Nafarroako Unibertsitate Publikoko (NUP) ISFOOD Institutuko  ikertzaile batzuek bermut nafar bat egin dute. Bermutak basaranak eta mihilua ditu, eta osagai horiek “anis zapore arina” ematen diote, egileen arabera. Nafarroako Mahastizaintzako eta Enologiako Estazioak (EVENA) utzitako garnatxa barietateko ardo gorri bat erabili da edari usaintsu hori egiteko.

Proiektu horretan, bi taldetako ikertzaileek hartu dute parte: Idoya Fernández Pan (Elikagaien Teknologia, Kontrola eta Segurtasuna-ALITEC) eta Montserrat Navarro Huidobro eta Iñigo Arozarena Martinicorena (Aurrerapenak Enologian eta Elikagaien Teknologietan-AENOLTEC), eta doktoretzako ikasle bat, Iranzu Zalba Larruy. Lanari ekin zioten Nafarroako bermut-kontsumitzaileei zuzendutako inkesta batekin, eta ehun lagunek baino gehiagok hartu zuten parte. Jasotako emaitzekin, kontsumitzaile nafarrek bermut batean espero zituzten osagai botanikoak eta ezaugarriak zein ziren zehaztu zuten.

Gero, ikerketa-taldea EVENArekin jarri zen harremanetan, bere ekimena aurkezteko eta zein oinarri-ardo erabil behar zuen zehazteko eta aukeratzeko. Zentroak bere upeltegi esperimentaleko urteko ardo gorri barietate-bakar garnatxa bat utzi zion ikerketa-taldeari. 

Ezkerretik eskuinera: Idoya Fernández Pan, Iranzu Zalba, Montserrat Navarro, Pilar García Granero eta Iñigo Arozarena, Nafarroako bermuta edalontzietan dutela.

Basalandareak Nafarroako biodibertsitatearen erakusgarri 

Bermuta prestatzeko prozesuan, ikerketa-lanaren lan-ildoa izan da “oinarri-ardoaren ezaugarriak eta egitura zaintzea eta Nafarroako biodibertsitatea erakutsiko zuten baratzeko basalandareak aukeratzea eta erabiltzea”, azaldu du Montserrat Navarrok.  Horretarako, prozesuaren xedea izan zen izan zitzatela bermutek “lurraldearekiko erreferentzia argiak, kolorea, oreka eta ardoaren eta osagai botanikoen arteko lotura ezaugarri zituztela” eta “edari horrek bereizgarri dituen zapore gozoaren eta garratzaren arteko oreka egokia” lortzea.  

Bermuta egiteko prozesua bukatu ondoren, lan-taldeak zenbait erreferentzia aurkeztu zituen, eta kontsumitzaileekin onarpen-dastaketa bat egin zen, eta horren ondorioz hiru erreferentzia onartu ziren.  “Basalandareen eta Nafarroako baratzeko patsen dosifikazioa da haien arteko desberdintasun nagusia, baita orburu- eta basaran-patsen presentzia ere”, adierazi du ikertzaileak.

Azkenik, basaranak eta mihilua zituen barietatea aukeratu zuten. “Patxarana egiten denean, anisa eta basaranak erabiltzen dira — azaldu du Idoya Fernández Panek—. Garatu dugun bermutari dagokionez, mihiluak anis-zapore arina ematen dio, anisaren beharrik gabe”.

Nafarroako bermuta “Sukaldariak eta zientzia: elkarrizketak eta dastaketak” zikloaren saio batean aurkeztu zen. Ekimenaren helburua da sukaldaritzako sorkuntzen azpian dauden zientzia eta teknologia erakustea. NUPeko dibulgazio zientifikoko proiektuen deialdian aukeratu zuten, eta Zientziaren, Berrikuntzaren eta Unibertsitateen Ministerioaren Zientziarako eta Teknologiarako Espainiako Fundazioaren (FECYT) laguntza izan zuen. Erakunde akademikoko Unibertsitate Proiekzioko, Kulturako eta Dibulgazioko Errektoreordetzak antolatu zuen saioa.  Saioa Iruñeko Baserriberri jatetxean egin zen, eta ikerketa-taldea eta Pilar García Granero enologo eta Basque Culinary Centerreko irakaslea (Masterra Sommelierrean eta Enomarketingean) han izan ziren.