Nafarroako Unibertsitate Publikoko Liburutegiak (NUP) bere sorreraren 25. urteurrena ospatu du (1994-2019), kulturaren eta dibulgazioaren arloko programa oso baten bidez. Urriaren 9tik 11ra bitartean egingo da bere instalazioetan, eta Unibertsitateko jakintzaren gune gisa duen garrantzia partekatu nahi du nafar gizartearekin. Horien artean daude “Jakina, NUPen muina” erakusketa eta mahai-inguruak, antzezlanak, kirola eta musika arratsaldez, hiru egunetan. Ekitaldien eskaintza osoa Unibertsitatearen webgunean dago kontsultatzeko. 

Zehazki, urriaren 9an  inauguratuko da, 12:00etan, aipatu oroigarrizko erakusketa. Erdizirkuluan jarritako zenbait panel izango ditu Ikasgelategira ematen duen Liburutegiko sarreran. Han eraikinaren eraikuntzari eta haren ondare bibliografikoari buruzko informazioa irakurtzen ahalko da. Eta arratsaldez mahai-inguru bat egingo da “Arkitektura eta jakintza” izenekoa. Honako hauek parte hartuko dute: Javier Sáenz Guerra (arkitektoa eta Francisco Javier Sáenz de Oizaren semea, zeinak sortu baitzuen Liburutegiko eraikina), Carmen Echeverría Arambillet (Liburutegiko zuzendaria), Arantza Mariskal Balerdi (Tabakalerako mediatekako arduraduna), Ángel García Sanz (Historia Garaikideko katedraduna eta NUPeko I-COMMUNITAS institutuko ikertzailea) eta Garazi Aizkorbe Escriche (Zuzenbidea graduatua NUPen). Egun horretan bertan, 20:00etan, NUPeko antzerki taldeak Dulce Chacónen “Algún amor que no mate” jokatuko du, eta Óscar Orzaiz arituko da zuzendari lanetan.

NUPeko liburutegia.

Bestalde, urriaren 10ean, osteguna, arratsaldean mikrokontakizunen lehiaketako sariak emango dira. Liburutegia erabiltzen duen unibertsitateko komunitateko kideei zuzenduta dago lehiaketa. Gero, “Osasun adimenduna” mahai-ingurua egingo da, eta honako hauek parte hartuko dute Maite Mendióroz (Navarrabiomedeko ikertzailea eta Osasunbideko neurologoa) eta Lucía Martínez Virto (Gizarte Laneko irakaslea eta NUPeko Gizarte Ekintzaren eta Berdintasunaren Arloko zuzendaria). Eguna amaitzeko,  zunbako “máster-class” bat egingo da ikasteko aretoan. 

Liburutegiaren 25. urteurrena ospatzeko, logotipo bat diseinatu da, El Colectivo enpresak egina. Liburutegiko bi fatxaden goiko aldeko leihoan dago (iparraldea eta marka), eta urteurrenarekin lotutako erakusketan eta materialen artean egongo da.

Amaiera ekitaldia, sarien emateaz, umoreaz eta hitzaldiaz lagundua

Unibertsitatearen 25. urteurrena ospatzeko logoa.

Oroigarrizko ekitaldia amaitzeko ekitaldia urriaren 11n hasiko da, 12:00etan. Alumni nabarmena saria emango zaio José Antonio Hoyos ingeniariari, Vicente Ferrer Fundazioarekin Indian egindako lanagatik eta Erakunde nabarmena saria ere emango da. Horrez gainera, jubilatutako langileen lana aitortuko da, eta aurten zendutako Unibertsitateko langileak oroituko dituzte.

Arratsaldez, 16:00etan, zientziarekin eta teknologiarekin lotutako Emakumezko Ikasleentzako Ikasketa Amaierako Lanen I. Lehiaketako posterrak aurkezten segituko dute. Ordubete geroago, 17:00etan, RISArchers-en emanaldi bat izango da. Zaragozako Unibertsitateko ikertzaileak dira, eta Zientziari buruzko monologo umoretsuak egiten dituzte. Jarraian, Emakumezko Ikasleentzako Ikasketa Amaierako Lanen I. Lehiaketaren eta “Emakume zientzialaria izan nahi dut” eskola-lehiaketaren sarien ematea egingo da. Honako hauek emango dituzte sariak: Ramón Gonzalo García (NUPeko errektorea), Javier Remírez Apesteguía (Nafarroako Gobernuko lehenbiziko lehendakariordea eta Lehendakaritzako, Berdintasuneko, Funtzio Publikoko eta Barneko kontseilaria) eta Gurutze Pérez Artieda (Emakumea, Zientzia eta Teknologia Katedraren zuzendaria).

Gero, 18:00etan, hitzaldi-eztabaida egingo da, “Emakumeak datorren munduan” izenburupean, eta honako hauek hartuko dute parte: Marta Macho-Stadler (EHUko irakaslea), María del Mar Rubio-Varas (NUPeko  INARBE institutuko ikertzailea eta irakaslea) eta Idoia Labayen Goñi (NUPeko irakaslea eta ikertzailea). Azkenik, 20:00etan, musika emanaldia izango da, eta Hegaz taldeak, 2017ko Campus Music Lehiaketaren irabazleak, joko du.

Zerbitzuak eta baliabideak

NUPeko Liburutegiko lanak 1992an hasi eta 1994an amaitu ziren. Instalazioak jendearentzat lehenbizikoz ireki zituztenean, Liburutegiak 140.079 liburu eta 1.890 aldizkari zituen, guztiak paperean. Egun, 443.137 liburu ditu (liburuen % 21 euskarri elektronikoan) eta 11.584 aldizkari (aldizkarien % 95,7 elektronikoak dira).

Bere zerbitzuei dagokienez, etxeko 62.480 mailegu kudeatzen zituen hasieran, eta 2018an, berriz, dokumentu elektronikoen 676.746 deskarga eta 58.265 mailegu. 1994an 402.617 bisita fisiko izan zituen eta 2018an, berriz, 857.776. Horiei web-aren bidezko 385.395 kontsulta gehitu zaizkie. Unibertsitateko Liburutegiaren mende dago Academica-e NUPeko biltegi instituzionala. Biltegiak 14.000 objektu digital baino gehiago eta 4 milioi deskarga baino gehiago ditu.

Bestalde, 2018an 1,4 milioi euro inbertitu zituzten baliabide elektronikoetan eta 243.226 paperezko baliabideetan. Horrez gainera, instalazioaren hasieran erabilera publikoko 16 ordenagailu izatetik egungo 200 ordenagailuetara pasa da.

Eraikin historikoa

Francisco Javier Sáenz de Oizak pertsona baten antzera irudikatu zuen campusa: errektoretza burua zen; sailak, besoak; ikasgelategia, hankak; eta liburutegia, berriz, muina edo bihotza.

Eraikina balio arkitektoniko handikoa da, eta nabarmentzekoa da Liburutegia dela campuseko ardatz zentrala, eta argia Liburutegi barrukoa. Estalkia puntatik puntara gurutzatzen duen sabai-leihoaren argiztapen zenitalez gain, lau puntu kardinaletatik sartzen da argi naturala liburutegi barnean: alboetako leihateetatik, campuseko espazio librerantz irekitzen den hegoaldeko leihate handitik eta iparraldeko ganga goratuko beirate handitik.