Seihileko honetan, Nafarroako ia 40 ikastetxetako Batxilergoko ikasleek Nafarroako Unibertsitate Publikoaren instalazioak bisitatuko dituzte, eta ezagutuko dute zer ikasketa eta zerbitzu eskainiko dituen NUPek 2020-2021 ikasturterako. Zehazki, gaur, urtarrilak 17, ostirala, ikastetxe hauetako ikasleak hurbildu dira Arrosadiko campusera eta Osasun Zientzien eraikinera: Nuestra Sra. del Puy (Lizarra), Marqués de Villena BHI (Martzilla), Irabia ikastetxea (Iruñea), Ribera del Arga BHI (Azkoien) eta “Lumbier LH” IIP (Irunberri). Atzo, berriz, ikastetxe hauetakoak etorri ziren: Calasanz Eskolapioak, Hijas de Jesús (Jesuitinak) eta Claret Larraona; Iruñean daude hirurak.
Escolapios ikastetxeko ikasleak
Informazio saioak aste honetan eta hurrengoan eginen dira, eta, horrez gain, baita martxoaren 12an eta 13an ere, Baluarte Biltzar Jauregi eta Auditorioan urtero egiten den Ikasleen eta Enpleguaren Europako Erakusketaren karietara, non, ohi den moduan, NUPek stand bat izanen baitu.
Unibertsitateak Nafarroako ikastetxe guztiei eskaintzen dien zerbitzu bat dira bisitak, eta Batxilergoko ikasleei zuzentzen zaizkie bereziki. Joan den 2018-2019 ikasturtean, aipatutako zikloko 2.154 ikaslek bisitatu zuten Nafarroako Unibertsitate Publikoa, Gazteriaren Etxeko 65 korrespontsalak barne hartuta.
Jesuitinas ikastetxeko ikasleak.
Fakultateek eta eskolek beren graduak azaltzen dituzte
Saioetan, NUPera etortzen diren ikasleei bertan egin daitezkeen 25 gradu eta 6 gradu bikoitzei buruzko informazioa ematen zaie: edukia, oro har, sartzeko eskatzen den profila, irtenbide profesionalak, eta beste datu interesgarri batzuk. Horretarako, fakultate eta eskolen araberako hitzaldietan banatzen dira, ikasleen lehentasunen arabera.
Claret Larraona ikastetxeko ikasleak.
Gainera, NUPek eskaintzen dituen aukerei buruzko informazioa ere ematen zaie: nazioarteko programak, hizkuntzadun graduak, espezializaziodun graduak, truke programak eta praktikak. Halaber, bisita labur bat egiten zaie Arrosadiko campuseko eta Osasun Zientzien Fakultateko instalazioetara.