Nafarroako Unibertsitate Publikoak (NUP), Aprender-Ikasi Katedraren eta I-COMMUNITAS Institutuaren bidez, prestakuntza-jardunaldi bat antolatu du heldu den urriaren 23an, asteazkenean, Klima-Aldaketaren kontrako Nazioarteko Egunaren bezperan. Jardunaldiaren xedea da fenomeno horren dimentsio eta ondorio sozialetan heztea. Topaketarako sarrera librea izanen da aldez aurretik “online” inskripzioa eginda, eta haren asmoa da irakasleei tresna didaktikoak ematea erronka horren ondorio sozialak ikasgeletan aztertzeko. Erronka horrek eragina du giza osasunean, elikatzeko segurtasunean, gizabanakoen mugikortasunean, bizitzeko bitartekoetan, desparekotasunean eta azpiegituretan. 

Jardunaldiaren izenburua “Klima-aldaketaren dimentsio eta ondorio sozialetan heztea” da, eta Jerónimo de Ayanz eraikineko hitzaldi-aretoan eginen da 9:00etatik 14:00etara. Ekitaldiaren xedea da ezagutzak eguneratzea eta irakasleek beren eguneroko irakaslanean integratuko dituzten adibide praktikoak eskaintzea.

IPCCren laguntzailea

Javier Martín Vide Bartzelonako Unibertsitateko Geografia Fisikoko katedradun, prezipitazioaren eta klima-aldaketaren probabilitate-analisietan espezialista eta IPCCren (Klima Aldaketari buruzko Gobernuarteko Taldea) bi txostenen berrikusleak hartuko du parte. Klima-aldaketak Espainian izandako inpaktu geografikoak aztertuko ditu ikertzaile honek. Cristina García Fernández Madrilgo Unibertsitate Konplutentseko irakasleak fenomeno horren ondorio sozialei buruz hitz eginen du; Álvaro Morote Seguido Valentziako Unibertsitateko irakasleak klima-aldaketaren dimentsio sozialei buruzko estrategia didaktikoak aurkeztuko ditu; eta, azkenik, Esther Sánchez Almodóvar Alacanteko Unibertsitateko irakasleak ikasleek gai horri buruz dituzten ikusmoldeak azalduko ditu. 

Lydia Delicado Moratalla doktore, Giza eta Hezkuntza Zientzien Saileko irakasle eta NUPeko I-COMMUNITAS institutuko ikertzaileak koordinatu du jardunaldia.