Nafarroako Unibertsitate Publikoko (NUP) Hizkuntzen Goi Mailako Ikastegiak Cambridge English-en C2 Proficiency-ko azterketak (CPE) eginen ditu ikasturte honetatik aitzina. Proba hori bere katalogoan sartzen den lehen aldia da, eta horri esker ikasleek ingeleseko ziurtagiri gorena lortzeko aukera dute, zeinak hizkuntza ezin hobeki dakitela egiaztatzen baitu. Azterketa horretan izena emateko azken eguna urriaren 28a da eta proba azaroaren 30ean eginen da.
Horrez gain, ikastegiak Cambridgeko beste proba batzuk eskaintzen jarraitzen du zenbait mailatan. Cambridge B2 First azterketa 2024ko azaroaren 22an eta abenduaren 20an eginen da, formatu digitalean (Digital exam), eta abenduaren 14an, paperean (Paper-Based). Cambridge C1 Advanced mailan interesa dutenek abenduaren 13a (formatu digitalean) eta abenduaren 14a (paperean) aukeratzen ahalko dituzte.
NUPeko Hizkuntzen Goi Mailako Ikastegiko liburutegiaren ikuspegia.
Eskola-adinean dauden ikasleei zuzendutako azterketei dagokienez, Hizkuntzen Goi Mailako Ikastegiak abenduaren 13rako eta 20rako programatu ditu, hurrenez hurren, Cambridge A2 KET for Schools eta Cambridge B1 PET for Schools probak.
Azterketetarako matrikulazio-datak mailaren eta modalitatearen araberakoak dira. Inskripzio-prozesuari eta azterketen datei buruzko informazio guztia NUPeko Hizkuntzen Goi Mailako Ikastegiaren web-orrialdean dago kontsultatzeko.
Esperientzia hizkuntzak irakasten
NUPeko Hizkuntzen Goi Mailako Ikastegia duela 20 urte baino gehiago hasi zen hizkuntzak irakasten. Denbora horretan guztian, 30.000 ikasletik gora izan dira bertan. Gainera, akreditatutako zentro aztertzailea da honako hauen azterketa ofizialetarako: Cambridge eta TOEFL iBT (ingelesa), DELF-DALF (frantsesa), DELE (gaztelania) eta CCSE (nazionalitate espainiarra eskuratzeko) eta YCT, HSK eta HSKK (txinera).
Ikastaro eta zerbitzu horiei buruzko argibide guztiak kontsultatzeko daude NUPeko Hizkuntzen Goi Mailako Ikastegiaren webgunean, 948 169791 telefono-zenbakian edo mezu bat bidalita posta elektronikoko helbide honetara: centro.idiomas@unavarra.es.