Irabazleak, finalistak eta epaimahaikideak Planetarioan, “Hiru minutuan” lehiaketaren finala bukatu eta gero. Zutik (ezkerretik eskuinera): José David Fuentes (finalista), Berta Remírez (finalista), Daniel Cerezo (finalista), Raquel Luquin (epaimahaikidea), Nieves Gordón (epaimahaikidea), Joaquín Sevilla (epaimahaikidea), José Miguel Múgica (epaimahaiburua), Ana Berrade (epaimahaikidea), Helena Albelda (graduko irabazlea), Alfonso Urrizburu (finalista) eta Jon Larrea (finalista). Makurtuta (ezkerretik eskuinera): Paula Morentin (finalista), Daniel Chasco (finalista), Pilar Alvargonzález (finalista) eta Silvia Iglesias (masterreko irabazlea).
Sara Iglesias Rey eta Helena Albelda Renet tituludunek irabazi dute Nafarroako Unibertsitate Publikoak (NUP) antolatutako “Hiru minutuan” lehiaketaren hirugarren edizioa, masterreko eta graduko/zikloko modalitateetan, hurrenez hurren. Hamar lagunek hartu dute parte azaroaren 22an (osteguna) Iruñeko Planetarioan jokatu den finalean. Parte-hartzaileek beren ikasketa amaierako lanaren edukia azaldu diote 180 segundoan publiko ez-espezializatuari. Irabazle bakoitzak 500 €-ko saria eskuratu du.
“Hiru minutuan” lehiaketa Zientziaren, Teknologiaren eta Berrikuntzaren XVIII. Asteko jardueretako bat da, eta Zientziarako eta Teknologiarako Espainiako Fundazioa (FECYT) - Zientziaren, Berrikuntzaren eta Unibertsitateen Ministerioaren laguntzarekin egiten da, Iruñeko Planetarioarekin eta Nafarroako RNErekin lankidetzan.
Energia berriztagarriei buruzko bi lan
Sara Iglesias Rey tituludunak (Marín, Pontevedra, 1995) publikoaren eta epaimahaiaren aurrean defendatu zuen bere master amaierako lana, zeinean teledetekzioa izan baitu aztergai, hots, “objektu baten informazioa sateliteen bidez eta objektuarekin kontakturik izan gabe eskuratzeko zientzia”. Proiektu horretan, Carlos López-Molina NUPeko Estatistika, Informatika eta Matematika Saileko irakaslea izan du gidari.
Lehiaketaren irabazleak, beren ikasketen amaierako lanen zuzendariekin. Ezkerretik eskuinera: María del Mar Rubio-Varas, Helena Albelda (graduko irabazlea), Carlos López-Molina eta Sara Iglesias (masterreko irabazlea).
Masterreko irabazlea Fisikan graduatu zen Santiago de Compostelako Unibertsitatean, eta, ondoren, Informazio Geografikoko Sistemetako eta Teledetekzioko Masterra egin zuen NUPen. Gaur egun Navarrabiomeden ari da lanean (NUPen eta Nafarroako Gobernuaren ikerketa biomedikoko bitariko zentroa), neuronen irudien prozesamenduari buruzko proiektu batean.
Bestalde, Helena Albelda Renetek (Iruñea, 1996) emakumeen ekintzailetzari buruzko gradu amaierako lana aurkeztu zuen. Ikerketa horrek María del Mar Rubio-Varas NUPeko Ekonomia Saileko irakasle eta INARBE (Institute for Advanced Research in Business and Economics) institutuko ikertzailea izan zuen zuzendari.
Graduko irabazleak Enpresen Administrazio eta Zuzendaritzako (EAZ) Graduaren Nazioarteko Programa egin du NUPen. Praktikak bukatu berri ditu Berola Consulting aholkularitza-enpresa nafarrean, eta abenduan nazioarteko praktika batzuk egiten hasiko da (Erasmus+ programaren barnean) Mälardalen Unibertsitatean, Västerås hirian (Suedia).
Finalistak
Irabazleez gain, beste zortzi lagun iritsi dira finalera. Masterreko kategorian, hauek izan dira: Daniel Chasco Hernández (Masterra Informazio Geografikoko Sistemetan eta Teledetekzioan), José David Fuentes Larez (Masterra Materialen eta Fabrikazioaren Ingeniaritzan), Jon Larrea Posadas (Masterra Bigarren Hezkuntzako Irakasletzan), Berta Remírez Moreno (Masterra Ingeniaritza Biomedikoan) eta Alfonso Urrizburu Santos (Masterra Industria Ingeniaritzan).
Bestalde, hauek izan dira graduko/zikloko finalistak: Pilar Alvargonzález Muñoz (Enpresen Administrazio eta Zuzendaritzako Graduaren Nazioarteko Programa), Daniel Cerezo San Martín (Telekomunikazio Teknologien Ingeniaritza) eta Paula Morentin Larrauri (Lehen Hezkuntzako Irakasletza).
Lehiaketaren epaimahaia
Javier Izu Otermin Nafarroako RNEko kazetariak aurkeztutako finalean, José Miguel Múgica Grijalba NUPi atxikitako Nafarroako Doktoretza Eskolako zuzendaria (NADOE) izan da epaimahaiburu, eta gainerako kideak honako hauek izan dira: Ana Berrade Adot, oratorian aditua; Nieves Gordón Arce, Iruñeko Planetarioaren Komunikazioko arduraduna eta Zientziaren Lagunen Elkartearen lehendakariordea; eta, NUPen aldetik, Raquel Luquin Bergareche, Zuzenbide Saileko irakaslea, eta Joaquín Sevilla Moróder, Jakintzaren Zabalkunderako arduraduna.
“Hiru minutuan” lehiaketa NUPeko Ikerketako Errektoreordetzak bultzatu du, Kultura Zientifikoaren Unitatearekin lankidetzan, eta Zientziarako eta Teknologiarako Espainiako Fundazioa (FECYT) - Zientziaren, Berrikuntzaren eta Unibertsitateen Ministerioaren finantzabidea jaso du.
“Hiru minutuan” lehiaketako finalisten hitzaldien bideoak Unibertsitatearen webgunean daude ikusteko.
