Julio Lafuente errektorea eta Alfonso Carlosena Ikerketarako errektoreordea Gamesa, Ingeteam, Cener, Acciona Energía eta Acciona Windpower enpresetako ordezkariekin, Ikasgelaren inaugurazio ekitaldian.
Ezagutzaren bestetaratzea eta trukaketa sorrarazten duten programak, proiektuak eta jarduerak garatzea da xedea. Horixe da gaur Nafarroako Unibertsitate Publikoan ofizialki inauguratu den Energia Berriztagarrien Ikasgelaren helburua. Gamesa, Ingeteam, Cener, Acciona Energía eta Acciona Windpower enpresek eta Unibertsitateak sinatutako lankidetza zientifiko-teknologikorako hitzarmenaren emaitza da Energia Berriztagarrien Ikasgela, Unibertsitatearen eta erakunde horien arteko lankidetza bultzatzeko.
Sario eraikineko lehen solairuan dagoen Ikasgela berri honen inaugurazio ekitaldian parte hartu dute Julio Lafuente López errektoreak eta Alfonso Carlosena García Ikerketarako errektoreordeak; Pedro Antonio Arroyo Gamesako diseinu mekanikoko Unitateko arduradunak; Jesús Mayor Lusarreta Ingeteam Energy-ko Arlo eolikoko zuzendariak; José Javier Armendáriz Quel Cener-ko zuzendari nagusiak; Mikel Sojo Armentia Acciona Energíako Berrikuntzako kudeatzaileak; eta Migueltxo Núñez Polo Acciona Windpowereko Ingeniaritza eta I+G-ko zuzendariak.
Ikasgelaren zuzendaria Pablo Sanchis Gúrpide Ingeniaritza Elektrikoko irakasle titularra da, eta David Astrain Ulibarrena Makina eta Motor Termikoen irakaslea da zuzendari teknikoa. Antolamendu egitura proiektuen zuzendariekin osatzen da. Inaugurazio ofiziala gaur goizean izan bada ere, Energia Berriztagarrien Ikasgelak hainbat hilabete daramatza jardunean eta, izan ere, joan den maiatzean NUPen egin zen Europako Energia Eolikoaren Akademiaren EAWE Summer School 2010 ikastaroa, CENERek antolatuta Ikasgelarekin lankidetzan.
Ikasgela berri honetan ikerketa zientifiko eta garapen teknologikorako proiektuak egingo dira, prestakuntzako jardunaldiak, mintegiak eta ikastaroak eta irakasleen, adituen eta profesionalen trukeak, elkarren artean adostutako graduondoko programak, mintegiak eta ikastaroak egiteko. Halaber, instalazio horiek erabili ahalko dira ikerketako lan esperimentalak, prototipoak, maketak eta azterlanak egiteko, ikerketako proiektu bateratuetarako, lan-talde mistoak sortuz, eta doktoretza tesiak eta ikasketa amaierako lanak egiteko. Hitzarmenean, halaber, aurreikusten da hitzarmen berariazkoak sinatzea, urtero, Energia Berriztagarrien Ikasgelako programazio orokorrerako.
Enpresa aitzindariak
Parte hartzen duten enpresak eta zentro teknologikoa entzute handikoak dira energia berriztagarrien eremuan. Accionak proiektuan parte hartzen du mundu mailan arloko aitzindaria den Acciona Energíaren bidez, eta aerosorgailuen fabrikazio, diseinu eta merkaturatzean espezializatutako Acciona Windpoweren bidez; Gamesa enpresaren espezialitatea iraunkortasun energetikorako teknologiak dira, batez ere eolikoa, aitzindaria da Espainian eta munduko aerosorgailuen lehen fabrikatzaileen artean dago; Ingeteam enpresak sistema elektronikoak garatzen eta fabrikatzen ditu, ondoko energien kontrolerako eta erregulaziorako: eolikoa, eguzki energia fotovoltaikoa, hidroelektrikoa, termosolarra eta biomasarena; eta Cener-en espezialitatea da energia berriztagarrien sustapena, garapena eta ikerketa aplikatua.