Leopoldo Alfonso, Olaia Urrutia eta José Antonio Mendizabal, guztiak ere Nafarroako Unibertsitate Publikoko (NUP) Agronomia, Bioteknologia eta Elikadura Sailekoak eta haren IS-FOOD ikerketa-institutuko kideak, Nekazaritzako Prentsaren 2019ko Sariarekin saritu dituzte. ITEA aldizkariak (Información Técnica Económica Agraria) 2019an aldizkarian argitaratutako artikuluen artean ezaugarri tekniko, zientifiko eta dibulgatibo hoberenak biltzen dituen artikuluari emandako saria da.
Saritutako artikuluaren izenburua hau da: “Conversión de las explotaciones de vacuno de leche a la producción de leche A2 ante una posible demanda del mercado: posibilidades e implicaciones”. Esnetegiek esne mota berezi bat ekoizteko egokitzapen prozesua aztertzen da. Esne mota horrek A2 motako ß-kaseina proteina dauka, zeinak digestiorako ezaugarri hobeak baititu, eta egokia izan daiteke esnearekiko intolerantziak dituzten pertsonentzat.
Ezkerretik eskuinera: Leopoldo Alfonso, Clara Marín (AIDAko burua), Olaia Urrutia eta José Antonio Mendizabal saria emateko ekitaldian.
ITEA aldizkaria eta saria nori eman erabakitzeko ardura duen epaimahaia
ITEA aldizkariak nekazaritzako elikagaien zientzien hainbat alderdiri buruzko artikuluak argitaratzen ditu, hiru arlo tematikorekin: Landare Ekoizpena, Animalia Ekoizpena eta Nekazaritzako Ekonomia. EJCR (Journal Citation Reports) aldizkari ospetsuak, Institute for Scientific Information (ISI) delakoak urtero argitaratzen duenak, aipatzen dituen nekazaritzaren arloko bi aldizkari espainiarretako bat da. ISIk munduko aldizkari zientifiko nagusien eragina eta garrantzia ebaluatzen ditu.
Elkarte eta erakunde hauetako zuzendariek osatu dute saria eman duen epaimahaia: Nekazaritza Garapenerako Lanbidearteko Elkartea (AIDA), ITEA aldizkaria, Aragoiko Nekazaritzako Elikagaien Ikerketarako eta Teknologiarako Zentroa (CITA), Zaragozako Agronomia Institutu Mediterraneoa (IAMZ), Dei Ikasgelako Estazio Esperimentala eta Ekologiako Institutu Piriniarra (CSIC). Saria emateko ekitaldia duela gutxi egin da Clara Marín Nekazaritza Garapenerako Lanbidearteko Elkarteko buruaren eskutik.