Juan Jesús Viscarret Garro Nafarroako Unibertsitate Publikoko (NUP) irakasleak “Tratado general de trabajo social, servicios sociales y política social” lanaren hiru liburukietako bat zuzendu du beste batzuekin batera. Gaiari buruzko erreferentziazko lan akademiko eta profesional bat da, gizarte-lanerako funtsezkoak diren hiru arloak biltzen baititu. 41 erakunde eta unibertsitatetako 159 espezialistak egin dute. Horien artean daude, Viscarretez gain, NUPeko bi irakasle, hots, María Jesús Úriz Pemán (I-COMMUNITAS Institutuko ikertzailea) eta Alberto Ballestero Izquierdo. Tirant Humanidadesek editatu du argitalpena Jorge Garcés Ferrer Valentziako Unibertsitateko katedradunaren zuzendaritzapean. Hirugarren liburukia gizarte-politikan zentratzen da, eta gaur egungo gizarte-erronkei erantzuteko politika publikoen analisi zorrotz eta zehatza eskaintzen du, hala nola genero-berdintasuna, urritasun energetikoa, migrazioak, zaintzen prekarizazioa, krisi ekonomikoak eta digitalizazioa.
Ezkerretik eskuinera, Alberto Jáuregui, Jorge Garcés, Ramón Gonzalo, M.ª Carmen Maeztu, Cristina Chasco eta Juan Jesús Viscarret, hiru liburukiekin, NUPen.
“Haren diziplinartekotasuna, aditu ugariren partaidetza eta gai garaikideei ematen dien garrantzia dela eta, ezinbesteko lana da bai profesionalentzat bai irakasle eta ikasleentzat —azaldu du Juan Jesús Viscarretek—. Argitalpenaren garrantzia, haren egitura ongi orekatua eta kontzeptu-argitasuna dela eta, lana epe luzean gizarte-zientzien esparruko erreferentzia bihurtuko dela dio”.
Aurkezpena NUPen
Lanak 2.200 orrialde ditu, eta gaur, astelehena, urriak 7, aurkeztu da Arrosadiko campusean. Han izan dira Ramón Gonzalo erakunde akademikoko errektorea, M.ª Carmen Maeztu Villafranca Nafarroako Gobernuaren Eskubide Sozialetako, Ekonomia Sozialeko eta Enpleguko Departamentuko kontseilaria, Cristina Chasco Chasco Nafarroako Gizarte Laneko Elkargo Profesionaleko idazkaria, Alberto Jáuregui Virto NUPeko Giza, Gizarte eta Hezkuntza Zientzien Fakultateko Gizarte Laneko dekanordea eta Jorge Garcés eta Juan Jesús Viscarret.
Tratatua hiru liburukitan dago banatuta, eta liburukiek modu orekatuan jorratzen dituzte gizarte-lana (edukiaren % 43), gizarte-zerbitzuak (% 27) eta gizarte-politika (% 30). Lanaren egilekide diren 150etik gora adituak Gizarte Laneko Gradua ematen duten Espainiako unibertsitateetakoak dira, bai eta diziplina horretako profesionalak ere.
Viscarret Garrok Ana Alcázar-Campos Granadako Unibertsitateko irakaslearekin batera koordinatu du hirugarren liburukia, gizarte-politikari buruzkoa da eta zenbait erakundetako 44 profesionalek egindako 18 kapitulu ditu. Liburukiak aztergai ditu politika publikoen bilakaera historikoa eta haien oinarrian dauden teoriak. Zenbait gai aztertzen dira, hala nola genero-berdintasuna, urritasun energetikoa, migrazioak eta eskubide ekonomiko, sozial eta kulturalak. Orobat aztergai dira politika arrakastatsuen adibideak eta gizarte garaikideek gizarte-babesari eta ongizate kolektiboari dagokienez dituzten desafioak.
