Ezkerretik eskuinera: Santiago Reinoso Crespo (InaMat Institutuko ikertzailea), Leticia San Emeterio Garciandía (IS-FOOD Institutuko ikertzailea), Begoña Vicente Yenes (NUPeko Ikerketa Institutuetako Negozio Garapenaren zuzendaria), Ramón Gonzalo García (NUPeko Ikerketa errektoreordea), Veronica Binda (INARBE Institutuko ikertzailea), Maite Martínez Aldaya (IS-FOOD Institutuko ikertzailea) eta Borja Fernández-d’Arlas Bidegain (InaMat Institutuko ikertzailea). José María Algueta Miguel (ISC Institutuko ikertzailea) eta Benjamín René Callejas Bedregal (ISC Institutuko ikertzailea).

Zazpi ikertzaile hasi dira lanean Nafarroako Unibertsitate Publikoan (NUP) “la Caixa” Banku Fundazioak eta Nafarroako Kutxa Banku Fundazioak talentua erakartzeko emandako laguntzari esker. Urtebetez honako gai hauei buruzko proiektuak garatuko dituzte: gauzen Interneti buruzko proiektuak, hondakinen berrerabilpena, substantzia kimiko mota bat, jasangarritasuna ura erabiltzerakoan, larreen babesa, hiri adimendunak edo multinazionalak eta nazioartean dituzten baterako filialak.

Zehazki, Borja Fernández-d’Arlas Bidegainek eta Santiago Reinoso Crespok Material Aurreratuen Institutuan lan egingo dute (INAMAT); Verónica Bindak, INARBE institutuan (Institute for Advanced Research in Business and Economics); José María Algueta Miguelek eta Benjamín René Callejas Bedregalek, Smart Cities Institutuan (ISC); eta Maite Martínez Aldayak eta Leticia San Emeterio Garciandiak, Nekazaritza eta Elikagaien Katearen Berrikuntzarako eta Jasangarritasunerako Institutuan (IS-FOOD).

Talentua erakartzeko laguntzen helburua hau da: NUPeko ikerketa institutuetako ikerketa-jarduera indartzea eta finkatzea, egiten den ikerketa bikaintasunezkoa izan dadin. Deialdian parte hartzeko baldintzen artean, gutxienez ere bi urteko doktoretza ondoko esperientzia egiaztatua edukitzea eskatzen zen, eta nafar erakundetik kanpo doktoretza ondoko ikerketa-egonaldi bat egina izatea, sei hilabetez gutxienez.

InaMat Institutuko ikertzaileak

Borja Fernández-d’Arlas Bidegain (Hondarribia, Gipuzkoa, 1980) Euskal Herriko Unibertsitateko doktorea da, aurrez Zientzia Kimikoetan lizentziatu zen unibertsitate berean (Zientzia Makromolekularraren espezialitatea) eta Materialen Ingeniaritzan Ikasketa Aurreratuen Diploma eskuratu zuen. Ikertzaile horrek joan den urtean lortu zuen lehenbizikoz bere beka, eta bere proiektuarekin jarraituko du. Proiektuak artile- eta luma-hondakinek beren keratinak ateratzeko duten potentzialtasuna aztertzen du, eta baita keratina horietan oinarrituz plastiko biodegradagarrien garapena ere.

Bestalde, Santiago Reinoso Crespo (Antzuola, Gipuzkoa, 1976) Zientzia Kimikoetan lizentziatu zen (Oinarrizko Ez-organikoaren espezialitatea) Euskal Herriko Unibertsitatean (UPV/EHU), non gero Doktoretza bat lortu baitzuen aparteko sariarekin, Materialen Kimika programan. Aurten berriz ere beka eman diote bere proiektuari. Katalizatzaile molekular huts-hutsean ez-organikoen mota berriak aztertzen ditu CO2 balio erantsiko molekula organiko bihurtzeko argiak lagundutako txikiagotze prozesuen bidez.

