Nafarroako Unibertsitate Publikoko (NUP) ikertzaileek irin hartzituak garatu dituzte lekaleak erabiliz, Biogreenfood proiektuaren esparruan. Proiektu hori zentratuta dago prozesu teknologiko jasangarrien bidez elikagai osasungarriak egiteko bioteknologien aplikazioan. Irin horiek proteina asko dute eta egokiak dira zeliakoentzat. Duela gutxi aurkeztu ziren NUPen antolatutako dastaketa batean. Foru Komunitateko beste zazpi entitaterekin batera parte hartzen du NUPek ekimen horretan. Dastaketan, osagai horrekin prestatutako lehenengo elikagaiak aurkeztu ziren, hala nola pasta freskoa eta krepeak.
Biogreenfood proiektuko kideak, Arrosadiko campuseko Olibondoak eraikinean dastaketaren aurretik.
Garatutako produktuak beren propietate funtzional eta nutrizionalengatik ez ezik, beren ezaugarri organoleptikoengatik ere nabarmentzen dira, hala nola aroma eta zaporearengatik, zeinak hobetu egin baitituzte erabilitako hartzipen prozesuei esker.
Biogreenfooden parte hartzen duten nekazaritzako elikagaien sektoreko enpresek balio katearen hainbat katebegi hartzen dituzte, eta proiektuaren hurrengo faseetan lan eginen dute osagai horiek egungo produktuetan txertatzeko edo irin horietan oinarritutako elikadura lerro berriak garatzeko. Horrez gain, diseinatutako produktuen industrializazioaren arduradunak izanen dira.
Ikerketaren eta enpresaren arteko batasuna
Biogreenfood proiektuak Nafarroako Nekazaritzako Elikagaien Klusterrarekin lotutako zortzi entitate publiko eta pribatu biltzen ditu (NAGRIFOOD). Horien artean daude NUP eta Nafarroako Unibertsitatea, ikerketako erreferentziazko erakundeak baitira, eta sei enpresa: Alimentos Sanygran, Alinter Alimentación, Galar Foods, AN Taldea, Ingredalia (proiektuaren koordinatzailea) eta Productos Trevijano. Proiektu horrek Nafarroako Gobernuaren finantzaketa du I+Gko proiektu estrategikoetarako deialdiaren barruan (2024-2027).
Proiektuaren xedea da osasunari dagokionez balio erantsi handiko proteinak dituzten elikagaiak lortzea ahalbidetuko duten laboreak erabiltzea, beren funtzionalitatea, mantenugaien bioerabilgarritasuna eta digerigarritasuna direla eta, proteina kontzentratuekin, hidrolizatuekin eta hartzituekin gertatzen den bezala.
María José Beriáin Apesteguía eta Paloma Vírseda Chamorro katedratiko eta NUPeko ISFOOD Institutuko ikertzaileak dira talde zientifikoaren buru.