Joan den ostiralean, irailak 20, “Zero hondar” jardunaldia egin zen Nafarroako Unibertsitate Publikoan (NUP). Jardunaldi horretan, sukaldeko bazterkinak sukaldaritzako elaborazio berritzailetan eraldatzeko desafioari heldu zioten elikagaien arloko berrogeita hamar ikaslek baino gehiagok. Ikasleak erakunde akademikoko Elikagaien Prozesu eta Produktuen Berrikuntzako Gradukoak eta Burlatako Lanbide Heziketako Ikastegi Integratuko ostalaritza adarreko Lanbide Heziketako (LH) graduetakoak ziren, eta sektoreko adituek proposatutako bost desafioetan lan egin zuten, zeinak proposatu baitziren ikasleak sentsibilizatzeko eta zero hondar sortzeko eta sukalde profesionaletan ahalik eta hondakin gutxien xahutzeko tresnetan prestatzeko.
“Zero hondar” jardunaldian parte hartu zuten ikasleak NUPen.
Ikasleek “kimchi” (elaborazio hartzitu bat) aurkeztu zuten sandia-hondarrak erabilita, tomate “panzanella” (entsalada) bat, ogi zaharrarekin egindako “noodles” batzuk (fideoak), brokoli-entsalada bat eta kafe hondarrekin egindako trufak. Ikasle-taldeek, diziplina anitzeko taldetan antolatuta, errezeta horiek garatu zituzten sektoreko profesionalen gidaritzapean. Talde bakoitzak bere elaborazioak aurkeztu zituen dastatze- eta eztabaida-formatu batean, eta nabarmendu zen sormenaren balioa eta baliabideak kudeatzeko efizientzia.
Elikagaien balio-kateko espezialistak
Jardunaldia NUPeko ISFOOD Institutuak, EIT Food-ek eta Mycelium Gastronomy-k antolatu zuten, eta azalpen laburrak eman ziren eta elikagaien balio-kateko zenbait arlotako espezialistek zuzendutako lantegi praktikoak egin ziren. Horietan, maila bakoitzeko arazoak aztertu ziren. Hala, honako hauek hartu zuten parte: María José Montilla, janaria alferrik ez galtzeko hartziduran aditua; Maite Muruzábal, landatik HORECA sektorerako (hotelak, jatetxeak eta kafetegiak) balio-katean zentratua; Elisabet Piggròs, kontsumitzailearen portaeran espezializatua; Paula Torán-Pereg, zeinak gastronomiako diziplina anitzeko lankidetzak aztertu baitzituen; eta Víctor Quintilla, jatetxeen kudeaketan aditua. Idoya Fernández Pan ISFOOD Institutuko ikertzaileak eta Estefanía Simón-Sasyk Mycelium Gastronomy-ko aholkulariak koordinatu zuten ekitaldia, eta Iranzu Zalba NUPeko doktoretza aurreko ikertzaileak eta Raquel Mestre Basque Culinary Center-eko irakasleak ere hartu zuten parte.
Taldeetako bi jarraibideak jasotzen desafioa hasi baino lehen.
Horrez gain, honako hauek hartu zuten parte ekimenean: NUPeko Nekazaritzako Ingeniaritzako eta Biozientzietako Goi Mailako Eskola Teknikoko (NIBGMET) eta Burlatako Lanbide Heziketako Ikastegi Integratuko irakasleak, EIT Food-eko teknikariak eta zenbait erakundetako ordezkariak, hala nola Nafarroako Gobernuko Landa Garapeneko eta Ingurumeneko Departamentua, GAN-NIK enpresa publikoa (Nafarroako Ingurumen Kudeaketa) eta AN Taldearen Fundazioa.
Jardunaldian, balioa eman zitzaion tresna praktikoak eta eraginkorrak emateari, sektorean janaria alferrik ez galtzeko eta hondarrik ez sortzeko, Garapen Jasangarrirako Helburuekin eta 2030 Agendarekin bat etorriz.