INARBE Institutuko ikertzaileak

Veronica Bindak (Milan, Italia, 1980) Milango Bocconi Unibertsitateko Historia Ekonomiko eta Sozialeko doktore titulua lortu zuen. Espainiako eta Italiako enpresa handiei buruzko liburu baten eta nazioarteko aldizkarietako hainbat artikuluren egilea da. Bere proiektua multinazionalek Espainian duten jokamoldean eta haren ondorioetan jartzen du arreta. Helburu bikoitza du: alde batetik, enpresek XIX. mendetik ekonomian giltzarri diren sektore batzuetan sartzeko erabilitako estrategien mapa bat egitea; eta bestetik, nazioarteko “joint-ventures” izenekoen sorrera, jokamoldea eta desegitea zehaztu duten arrazoiak aztertzea (baterako filialak).

ISC Institutuko ikertzaileak

José María Algueta Miguelek (Hecho, Huesca, 1983) titulazio hauek egin zituen, hurrenez hurren, NUPen: Telekomunikazio Ingeniaritza, Komunikazioetako Ikerketarako Sarreraren Master Ofiziala eta doktoretza. ISC Institutuan, proiektu bat garatuko du, konponbide berritzaileak ezarri nahi dituena IoT ekosistemetan beharrezkoa den diseinu mikroelektronikoan (Gauzen Internet, ingelesezko sigletan), eta interes berezia jarriko du energia urritasun handiko inguruneetan.

Bestalde, Benjamín René Callejas Bedregalek (Arica, Txile, 1964) doktoretza egin zuen Konputazioaren Zientzietan, Pernambucoko Unibertsitate Federalean (Brasil), Tarapacáko Unibertsitatean (Arica, Txile) Konputazioko eta Informatikako Exekuzio Ingeniaritza eta Informatikako Magisterra egin eta gero. Ikertzaileak “pooling” (taldekatzea) izeneko funtzioari buruzko azterketak aplikatuko dizkie hiri adimendunen problemei. Arestian aipatu den funtzioak neurona sare sakonak dituzten makinen ikaskuntza prozesuaren algoritmoetan parte hartzen du parte (“deep learning”).

IS-FOOD Institutuko ikertzaileak

Maite Martínez Aldaya (Iruñea, 1978) Biologian eta Ingurumenean doktorea da Nafarroako Unibertsitatean, Europako Doktoretzaren Aipamenarekin, eta London School of Economics and Political Science Unibertsitateko (Erresuma Batua) Ingurumen Politikako eta Arauketako Masterra dauka. IS-FOOD Institutuan garatuko duen proiektuaren xedea hau da: nekazaritzako elikagaien sektorean ura erabiltzeko moduaren jasangarritasuna bereiz aztertu nahi du bere indarguneak eta ahulguneak identifikatuz, elementu horrekin lotutako arriskuei aurrea hartzeko. Aipatu sektore ekonomikoan urak dituen erabileren produktibitate ekonomiko eta sozialaren azterketarekin elkartuko da analisi hori.

Azkenik, Leticia San Emeterio Garciandiak (Madril, 1972) Biologia Zientzietako lizentziatura egin zuen Nafarroako Unibertsitatean, eta gai horretan, Botanika espezialitatean egin zuen doktoretza. Bere proiektuan Nafarroako Pirinioko paisaia tranpak aztertuko ditu,   ‘Brachypodium pinnatum’ gramineo natiboak inbaditutako larreen hedapena eta iraunkortasuna bultzatzen duten mekanismoetan oinarritzen baita.

Nafarroako ikerketarekin konprometituak

Programa hau "la Caixa" Gizarte Obrak eta Nafarroako Kutxa Fundazioak Nafarroako ikerketa gune nagusiekin 2017-2020 aldirako duten konpromisoari esker jarriko da abian. Denbora tarte horretan, bi fundazioek 6,4 milioi euroko ekarpen globala esleituko diete unibertsitateei. Esaterako: NUP, UNAV, Tuterako UHUN, CUN edo Navarrabiomed.