“Gai emergenteen artean, nabarmentzekoak dira krisi ekonomikoen inpaktua, etxebizitza politikak talde kalteberentzat, antipunitibismoa eta generoaren eta migrazioaren arteko intersekzioa. Lanak aztergai ditu orobat zaintzen eta etxeko lanen prekarizazioa, eta arreta berezia eskaintzen die langile migratzaileei, arazo horiei heltzeko politika publiko berrien beharra azpimarratuz”, esan du Viscarretek.
Klima-aldaketatik adimen artifizialera
Lanaren lehen liburukia gizarte-lanari buruzkoa da, eta 65 espezialistaren ekarpenak biltzen ditu hogeita sei kapitulutan, zeinak zentratzen baitira diziplina horren bilakaera historikoan, etika profesionalean eta krisi eta larrialdi egoeretako esku-hartzean. Gai emergenteak ere lantzen ditu, hala nola arreta soziosanitarioaren humanizazioa, landa-inguruneetako lana eta klima-aldaketaren inpaktua. Gainera, animaliekin esku-hartze lagundua egiteko metodologietan sakontzen da, eta horrek lanbidea erronka sozial berrietara egokitzeko premia gero eta handiagoa indartzen du.
Bigarren liburukia gizarte-zerbitzuetan zentratzen da, eta berrogeita hamar espezialistaren partaidetzarekin egindako hemezortzi kapitulu ditu. Espezialistek aztergai dituzte gizarte-zerbitzuen kudeaketa-ereduak eta sistemaren gobernantza, eta arreta berezia eskaintzen zaio administrazio publikoak eta hirugarren sektoreak gizarte-ongizatea sortzeko egiten duten lanari. Orobat aztergai du digitalizazio gero eta handiagoa eta teknologien aplikazioa, hala nola adimen artifiziala gizarte-zerbitzuen prestazioa optimizatzeko. Nabarmendutako gaien artean daude talde kalteberenei emandako arreta eta sektore publikoaren eta sektore pribatuaren arteko lankidetza-modu berriak.
“Lan hau gaiaren aldetik duen zabaltasunagatik ez ezik, zorroztasun metodologikoagatik eta azalpenen argitasunagatik ere nabarmentzen da — dio Juan Jesús Viscarretek —. Koordinatzaileek eta laguntzaileek ikasleentzako eta profesionalentzako ulergarria den lan bat eskaintzea lortu dute, eta kontzeptu konplexuak ulertzea errazten du. Edukia trinkoa bada ere, hizkera argia da, eta horri esker ezagutza espezializatua erraz ulertzen da sakontasuna baztertu gabe”.
Ibilbide akademikoak
Jorge Garcés Ferrer katedraduna da tratatuaren zuzendaria, eta Valentziako Unibertsitateko Gizarte Ongizate-Poliongizateko Politikak ikertzen dituen erakunde publikoa zuzentzen du 2011z geroztik. 2014tik 2016ra, Georgetowneko Unibertsitateko (EEUU) Asturiasko Printzea Katedran egon zen. 2021ean, Espainiako Gobernuak Hezkuntza kontseilari izendatu zuen OCDEren eta UNESCOren aurrean, bai eta Parisen eta Estrasburgon egoitza duen Europako Kontseiluaren aurrean ere. Lau unibertsitatetako “doctor honoris causa” izendatu dute, hala nola Castellóko Jaume I Unibertsitatea eta Valentziako Unibertsitate Politeknikoa. Gizarte-laneko eta gizarte-zerbitzuetako jakintza-arloko jarduneko katedradunik zaharrena da.
Bestalde, Juan Jesús Viscarret Garro NUPeko irakasle titularra da, eta NUPeko ikerketa-talde batean egiten du lan (Efimec: Zientziaren Etika, Filosofia eta Metodologia). Gainera, Nafarroako Osasun Ikerketarako Institutuari dago atxikita (IdiSNA). Horrez gain, gizarte-laneko eta gazteriaren soziologiako hainbat argitalpenen egilea da.