Masterren kategoriako irabazlea. Ezkerretik eskuinera: Aránzazu Jurío Munárriz (Klara Von Neumann), Leyre Catalán Ros (Hipatia Alexandriakoa), Silvia Díaz Lucas (Hedy Lamarr), Marisol Gómez Fernández (Emmy Noëther), Ramón Gonzalo García (NUPeko errektorea), Amaia Garacochea Sáenz (masterren kategoriako irabazlea), Amaia Romero (kantautorea), Javier Remírez Apesteguía (Nafarroako Gobernuko lehenbiziko lehendakariordea), Alicia Martínez Ramírez (Sofia Kovalévskaya), Patricia Aranguren Garacochea (Marie Sklodowska-Curie), Edurne Barrenechea Tartas (Ada Lovelace) eta Gurutze Pérez Artieda (Emakumearen, Zientziaren eta Teknologiaren Katedrakoa).
Amaia Garacochea Sáenz NUPeko Industria Ingeniaritzako Masterraren tituludunak eta Marta Melero Frago NUPeko Telekomunikazioaren Teknologien Ingeniaritzako gradudunak irabazi dute Emakumeek Zientziaren eta Teknologiaren Arloetan egindako Ikasketa Amaierako Lanei buruzko Poster Lehiaketaren I. Edizioa. Sari gisa 900na € eskuratu dute NUPeko Emakumearen, Zientziaren eta Teknologiaren Katedrak antolatutako lehiaketan. Orobat, Carmen Carral Fernández eta Miren Bontigui Vallejos NUPeko egresatuek accesit bana lortu dute, eta, beraz, 450na €. Industria Ingeniaritzako Masterraren tituluduna da lehenbizikoa, eta Industria Teknologien Ingeniaritzako graduduna, bigarrena.
Lehiaketaren finala ostiralean izan zen, urriak 11, Iruñeko Arrosadiko campuseko Liburutegian, zerbitzu horren 25. urteurrena ospatzeko ekitaldian alegia (1994-2019). Honako hauek eman zituzten sariak: Ramón Gonzalo Garcíak (NUPeko errektoreak), Javier Remírez Apesteguíak (Nafarroako Gobernuko lehenbiziko lehendakariorde eta Lehendakaritzako, Berdintasuneko, Funtzio Publikoko eta Barneko kontseilariak), Gurutze Pérez Artiedak (NUPeko Emakumearen, Zientziaren eta Teknologiaren Katedraren zuzendariak) eta Amaia kantautoreak, zeina eskuzabaltasunez etorri baitzen ekitaldira aipatutako Katedrako jarduerei babesa ematera.
Ekitaldian izan ziren “Yo quiero ser científica” antzezlanaren egile eta aktore guztiak ere, Idoia San Martín Biurrun ez beste guztiak: Patricia Aranguren Garacochea, Edurne Barrenechea Tartas, Leyre Catalán Ros, Silvia Díaz Lucas, Marisol Gómez Fernández, Aránzazu Jurío Munárriz eta Alicia Martínez Ramírez. Hori dela-eta, zientzialari historikoak interpretatzeko erabiltzen dituzten jantziekin agertu ziren.
Saridunak, banaka-banaka
Graduen kategoriako irabazlea. Ezkerretik eskuinera: Aránzazu Jurío, Leyre Catalán, Silvia Díaz, Marisol Gómez, Ramón Gonzalo, Marta Melero Frago (graduen kategoriako irabazlea), Amaia Romero, Javier Remírez, Alicia Martínez, Patricia Aranguren, Edurne Barrenechea eta Gurutze Pérez Artieda.
Amaia Garacochea Sáenzek defendatutako master amaierako lana monitorizazio sistema autonomo bati buruzkoa da, zeina sorgailu termoelektriko baten bidez elikatzen denez leku bazterretan erabiltzeko modukoa baita. Teideko Mirador de la Fortalezako Sumendiak Monitorizatzeko Estazioan garatu du ingeniariak proiektua (Kanaria Uharteetan), eta Eugenio Gubía Villabona Ingeniaritza Elektriko eta Elektronikoaren eta Komunikazio Ingeniaritzaren Saileko irakasle eta NUPeko Smart Cities Institutuko ikertzaileak (ISC) zuzendu du, David Astrain Ulibarrena Ingeniaritzaren Saileko katedradun eta ISCko ikertzailearen laguntzaz.
