Nafarroako Unibertsitate Publikoak (NUP) 111 ikerketa-talde ditu 2024an, eta guztira 1.234 ikertzaile aritzen dira haietan, erakundearen Gobernu Kontseiluak onetsitako katalogoaren arabera. Oinarrizko unitate horietan antolatuta dago Unibertsitateko ikerketa, eta lau arlo handi hauetan banatuta: Ingeniaritza eta Teknologia (28 talde), Oinarrizko Zientziak eta Osasun Zientziak (37 talde), Zientzia Ekonomikoak eta Juridikoak (22 talde) eta Giza eta Gizarte Zientziak (24 talde).
Ikertzaile batzuk NUPeko laborategietako batean.
Ikerketa-taldeetan, lan-ildo bertsuak dituzten ikertzaileak elkartzen dira, talde-arduradun bat izaten dute, eta ikerketari laguntzeko deialdi publikoetara eta pribatuetara aurkezten dituzte proiektuak. Talde horien kalitatea, ibilbidea, bikaintasuna eta profila erabakigarriak dira finantzabidea lortzeko.
Ikerketa-taldeen kopuruak gora egin du denboran zehar: 1999an 74 talde zeuden, 2002an 88, 2005ean 98 eta 2012an 111 (2024arekin batera ikerketa-talde gehien izan dituen urtea). Era berean, ikertzaileak ere ugaritu egin dira azken urteetan: 2006an 827 ziren; gaur egun, berriz, 1.234.
Eguneratu da ikerketa-taldeen katalogoa
Ikerketa Batzordeak urtero eguneratzen du ikerketa-taldeen katalogoa datu-base batzuen bidez. Katalogoa onetsi ondoren, jendaurrean jartzen da, Unibertsitatearen ikertzeko ahalmena ezagutzera emateko.
Ikerketa-taldeen produktibitatea, barnekoa zein kanpokoa, ebaluatu eta baloratu egiten da etengabe, eta horren emaitzen mende egoten da barne-finantzaketa.