Nafarroako Unibertsitate Publikoak (NUP) Unibertsitatea Erakusteko Egunak eginen ditu: Iruñean otsailaren 3an, 10ean eta 17an, eta Tuteran otsailaren 24an, denak larunbatarekin. Saio horietan, NUPek 2024-2025 ikasturterako eskainiko dituen 27 graduen eta 8 gradu bikoitzen inguruko orientazio-hitzaldi espezifikoak emanen dira. Saioak goizez eginen dira eta aldez aurretik izena eman beharra dago, online. Datorren ikasturtean Unibertsitatean hasi nahi duten Batxilergoko eta Lanbide Heziketako ikasleentzat dira, bai eta haien gurasoentzat ere. Jardunaldien eduki osoa eta izena emateko estekak Unibertsitatearen webgunean daude.
Bigarren Hezkuntzako zenbait irakasle NUPen egindako hitzaldian.
Jakintza-arloen arabera antolatuta daude jardunaldiak. NUPeko titulazioei buruzko informazio-hitzaldiak emanen dira, eta bisitak eginen dira Unibertsitateko instalazioetara, bereziki laborategi eta lantegietara ingeniaritzen, osasunaren eta zientzien arloko graduen kasuan. Halaber, nahi dutenek aukera izanen dute Iruñeko Arrosadiko campuseko kirol-instalazioak eta Urkiak Unibertsitate Egoitza ikusteko.
Informazio horri buruzko xehetasunak, bai eta Unibertsitateak ikasleei eskaintzen dizkien graduei eta zerbitzu orokorrei buruzkoak ere, Nafarroako Bigarren Hezkuntzako ikastetxeetako irakasleekin NUPen Arrosadiko campusean egindako lan bilera batean zehaztu ziren (orientatzaile lanak egiten dituztenekin batez ere). NUPen izenean, Cristina Bayona Sáez Ikasleen Gaietarako, Enpleguko eta Ekintzailetzako errektoreordeak eta Inmaculada Farran Blanch Irakaskuntzako errektoreordeak hartu zuten parte. Urtero antolatzen da lan bilera hori, Nafarroako ikastetxeek Unibertsitatearen eskaintza akademikoaren eta berritasunen berri izan dezaten.
Unibertsitatea Erakusteko Egunak, zehatz-mehatz
Esan bezala, jardunaldiak otsailaren 3an hasiko dira (larunbata), Iruñean. Zehazki, Fernando Remacha aretoan (Arrosadiko campusa) Osasunaren arloko hiru titulazio hauei buruzko informazioa emanen da: Erizaintza, Medikuntza eta Psikologia; eta 12:00etan, titulazio hauei buruzkoa: Jarduera Fisikoaren eta Kirolaren Zientziak (JFKZ), Fisioterapia eta JFKZko eta Fisioterapiako Gradu Bikoitza. Hitzaldi honen ondoren, instalazioak bisitatuko dira.
Otsailaren 10ean (larunbata), 09:30ean, titulazio hauei buruzko informazioa emanen da: arlo juridikoko titulazioak (Lan Harremanak eta Giza Baliabideak —Lanbide Heziketako ikasleentzako 2+3 programa barne—, Zuzenbidea eta Enpresen Administrazioko eta Zuzendaritzako —EAZ— eta Zuzenbideko Gradu Bikoitza) eta Industriaren arloko titulazioak (Ingeniaritza Elektriko eta Elektronikoa, Ingeniaritza Mekanikoa, Industria Teknologien Ingeniaritza, Diseinu Mekanikoko Ingeniaritza eta Ingeniaritza Termikoko gradu dual berria). Lehenbiziko kasuan, saioak Fernando Remacha aretoan izanen dira (Sario eraikinean), eta, bigarrenean, 214 ikasgelan (Ikasgelategiko bigarren solairuan).
11:00etan, Informatikaren eta Telekomunikazioen arloko saioa hasiko da (Ingeniaritza Informatikoa, Telekomunikazioaren Teknologien Ingeniaritza, Ingeniaritza Biomedikoa eta Telekomunikazioaren Teknologien Ingeniaritzako eta Ingeniaritza Biomedikoko Gradu Bikoitza). 12:30ean, Ekonomiaren eta Enpresaren arloko aurkezpena hasiko da (EAZ —Lanbide Heziketako ikasleentzako 2+3 programa barne—, Ekonomia, EAZko eta Zuzenbideko Gradu Bikoitza, EAZko eta Datuen Zientziako Gradu Bikoitza eta EAZko eta Ekonomiako Gradu Bikoitzaren Nazioarteko Programa).
Jardunaldien hurrengo saioa otsailaren 17an izanen da (larunbata), Iruñeko Arrosadiko campusean. 09:30ean, saio hauek izanen dira: Zientzien arlokoak (Bioteknologia, Zientziak, Datuen Zientzia, Datuen Zientziako eta EAZko Gradu Bikoitza eta Datuen Zientziako eta Bioteknologiako Gradu Bikoitza) eta Giza eta Gizarte Zientzien arlokoak (Historia eta Ondarea, Gizarte Lana eta Soziologia Aplikatua). Ondoren, 12:00etan, arlo hauei buruzko hitzaldiak izanen dira: Hezkuntza (Haur Hezkuntzako Irakasletza, Lehen Hezkuntzako Irakasletza eta Haur Hezkuntzako Irakasletzako eta Lehen Hezkuntzako Irakasletzako Gradu Bikoitza) eta Nekazaritzako Elikagaiak (Nekazaritzako Elikagaien eta Landa Ingurunearen Ingeniaritza, Elikagaien Prozesu eta Produktuen Berrikuntza eta Nekazaritzako Elikagaien eta Landa Ingurunearen Ingeniaritzako eta Elikagaien Prozesu eta Produktuen Berrikuntzako Gradu Bikoitza).
Unibertsitatea Erakusteko Egunen azken saioa Tuteran eginen da, hurrengo larunbatean, hau da, otsailaren 24an. Erriberako hiriburuko campusak (Tarazonako etorbidea, z.g.) titulazio hauek ezagutu nahi dituzten pertsonak hartuko ditu: Fisioterapia, JFKZ eta JFKZko eta Fisioterapiako Gradu Bikoitza. Horiei buruzko hitzaldia 10:00etan hasiko da; 11:30ean, aldiz, Diseinu Mekanikoko Ingeniaritzari buruzkoa.
NUPeko graduen eskaintzari buruzko informazio guztia jasotzeko, jo Unibertsitatearen webgunera.