Marta Melero Fragoren gradu amaierako lana telekomunikazio antena mota baten fabrikazioari buruzkoa da, zeinak teknologia konplexu samarra baitu eta maiztasun oso altuan baitabil (420 gigahertzean). Lanaren zuzendaria Jorge Teniente Vallinas da, Ingeniaritza Elektriko eta Elektronikoaren eta Komunikazio Ingeniaritzaren Saileko irakasle eta NUPeko Smart Cities Institutuko ikertzailea (ISC).
Masterren kategoriako accesit baten irabazlea. Ezkerretik eskuinera: Aránzazu Jurío, Leyre Catalán, Silvia Díaz, Marisol Gómez, Ramón Gonzalo, Carmen Carral Fernández (masterren kategoriako accesit baten irabazlea), Amaia Romero, Javier Remírez, Alicia Martínez, Patricia Aranguren, Edurne Barrenechea eta Gurutze Pérez Artieda.
Accesiten irabazleei dagokienez, Carmen Carral Fernándezek edari beroak saltzeko “vending” makinetarako konfiguragailu bati buruz egin du ikasketa amaierako lana, eta ekitaldian aurkeztu zuen hari buruzko posterra. Jesús María Pintor Borobia NUPeko Ingeniaritza Saileko irakasle eta NAITEC enpresako zuzendari zientifiko-teknologikoak zuzendu du, Javier Burguete Acarretaren laguntzaz.
Miren Bontigui Vallejos ingeniariak defendatuko gradu amaierako lanak aztertzen du sorgailu elektrikoen abiadura iragazteak nolako eragina duen turbina eolikoen egiturazko kargetan, eta Sarrigurengo Siemens Gamesa Renewable Energy enpresan garatu du (Nafarroan). Asier Díaz de Corcuera Martínez enpresa horretako ingeniaria eta Jorge Elso Torralba NUPeko Ingeniaritza Saileko irakaslea izan zituen zuzendari.
Emakumeek Zientziaren eta Teknologiaren Arloetan egindako Ikasketa Amaierako Lanei buruzko Poster Lehiaketaren I. Edizioan gradu edo master amaierako lana 2018-2019 ikasturtean defendatu duten NUPeko emakumezko ikasleek har zezaketen parte, betiere lanen edukia zientziaren eta teknologiaren esparrukoa bazen. 2019-2020 ikasturtean NUPeko masterretan matrikulatuta dauden emakumeek ere har zezaketen parte, beren gradu amaierako lana beste unibertsitate batean defendatu badute ere.
Emakume gehiago zientzian eta teknologian
Graduen kategoriako beste accesitaren irabazlea. Ezkerretik eskuinera: Aránzazu Jurío, Leyre Catalán, Silvia Díaz, Marisol Gómez, Ramón Gonzalo, Miren Bontigui Vallejos (graduen kategoriako accesit baten irabazlea), Marta Melero Frago (graduen kategoriako irabazlea), Amaia Romero, Javier Remírez, Alicia Martínez, Patricia Aranguren, Edurne Barrenechea eta Gurutze Pérez Artieda.
NUPek eta Nafarroako Gobernuak aurten sortu duten Emakumearen, Zientziaren eta Teknologiaren Katedrak emakumeek zientzian eta teknologian parte har dezaten bultzatu nahi du, emakume kopurua handiagotuz ZTIM titulazioetan (Zientzia, Teknologia, Ingeniaritza eta Matematika, ingelesezko sigletan), bai eta arlo horietako ikerketa sustatu eta haietan genero ikuspegia sartu ere.
Gurutze Pérez Artieda NUPeko Smart Cities Institutuko ikertzailea (ISC) da katedraren zuzendaria; Marisol Gómez Fernández Material Aurreratuen Institutuko ikertzailea (InaMat), berriz, zuzendariordea, eta Edurne Barrenechea Tartas Garapen Digitaleko errektoreorde eta ISC Institutuko ikertzailea, idazkaria.