Nafarroako Unibertsitate Publikoko (NUP) hiru egresatu, Irene Ibarz Vidador (Gizarte Laneko Gradua), Ainara Sánchez Liceaga eta Leire Huarte Barber (Bigarren Hezkuntzako Irakasletzako Unibertsitate Masterrekoak biak) saritu dituzte Nafarroako Gazteriaren Institutuak (NGI) deitutako GAL-MAL Sarien IV. edizioan. Nafarroako Gobernuko Etxebizitzako, Gazteriako eta Migrazio Politiketako Departamentuaren mendeko erakundea da Nafarroako Gazteriaren Institutua, eta gazteriaren arloan bertako ikerketa aitortzea eta bultzatzea du xede. Egileek honako gai hauek jorratu dituzte: gazteen delinkuentziaren kausak, ikasgela alternatiboak ezartzea praktika inklusibo gisa eta kide izatearen sentimendua migrante jatorriko ikasleen artean.
Ezkerretik eskuinera, lehenbiziko lerroan: Irene Ibarz, Ainara Sánchez Liceaga eta Leire Huarte diplomak aldean dituztela, epaimahaiaren eta Nafarroako Gazteriaren Institutuko arduradunen aurrean.
Sari horien bidez, ikerketaren arloko ibilbide profesional hasiberriei lagundu nahi zaie, eta inspirazioa eman nahi zaie gazteek Nafarroako gizartean eragin positiboa duten irtenbideak esploratzen jarrai dezaten. Edizio honetan erregistratu diren hamasei lanetatik, epaimahaiak, NGIko teknikariek osatuak, hiru saritu ditu, eta Gradu Amaierako Lanaren accesita eman gabe utzi du. Lehenbiziko sarietarako diru kopurua 1.500 eurokoa izan da, eta accesita, berriz, 500 eurokoa.
Gazteen delinkuentziaren kausak Nafarroan
GALen kategoriako lehen saria Irene Ibarz Vidadorrentzat izan da, ikuspegi zigortzailetik harago joan nahi duen ikerketagatik, zeinak Nafarroako gazteak delituak egitera bultzatzen dituen testuinguruari erreparatu eta prebentzioaren, laguntzaren eta gazteen eta bereziki 11 eta 13 urte artekoen orientazioaren alde egiten baitu.
Ikerketaren izenburua “Análisis de las causas de la delincuencia juvenil en Navarra desde la perspectiva del Trabajo Social” da, eta diziplina horretatik egindako ekarpena balioesten du, etengabeko laguntzan, estimulu positiboan, duintasunean, askatasunean eta berdintasunean oinarritutako esku-hartzeekin, gazteei berriro ez jausteko eta egoera ulertzeko tresnak emanen dizkieten konfiantzazko loturak garatzen lagunduz.
Sandra Siria Mendaza Soziologiako eta Gizarte Laneko Saileko irakasleak zuzendu du lana, eta haren kalitate teknikoa aitortu dute, zeinean zorroztasun kontzeptuala eta metodologikoa nabarmentzen baitira. Epaimahaiak bereziki baloratu ditu ezaugarri horiek.
Ikasgela alternatiboak eta alderantzizko inklusioa
Bestalde, Ainara Sánchez Liceagak MALen kategoriako lehen saria lortu du, D ereduko (euskara) institutu publiko bateko gela alternatibo batean alderantzizko inklusioaren ikuspegia nola aplikatzen den aztertzeagatik, eta nabarmentzekoa da eragin positiboa duela hezkuntza premia bereziak dituzten ikasleen curriculumaren garapenean, autonomian eta sozializazioan. Ikasgela horiek, hain zuzen ere, gurasoek beren seme-alabak Hezkuntza Bereziko ikastetxeetan ez bereizteko egindako borrokaren emaitza dira. Ikasgela alternatiboak Garapen Jasangarrirako Helburuekin (GJH) lerrokatuta daude. Helburu horiek hezkuntza inklusiboa, berdintasunekoa eta kalitatezkoa ziurtatzearen, bizitza osoan zehar gizaki guztientzako aukerak sustatzearen eta, azken batean, desberdintasun soziala murriztearen alde egiten dute. Ana Gurpegui Suescun Giza eta Hezkuntza Zientzien Saileko irakasleak zuzendu du lana.
Haren lana, “Floreciendo las prácticas inclusivas en los centros ordinarios de Navarra: analizando el aula alternativa modelo D de un instituto público de la Comarca de Pamplona”, kalitatezko hezkuntzari eta desberdintasunen murrizketari buruzko GJHen barruko analisi batekin, epaimahaiak hobekien puntuatutako alderdien parte bat izan da.
Kide izatearen sentimendua eta ikasle migranteak
Accesita, berriz, Leire Huarte Barberrek jaso du, bere ikerketagatik. Horrek agerian uzten du atzerriko jatorriko edo testuinguruko ikasleen artean kide izatearen sentimenduak duen garrantzia eta eskolako bizikidetzan duen eragina.
Lanak erakusten duenez, beste herrialde batzuetatik datozen ikasleen artean kide izatearen sentimendua nabarmen baxuagoa da, zeina nerabezaroan funtsezkoa baita, eta bertako ikasleek baino bazterketa eta eskola-jazarpen arrisku handiagoa dute. Era berean, gurasoak beste herrialde batzuetakoak dituzten ikasleen esperientzia aztertzen du, eta agerian uzten du haien kide izatearen mailak, atzerriko ikasleenak baino handiagoak izan arren, oraindik ere txikiagoak direla bertakoenak baino. Ondorio gisa, egileak planteatzen du kide izatearen sentimendua sustatzeak kulturarteko hezkuntza eskatzen duela, baita irakasleei kulturarteko gaitasunetan prestakuntza espezifikoa ematea ere.
“Análisis descriptivo y estadístico del sentimiento de pertenencia del alumnado” lanarekin, epaimahaiak hainbat elementu nabarmendu ditu, hala nola errealitatearen azterketa, jarduketa-eremua eta kontsultatutako iturriak.