Ramón Gonzalo Nafarroako Unibertsitate Publikoko (NUP) errektoreak eta Juan Luis García Unibertsitateko, Berrikuntzako eta Eraldaketa Digitaleko kontseilariak duela gutxi bisitatu zituzten Osasun Zientzien Fakultate berriaren eraikuntza-lanak. Nabarmendu zutenez, eraikin hori “funtsezkoa izanen da Nafarroako osasun ikerketan eta prestakuntzan”. Ibilbidean zehar, bi arduradunek egiaztatu zuten lanak ezarritako egutegiaren arabera egiten ari direla, eta uda honetan amaituko direla.
Osés Construcciónek eta Construcciones Mariezcurrenak osatutako enpresen aldi baterako elkartea egiten ari da obrak.
Osasun Zientzien Fakultate berriaren obretara egindako bisita.
Eraikuntza-lanak erritmo onean ari dira egiten, fatxadaren inguratzailearen bi herenak eginak baitaude. Akoia-zura, aluminiozko estaldurak eta beirazko errezel-hormak konbinatzen ditu, eta estetika eta eraginkortasuna orekatzen dituen diseinuan integratzen da. Bestalde, estalkia amaitu dute eta panel fotovoltaikoak jarri dituzte, eta haien konexioa egitea besterik ez da falta. Aldi berean, ingurunearen urbanizazioak aurrera jarraitzen du zoladura- eta lorezaintza-lanekin.
Barruan, obrak aurrera doaz zenbait fasetan. Zoladura zeramikoak eta erretxinazkoak instalatzen ari dira, pintura aplikatzeaz, zurezko estaldurak jartzeaz eta beirazko holtzen zatiketak muntatzeaz gain. Aldi berean, instalazio elektrikoak ere aurrera doaz kableak jarrita eta azken elementuak jarrita; klimatizazio-sistemek, berriz, azken osagaiak instalatzen jarraitzen dute solairu guztietan, eta orobat hodiak lotzen sotoko eta estalkiko gela teknikoetan.
Azken hilabeteetako mugarri garrantzitsuenetako bat zur ijeztuzko egituraren muntaia amaitzea izan da, energia positiboko eraikin horretan funtsezko elementua baita. Berokuntzan, hoztean, aireztapenean eta argiztapenean kontsumitzen duen energia kopuru bera sortzeko diseinatuta dago eraikina, eta intsinis pinuaren zur laminatuzko habe eta zutabeen egitura batean oinarritzen da. Egitura horrek 2.800 metro koadro estaltzen ditu solairu bakoitzeko, eta dorre-garabien bidez instalatu da.
García kontseilariaz eta Gonzalo errektoreaz gain, honako hauek ere parte hartu dute bisitan: Eva Perujuániz Nafarroako Gobernuaren Unibertsitateen zuzendari nagusia, Mar González NUPeko kudeatzailea, Mónica Cortiñas Kalitateko, Ekonomiako eta Estrategiako errektoreordea eta Bryaxis y Varquitectos estudioetako arkitekto taldea, bai eta Osés Construcción eta Construcciones Mariezcurrena enpresetako ordezkariak ere.
16.483 metro koadro, sotoan, beheko solairuan eta lau solairutan banatuta
Osasun Zientzien Fakultate berriak 16.483 metro koadroko azalera eraikia izanen du guztira, honela banatuta: beheko solairua, lau solairu eta sotoa, instalazio teknikoetarako eta aparkalekuetarako. Fakultate berriaren eraikuntzak 30,2 milioi euroko esleipen-aurrekontua eta 28 hilabeteko exekuzio-epea ditu, eta Bryaxis y Varquitectos estudioek diseinatu dute ikuspegi jasangarri eta funtzional batekin.
Eraikinaren banaketak unibertsitate eta osasun komunitatearen beharrei erantzuten die. Beheko solairuan sarbide nagusiak, ataria eta kafetegi-jantokia egonen dira, baita anatomiarako eremu bat ere, irakaskuntzarako gela batekin. Lehen, bigarren eta hirugarren solairuetan nagusiki egonen dira ikasgelak, laborategiak, informatikako eta mikroskopiako gelak, bulegoak, aldagelak eta komunak.
Gainera, lehenbiziko solairuan gradu areto bat izanen da, auditorium modukoa, erakusketa magistralak, tesien defentsak eta gradu eta master amaierako lanen aurkezpenak egiteko. Laugarren solairua etorkizuneko beharretarako prestatutako espazio gardena izanen da.