Magdalena Romera Ciria eta Gabriel Rubio-Navarro Nafarroako Unibertsitate Publikoko (NUP) irakasleak Gaztelania eta Literaturako irakasleentzako proposamen praktikoak jasotzen dituen liburu baten egileak dira. Argitalpenak tresna aplikagarriak eskaintzen ditu garapen profesional autonomorako ikuspegi erraz eta motibatzaile baten bidez, bai eta ikasgelako barne-ekintzailetza sustatzeko ere mikroberrikuntzaren eta ikerketaren bidez. Lanaren izenburua “Innovación e investigación en Lengua Castellana y Literatura” da, eta Síntesis argitaletxeak argitaratu du. Irakasleei, Bigarren Hezkuntzako Irakasletzako Unibertsitate Masterreko ikasleei, eta garapen profesionalean sakondu nahi duten irakasle hasiberriei zuzenduta dago.
Magdalena Romera eta Gabriel Rubio-Navarro NUPen, idatzi duten liburua aldean dutela.
Bestalde, liburuak aztergai ditu Gaztelania eta Literaturaren irakaskuntzako hezkuntza-berrikuntzaren oinarriak eta aplikazioak. Aztertutako gaien artean, aipatzekoak dira metodologia aktiboen sarrera, hala nola proiektuetan oinarritutako ikaskuntza, eta sekuentzia didaktikoak, bai eta gaitasun digitalaren garapena ere ingurune birtualetako baliabide eta jardueren bidez. Gainera, gida praktiko bat eskaintzen da ikastetxeko beharrak zein diren jakiteko eta testuingurura, curriculumera eta erabilgarri dauden materialetara egokitutako proposamen pedagogikoak diseinatzeko.
Bestalde, lanak hezkuntza-ikerketa jorratzen du. Alde horretatik, Magdalena Romerak eta Gabriel Rubio-Navarrok hezkuntza-ikerketa hizkuntzaren eta literaturaren esparruan gauzatzeko prozesua zehazten dute: galdera eta hipotesiak egitetik hasi eta emaitzak argitalpen zientifikoetan, kongresuetan eta plataforma digitaletan hedatzeraino. Orobat hainbat ikuspegi metodologiko aztertzen dira, hala nola kasu-azterketak, hurbilketa etnografikoak eta metodo esperimentalak, datu kuantitatibo eta kualitatiboen analisirako tresnekin batera. Orobat argitalpenak etika azpimarratzen du, baimen informatua, konfidentzialtasuna eta osotasun akademikoa bezalako alderdiak aztertzen baititu.
MALa egiteko gida
Lanak enfasi berezia jartzen du berrikuntzaren eta ikerketaren aplikazioan benetako hezkuntza-testuinguruetan. Horretarako, estrategia zehatzak jasotzen ditu proiektuak diseinatzeko eta garatzeko, eta horien artean aipatzekoak dira adibide praktikoak, hala nola irakurketa-plan instituzionalak eta ikastetxeko hizkuntza-proiektuak. Halaber, Gaztelania eta Literaturako master amaierako lana (TFM) egiteko gida zehatza eskaintzen du, gaiaren aukeraketatik hasi eta lanaren prestakuntza eta defentsara arte.
Atal bakoitzaren amaieran, laburpen bat, jarduera praktikoak eta autoebaluazio-galdetegiak daude bai ikaskuntza autonomoa bai aztertutako kontzeptuen aplikazio praktikoa errazteko diseinatuak.
Proposamen erraz eta praktikoa
Magdalena Romera eta Gabriel Rubio-Navarroren ustez, argitalpena tresna erabilgarria da irakasle hasiberrientzat eta esperientzia handiagoa dutenentzat, darabilen hizkuntza argiari eta klasean zuzenean aplika daitezkeen adibideei esker. Gainera, aipagarria da berrikuntza ikasgelatik sustatzen duelako, irakasleak ahalduntzen dituelako aldaketa esanguratsuak praktikara eramateko proiektu instituzional handien mende egon gabe, bere eragin-eremuan egin dezakeen horretan zentratzen baita, egileek azaltzen dutenez.
Liburuaren beste alderdi aipagarri bat da teoria eta praktika uztartzen dituela, ikerketa irakaskuntza hobetzeko tresna bat izan daitekeela azaltzen baitu. Orobat irakasleen eta hezkuntzako beste eragile batzuen arteko lankidetza sustatzen du, proposamen aberasgarriak eta ingurune akademikoan eragin positiboa dutenak sortzen baititu egileen iritzian.
Magdalena Romera I-COMMUNITAS Institutuko irakasle titular eta ikertzaileak eta Gabriel Rubio-Navarro irakasle elkartu eta Iruñeko Navarro Villoslada BHIko zuzendariak idatzitako lana eskuragarri dago paperean eta formatu digitalean.