Irabazlea, finalistak eta epaimahaiko kideak. Ezkerretik eskuinera: Antonio Gómez (lan saridunaren zuzendaria), Pilar Alvargonzález (finalista), Ana Munárriz (finalista), Teresa Velázquez (finalista), Emilio J. Domínguez (dekanoa), Borja García Izu (irabazlea), Ángel Luis Chocarro (dekanoa), María Ursúa (Elkargoko lehenengo kidea), Nuria Osés (dekanordea) eta Sandra Cavero (dekanordea). Laugarren finalista falta da: Laura Manso Sainz
Borja García Izuk irabazi du Nafarroako Ekonomisten Elkargoak ematen duen saria Nafarroako Unibertsitate Publikoko (NUP) Ekonomia eta Enpresa Zientzien Fakultatean 2017-2018 ikasturtean defendatutako Gradu Amaierako Lan Onenarentzat. Enpresen Administrazioko eta Zuzendaritzako (EAZ) eta Ekonomiako Gradu Bikoitza egin du Borja Garcíak, eta “Brexit: An analysis of UK trade flows” lanarekin irabazi du saria (“Brexit: Erresuma Batuko fluxu komertzialei buruzko analisi bat”). Gradu Amaierako Lanean (GAL) atera duen ondorioetako bat da Erresuma Batuak Europar Batasuneko kide izaten segitu izan balu “handitu egingo zukeela bolumen komertziala” (inportazioak batez ere), eta, beraz, EBtik ateratzeak “okertu egingo duela britainiarren ongizate maila”. Emaitza horiek ateratzeko, grabitate eredu ekonometriko bat erabili du ekonomistak. Antonio Gómez Gómez-Plana irakasleak zuzendu du EAZko GALa, hots, Ekonomia Saileko Nazioarteko Merkataritzako irakasle eta INARBE institutuko ikertzaileak (Institute for Advanced Research in Business and Economics). Sari gisa, 500 € eman dizkiote eta doako kuota bi urtez elkargoko kide izateko.
Epaimahaia hauek osatu dute: batetik, Nafarroako Ekonomisten Elkargoaren Gobernu Batzordeko Ángel Luis Chocarro Ábalos (dekanoa) eta María Ursúa Lasheras (Elkargoko lehenengo kidea) eta, bestetik, NUPeko Ekonomia eta Enpresa Zientzien Fakultateko Emilio J. Domínguez Irastorza (dekanoa) eta Sandra Cavero Brújula eta Nuria Osés Eraso (dekanordeak).
Finalera iritsi diren lanak
Sariak banatu baino lehen, Gradu Amaierako Lanen ahozko defentsa egin zuten beste lau finalistek, zehazki, hauek: batetik, Pilar Alvargonzález Muñoz (EAZko Nazioarteko Programako Gradua), “Transmission of inequality: the curbing effects of shared-custody law in Spain” izeneko lanagatik (“Berdintasunik ezaren transmisioa: zaintza partekatuari buruzko Espainiako legeak izan dituen ondorio mugatzaileak”, Rebeca Echávarri Aguinaga irakasleak zuzendua); bestetik, Laura Manso Sainz (EAZko Gradua), “El sentimiento del inversor: una aproximación desde los fondos de inversión” izeneko lanagatik (Elena Ferrer Zubiate eta Luis Muga Caperos irakasleek zuzendua); hirugarrenik, Ana Munárriz Iriarte (Ekonomiako Gradua), “Relaciones de preferencia: un estudio de la coherencia con indiferencia no transitiva” izeneko lanagatik (María Jesús Campión Arrastia eta Juan Ramón De Miguel Velasco irakasleek zuzendua); eta, laugarrenik, Teresa Velázquez Basterra (EAZko Gradua), “Claves del lanzamiento de ‘Super Veggie’ y recomendaciones para su estrategia de comunicación” izeneko lanagatik (Mónica Cortiñas Ugalde eta Ignacio García Lautre irakasleek zuzendua).
Nafarroako Ekonomisten Elkargoak finalista guztiei eskaini die doako kuota bi urtez elkargoko kide izateko.