Marisa Rey-Henningsen Danimarkan bizi den itzultzaile, antropologo eta folklorista galiziarrak bere senarrarekin batera Nafarroako Unibertsitate Publikoari (NUP) dohaintzan eman zion funts bibliografiko eta dokumentala bisitatu du. Haren senarra Gustav Henningsen zen, sorginkeriaren fenomenoan munduko aditu nagusia, eta duela gutxi hil zen. Funts gehienak Artxibo Nagusian daude, non historialariaren alargunari harrera egin baitzioten Roldán Jimeno Aranguren erakunde akademikoko idazkari nagusiak eta Agirien Kudeaketaren eta Artxibo Nagusiaren Ataleko langileek, Mikel Etxegarai Garaikoetxea atalburua buru zutela. Han legatuarekin egin diren katalogazio-lanei buruzko informazioa jaso zuen.
Marisa Rey-Henningsen, NUPi dohaintzan emandako legatuko argazki katalogatu batzuei begira.
Henningsen-Rey funts dokumental eta bibliografikoa Gustav Henningsenen ikerketa-proiektuetarako sortutako, jasotako edo bildutako dokumentuek eta liburuek osatzen dute, bereziki Espainiako sorginkeriaren eta Inkisizioaren azterketarekin lotutakoek eta nazioarteko komunitate zientifikoan eragin nabarmena izan dutenek. Bere artxibo pribatuaren parte bat ere badago, ikerketa horiek ulertzen eta testuinguruan kokatzen laguntzen duena.
“Europako eta Espainiako hainbat erakunde publiko eta pribatuk agertu zuten interesa funts horiek jasotzeko, baina, aukerak aztertu ondoren, Henningsen-Rey senar-emazteek funts gehienak Nafarroako Unibertsitate Publikoari ematea erabaki zuten, eta parte txiki bat Galiziako Herriaren Museoari/Museo do Pobo Galegori eta Liburutegi Nazionalari”, azaldu zuen 2021ean Iñaki Montoya Ortigosa NUPeko Agirien Kudeaketaren eta Artxibo Nagusiaren Ataleko buruak Nafarroako Gobernuaren “Príncipe de Viana” aldizkari zientifikoaren separata batean , non dohaintzan emandako funtsen xehetasunak eta garrantzia azaltzen baitziren. Urtebete lehenago, aldizkari horretan bertan, Ignacio Panizo Santosek senar-emazte ikertzaileen ibilbidea eta lana ere azaldu zituen.
Henningsen-Rey senar-emazteak
Gustav Henningsen Folkloristika Nordikoko “Magister artium” zen Kopenhageko Unibertsitatean (1962), eta Filosofian doktorea unibertsitate berean, “The Witches’ Advocate” (Sorginen abokatua) doktoretza-tesiarekin. Hortik, “El abogado de las brujas. Brujería vasca eta Inquisición española” liburua sortu zen, 1980an ingelesez eta 1983an gaztelaniaz argitaratua.
Marisa Rey-Henningsen barrezka, NUPera egindako bisitan.
Danish Folklore Archives-en ikerketako zuzendaria izan zen 1965etik 2002ra bitarte. Sorginei eta Inkisizioari buruz egin zituen ikerketei esker, gai horietan munduan den espezialista hoberena da.
Marisa Rey-Henningsen emazteak gaztelaniara itzuli du bere lana, eta Europako herri-ipuinetan, eta bereziki galiziarretan eta daniarretan espezializatutako folklorista da. Hain zuzen ipuin galiziarrak izan zituen aztergai doktoretza-tesian.
NUPen dibulgazio-lana
Legatuaren harira, NUPek dibulgazio lana hasi zuen 2022an, Gustav Henningsen ikertzailearen “En busca de la verdad sobre la brujería. Los memoriales del inquisidor Salazar y otros documentos relevantes sobre el auto de fe de 1610” , liburua gaztelaniaz argitaratuta. Ordura arte ingelesez bakarrik zegoen eskuragarri. Lan horretan du Henningsen bildumak jatorria, daniar ikertzailea aitzindari izan zuten ikerketa-lerroen haritik idatzitako monografia sail bat. Bildumak askotariko gaiak argitaratzea du xede, hala nola sorginkeria, aztikeria, sineskeria, mugimendu heterodoxoak, heresia, erlijio disidenteen aurkako jazarpen inkisitoriala, zentsura eta kontrol soziala. Historiaren ikuspegitik ez ezik, beste arlo batzuetatik ere lantzen dira, gai horiek egokiak baitira beste zientzia sozial batzuetatik ikertzeko, adibidez, zuzenbidetik, ekonomiatik, antropologia kulturaletik, psikologiatik eta soziologiatik.
Aipatu bildumako lehen liburua aurten argitaratu da eta “Pueblos infernales y abogados de las brujas. Caza de brujas en Navarra (1608-1614)” du izenburua. Lu Ann Homza historialari estatubatuar eta Virginiako unibertsitate bateko irakasleak idatzi du (Estatu Batuak).