Nafarroako Unibertsitate Publikoko hamasei ikertzaile daude Ikerketa Zientifikoen Kontseilu Gorenak (CSIC) berriki argitaratu duen rankingean. Espainiako eta atzerriko erakundeetan ikertzen ari diren emakumezko 5.000 zientzialari espainiarrak sailkatzen dituen lehenbiziko aldia da. Sailkapena egiteko, Google Akademikoa izeneko datu-basean (Google Scholar ingelesez) ikertzaileek aditzera emandako profil pertsonal publikoaren adierazleetan oinarritu da, hots, eduki eta bibliografia zientifikoan espezializatutako bilaketa-motor horretan argitaratua dagoen informazioan.
Sailkapeneko hamasei ikertzaileetako bederatzi. Ezkerretik eskuinera, aurreko ilaran: Esther González, Mari Jose Beriain, Lucía Ramírez eta Ana Fernández; atzean, Marta Beranuy, Arantxa Villanueva, Idoia Labayen, Lola Ugarte eta Esperanza Bausela.
NUPeko ikertzaileen artean, honako hauek daude postu gorenetan: Idoia Labayen Goñi, Fisiologiako irakasle titularra eta IS-FOOD Institutuko ikertzailea (499. postuan); Edurne Barrenechea Tartas, Konputazioaren Zientziako eta Adimen Artifizialeko irakasle titularra eta ISC Institutuko ikertzailea (816.ean); eta Mercedes Sánchez García, Nekazaritzako Politika, Soziologia eta Ekonomiako katedraduna eta IS-FOOD Institutuko ikertzailea (908.ean). Horien atzetik, rakingeko ordenan, ikertzaile hauek ageri dira: Lucía Ramírez Nasto, Landare Ekoizpeneko katedraduna (IMAB); María José Beriáin Apesteguía, Nutrizioko eta Bromatologiako katedraduna (IS-FOOD); Esther González García, Landare Ekoizpeneko katedraduna (IMAB); Carmen Ancín Azpilicueta, Kimika Analitikoko katedraduna (INAMAT2); Blanca Marín Fernández, Erizaintzako irakaslea (hartua du erretiroa); Lola Ugarte Martínez, Estatistika eta Ikerketa Operatiboko katedraduna (INAMATA2); Inés Aguinaga Ontoso, Medikuntza Prebentiboko eta Osasun Publikoko irakasle titularra; Arantxa Villanueva Larre, Seinalearen Teoriako eta Komunikazioetako irakasle titularra (ISC); Esperanza Bausela Herreras, Bilakaeraren eta Hezkuntzaren Psikologiako kontratupeko doktorea; Ana Fernández Militino, Estatistika eta Ikerketa Operatiboko katedraduna (INAMAT); Leire Azpilicueta Fernández de las Heras, orain Monterreyko Ingeniaritzako eta Zientziako Eskola Teknologikoan dihardu (Mexiko); Cristina García Vivar, Erizaintzako unibertsitateko titularra; eta Marta Beranuy Fargues, Nortasuna, Ebaluazioa eta Tratamendu Psikologikoko irakasle doktore laguntzailea Osasun Zientzien Sailean.
CSICek jakinarazi duenez, ekainaren hasierako egunetan hartu ziren datuak. Sailkapen orokorraren lehenbiziko postuetan honako ikertzaile hauek daude: Judita Mamuzic, Fisika Korpuskularreko Institutukoa (UV-CSIC; CERN); María Moreno Llácer, Valentziako Unibertsitatekoa (UV); Carmen Albajar, Madrilgo Unibertsitate Autonomokoa (UAM); eta Lara Lloret Iglesias, Kantabriako Fisika Institutukoa (CSIC-UNICAN).
Isidro F. Aguillo sailkapenaren editore eta CSICen Politika eta Ondasun Publikoen Institutuko ikertzailearen esanean (IPP-CSIC), rankinga argitaratuz “ikusgarritasun handiago eman nahi zaio emakumezko ikertzaileek egindako lanari eta CSICen berdintasun- eta dibertsitate-politiken parte da hori. Gardentasunaren aldeko apustua da, eta gure ikertzaile emakumezkoen ekarpena ezagutzeko ahalegina”.