Duela gutxi Irlandako unibertsitate batzuetako bi ikertzailek hitz egin zuten Nafarroako Unibertsitate Publikoan (Brendan Ciarán Browne gatazken konponbideari buruzko irakaslea Dublingo Trinity Collegen eta Bana Abu Zuluf Maynootheko Unibertsitateko irakaslea). Irakasleek Arrosadiko campusean egindako nazioarteko zuzenbideari buruzko saio batean parte hartu zuten, eta Palestinako okupazioaren egungo egoera azaldu zuten. Errealitate hori ilustratzeko, Espainian lehen aldiz eman zen “We Will Remain” (2023) dokumentala. Judeako desertuan, Zisjordania okupatuan, mehatxatuta dauden Palestinako komunitate beduinoen erretratu intimoa eskaintzen du lanak.
Bana Abu Zuluf (ezk.) eta Brendan Ciarán Browne, Arrosadiko campusean.
Bashar Zarourrek zuzendua eta Brendan Ciarán Brownek produzitua, filmak lekukotasun zuzenen bidez erakusten du komunitate horiek erabakita daudela beren antzinako lurretan geratzera, baita horretarako kanporatuak izateko presioei eta legez kanpoko kokalekuen zabalpenari aurre egin behar badiete ere. Dokumentalak nazioarteko aitorpena jaso du, hainbat jaialditan saritu baitute, hala nola Ciné Palestine de Toulouse (Frantzia), eta baita eman ere, esaterako Zinema Palestinarrari buruzko Sardiniako Al Ard Jaialdia (Italia), Cinema for Peace (Libano) eta Afrikako Giza Eskubideei buruzko Jaialdia (Hegoafrika).
Yala Nafarroa Palestinarekin erakundearekin lankidetzan antolatu zen bisita, eta Foru Komunitateko zenbait lekutan eskainitako hitzaldi batzuen zikloaren barruan egin zen. NUPen egindako hitzaldian, Palestinaren egungo egoera aztertu zuten, eta bereziki erreparatu zieten Jerusalem aldirietako komunitate nomadei eragiten dieten okupazio-formei, eta testuinguru kolonialetan bakea eraikitzeari buruzko ikuspegi kritiko bat eskaini zuten.
“We Will Remain” dokumentalaren NUPeko emanaldiaren irudia.
Palestinan espezializatutako legelariak
Brendan Ciarán Browne (Belfast, Ipar Irlanda) justizia trantsizionaleko eta nazioarteko zuzenbideko alboko irakaslea izan da Al-Quds Unibertsitatean, Jerusalem okupatuan. Bere ikerketa-ibilbidea bakea eraikitzeko eredu liberalaren eraginean oinarritzen da, indarkeriak, justizia trantsizionalak eta lekualdatze behartuek finkatutako testuinguruetan, kokaleku-kolonialismoak irauten duen lekuetan, bereziki, Palestinan eta Ipar Irlandan. Hainbat liburu idatzi ditu, besteak beste, “Refugees & Forced Displacement during Northern Ireland 's Troubles: Untold Journeys” eta “Transitional Justice & Enforcing the Peace on Palestine”. Nazioarteko hedabideekin aritzen da lankidetzan, hala nola TRT World, Al Jazeera edo France 24, eta artikuluak argitaratu ditu hainbat egunkaritan, hala nola “The Irish Times”, “New Statesman”, “Globe Post” eta “Middle East Monitor”.
Bestalde, Bana Abu Zuluf, jatorriz Beit Sahour (Palestina) herrikoa, azterketa juridiko kritikoetan, ikuspegi dekolonialean eta erresistentzia palestinarrean espezializatuta dago, eta arreta berezia jartzen du lekualdaketa behartuen salaketan. Al-Quds Unibertsitateko Giza Eskubideen Katedrarekin lankidetzan jardun du, eta txostenak egin ditu Nazioarteko Auzitegi Penalarentzat. Gainera, Al-Quds Unibertsitateko Ikerketa Talde Aktiboenaren Saria eta Sungkonghoe Unibertsitateak (Hego Korea) emandako Ikertzaile Gazte Hoberenaren Saria jaso ditu.