Adrián Serrano Hernández, NUPeko doktore berria.
“Bai kostuetan, bai igorpen kutsagarrietan nabarmen aurreztea eta zerbitzuaren kalitatean hobetzea” dakar logistikako jardueretan aritzen diren enpresen artean hitzartutako praktiken kudeaketa egokiak. Hala egiaztatu du Nafarroako Unibertsitate Publikoko (NUP) Smart Cities Institutuko (ISC) Adrián Serrano Hernández ikertzaileak (Almendralejo, Badajoz, 1990) erakunde akademikoan defendatu duen doktoretza-tesian. Efizientzian eta jasangarritasunean sakontze aldera, logistikako enpresen artean lankidetza horizontala sustatzearen aldeko apustua egiten du.
“Garraioak eragin handia du bai munduko ekonomiaren garapenean, bai airearen kutsaduran, bai lurraren berotzean —esan du Adrián Serranok—. Gainera, globalizazioaren eraginez lehia gero eta handiagoa denez, eta, epe laburragoekin eta kostu txikiagoekin lotuta, bezeroek zerbitzuaren kalitate gero eta handiagoa eskatzen dutenez, logistikako enpresak kudeaketa-estrategia berriak erabiltzera behartuak daude”.
Alde horretatik, logistikako enpresen arteko lankidetza horizontala alternatiba erreala da efizientzia eta jasangarritasuna lortzeko. “Kontzeptu hori definitu beharko bagenu, esango genuke bazkideen arteko edozein hitzarmen dela, esangabea edo ez, beren artean harreman bertikalik gabeko konpainia bat baino gehiago lotuko dituena, hots, hornitzaileen eta bezeroen arteko harremanik gabea, elkarrekiko konfiantzan eta konpromisoan oinarritua bientzat onuragarriak diren egoerak identifikatzeko eta ustiatzeko, mozkinak edo arriskuak partekatze aldera. Batera jardunda lortuko lituzketen mozkinak handiagoak lirateke bakoitzak bere aldetik jardunez lortuko lituzkeenak baino”, erantsi du.
Hori dela-eta, Adrián Hernándezek zenbait simulazio-eredu garatu zituen bere doktoretza-tesian, koalizio batek zer-nolako bilakaera duen jakiteko eta lankidetza horizontalak ekonomiaren eta ingurumenaren arloan duen eragina kalkulatzeko, eta konfiantzarekin lotutako problemak aztertu zituen. “Problema horiek oztopo handia dira gehiago aurrezteko. Beraz, politikak proposatzeko ardura dutenek xede izan behar dute merkataritzako harremanak ahalbidetzea maila guztietan: maila operazionalean, taktikoan eta estrategikoan”, esan du.
Erabaki garrantzitsuak hartzea
Javier Faulín Fajardok zuzendu du tesia (Estatistika, Matematika eta Informatika Saileko katedraduna eta NUPeko ISCko ikertzailea). Tesiaren egileak defendatzen du ikerketa operatiboko teknikak, eredu matematikoetan oinarritutakoak, “erabaki garrantzitsuak hartzen laguntzeko tresna bat” direla.
Halaber, Adrián Hernándezek zenbait optimizazio-eredu garatu zituen garraio-enpresen ingurumen-eragina ekonomikoki ebaluatzeko. “Ikuspegi tradizionalek ez dute baliorik gehiago, gure mundua itzulezinezko aldaketa klimatikorantz baitoa gas kutsagarrien igorpenagatik. Beraz, garraioaren ingurumen-eraginak barneratzeko prozesuak eta airearen kutsadurak operazio ekologikoagoak egitera behartuko lituzke erabakiak hartzen dituztenak. Nolanahi ere, arreta handiz jokatu behar da gai horretan. Ikertzaileak alderdi ekonomikoak bazter uzten ari dira ingurumen-alderdietan arreta jartzeko, hala nola igorpenen minimizazioan. Horregatik guztiagatik, helburu ez-ekonomikoa esplizituki kalkulatu beharko litzateke ingurumen-eraginak zuzen ebaluatzeko, eta barneratze kontzeptuak zeresan handiagoa izan beharko luke garraioaren arloko erabakiak hartzeko”, laburbildu du tesiaren egileak. Tesiak bikain “cum laude” lortu du.
Curriculum laburra
Adrián Serrano Enpresen Administrazioan eta Zuzendaritzan lizentziaduna da Extremadurako Unibertsitatean eta Masterra Ekonomia eta Finantza Analisian Nafarroako Unibertsitate Publikoan, non Ekonomiako doktoretza lortu baitu.
Ikertzaile gisa, hainbat artikulu argitaratu ditu garraioarekin eta logistikarekin eta optimizazio matematikoarekin eta simulazioarekin lotutako nazioarteko aldizkari zientifikoetan. Nazioko eta nazioarteko hogeitik gora biltzarretan ere parte hartu du.
Gainera, Nafarroako Unibertsitate Publikoko DEKL ikerketa taldekoa da (Datuak, Estatistika, Kalitatea eta Logistika). Ikerketa-egonaldiak ere egin ditu Bartzelonako Universidad Oberta de Catalunyan (UOC) eta BOKUn, Vienako Baliabide Naturalen eta Bizitzaren Zientzien Unibertsitatean (Austrian).