Nafarroako Unibertsitate Publikoak (NUP), Trentoko Unibertsitatearekin eta Edition Reichenberger argitaletxearekin elkarlanean, Juan Pérez de Montalbán Urrezko Mendeko madrildar antzerkigilearen komedien bigarren liburukia argitaratu du. Trentoko Unibertsitateko Claudia Demattè ikertzaile eta irakaslea izan da liburukiaren zuzendari eta editorea, eta hauek dira bigarren argitalpen honetan bildutako obrak: “El valiente nazareno Sansón”, “El divino portugués, San Antonio de Padua” eta “El valiente más dichoso, don Pedro Guiral”.
Claudia Demattè arduratu da komedien bigarren liburukia aurkezteaz eta atarikoaren edizio kritikoa egiteaz. Bestalde, Ricardo Enguix Barber (Kaunaseko Unibertsitatea, Lituania) izan da “El valiente nazareno” lanaren edizio kritikoaren egilea (Sanson eta Dalila protagonista dituen deboziozko komedia); Juan Manuel Escudero Baztán (Errioxako Unibertsitatea), “El divino portugués” obrarena (San Antonio Paduakoaren bizitzari buruzkoa), eta, azkenik, Davinia Rodríguez Ortega (NUPeko ikertzaile eta irakaslea) arduratu da “El valiente más dichoso” lanaren edizio kritikoa egiteaz (gatibuei buruzko komedia, gertakari historiko batean oinarritua).
Juan Pérez de Montalbánen lanak bildu dituen liburuaren azala.
Juan Pérez de Montalbán
Juan Pérez de Montalbán idazlea eta antzerkigilea izan zen, Lope de Vegaren ikasle pribilegiatua eta Alfonso Pérez XVII. mendearen hasierako Madrilgo liburu-saltzaile garrantzitsuenetako baten semea. Montalbán hamazazpi urterekin hasi zen antzerkiak idazten, eta bizitza osoa jarraitu zuen batez beste hiruzpalau obra idazten urtero, egileak berak baieztatu zuenez. Ordura arte, bilduma horretan bertan argitaratu dira 1635eko lehen liburukiko hamabi komediak, eta, orain, 1638an hilondoan argitaratutako bigarren liburukiko lehen hirurak kaleratu dituzte (hamabi lan dira guztira, eta hirunaka argitaratuz joango dira).
Bilduma hori prestatzeko, Espainiako eta atzerriko zenbait unibertsitatetako ikertzaileak aritu dira lankidetzan. Nazioarteko proiektu batean parte hartzen dute denek; “Berreskuratutako madrildar idazle bat: Juan Pérez de Montalbán” du izena, zuzendaria Claudia Demattè da, eta aholkulariak, berriz, José María Díez Borque, Victor Dixon, José Manuel Lucía Megías, Maria Grazia Profeti eta Germán Vega García-Luengos. Montalbán proiektuak, bestalde, Madrilgo Udalaren eta “Miguel de Cervantes” Liburutegi Birtualaren laguntza jaso du, eta, azken horretan, eskuragarri dago jadanik egileari buruzko webgune bat.