonomiako eta Enpresen Administrazio eta Zuzendaritzako Nazioarteko programa elebidunak, eta Ekonomiako eta Enpresen Administrazio eta Zuzendaritzak gradu bikoitz elebiduna).

Halaber, larunbatean, martxoaren 31n, informazio bilerak egingo dira Nekazaritza Ingeniarien Goi Mailako Eskola Teknikoko (Nekazaritzako Elikagaien eta Landa Ingurunearen Ingeniaritza) eta Telekomunikazio eta Industria Ingeniarien Goi Mailako Eskola Teknikoko (Ingeniaritza Elektromekanikoa, Industria Teknologietako Ingeniaritza; Diseinu Mekanikoaren Ingeniaritza eta Telekomunikazio Teknologien Ingeniaritza eta Informatika Ingeniaritza) titulazioei buruz.

Aurreinskripzio Astea

Ateak Zabaltzeko Egunak Aurreinskripzio Astea baino lehenago egingo dira. Aste honetan aurreinskripzioa egiteko epea apirilaren 16an hasi eta 20an bukatuko da. Data horietan, Bigarren Hezkuntzako ikasketak amaitzen dituzten ikasleek (bai Batxilergokoa eta bai Goi Mailako Graduko Prestakuntza Zikloak ere) Interneten bidez egin ahalko dute aurreinskripzioa Nafarroako Unibertsitate Publikoan 2012-2013 ikasturterako.