Irabazleak, finalistak eta epaimahaikideak, 2018an Planetarioan, “Hiru minutuan” lehiaketaren finala bukatu eta gero. Zutik, ezkerretik eskuinera: José David Fuentes (finalista), Berta Remírez (finalista), Daniel Cerezo (finalista), Raquel Luquin (epaimahaikidea), Nieves Gordón (epaimahaikidea), Joaquín Sevilla (epaimahaikidea), José Miguel Múgica (epaimahaiburua), Ana Berrade (epaimahaikidea), Helena Albelda (graduko irabazlea), Alfonso Urrizburu (finalista) eta Jon Larrea (finalista). Makurtuta (ezkerretik eskuinera): Paula Morentin (finalista), Daniel Chasco (finalista), Pilar Alvargonzález (finalista) eta Silvia Iglesias (masterreko irabazlea).
Nafarroako Unibertsitate Publikoak (NUP) “Hiru minutuan” lehiaketaren laugarren edizioa jarri du abian. Lehiaketaren helburua hau da: publiko ez-espezializatuari ikasketa amaierako lanen edukia 180 segundoan hobekien azaltzen duten graduko eta masterreko NUPeko ikasleak saritzea. Lehiaketan, 1.000 € emango dira saritan, eta eskaerak aurkezteko epea urriaren 4an bukatuko da.
Ekimena Unibertsitate Proiekzioko, Kulturako eta Dibulgazioko Errektoreordetzak bultzatu du, Kultura Zientifikoaren Unitatearen bitartez (KZU) eta Zientziaren, Berrikuntzaren eta Unibertsitateen Ministerioaren Zientziarako eta Teknologiarako Espainiako Fundazioaren (FECYT), Iruñeko Planetarioaren eta Nafarroako RNEren lankidetzarekin.
Lehiaketan, 1.000 euro banatuko dira saritan: 500, graduko kategorian; eta beste 500, masterreko kategorian. Deialdiaren oinarriak Nafarroako Unibertsitate Publikoaren webgunean daude kontsultatzeko.
Historia apur bat
“Tesiak hiru minutuan” lehiaketan du sorburua “Hiru minutuan” lehiaketak. Lehiaketa hura 2012an antolatu zuen lehenbiziko aldiz NUPek, eta doktoretzako ikasleek ere bazuten parte hartzeko aukera. Bi urte geroago, 2014an, lehiaketan parte hartzeko aukera eskaini zitzaien Campus Iberuseko lau unibertsitateetakoren batean (Errioxa, Lleida, Nafarroako Publikoa eta Zaragoza) prestakuntzan ari ziren ikertzaileei. Ekimenaren arrakastaren ondorioz, Campus Iberusek “Tesiak hiru minutuan” lehiaketa antolatu zuen doktoretza-tesi bat hobekien azaltzen duen ikaslea saritzeko.
Hori dela-eta, “Hiru minutuan” lehiaketa NUPeko graduko eta masterreko ikasleei zuzentzen zaie. Parte hartzeko betebehar bakarra dago: unibertsitateko ikasleek aurreko ikasturtean aurkeztu izana gradu edo master amaierako lanak. Parte-hartzaileek hiru minutuan laburbildu behar dute lan hori jendaurreko azalpen batean.
