Urpeko igeriketaren praktika Berriozarko igerilekuan, Urpeko Jardueren Nafar Federazioak antolatua.
Nafarroako Unibertsitate Publikoak (NUP) Tuterako campusean ematen dituen bi gradu titulazioetako –Ingeniaritza Diseinu Mekanikoan eta Fisioterapia– zazpi ikaslek, Erizaintzako bi ikasle boluntariorekin batera, parte hartu dute ikasturte honetan desgaitasuna duten pertsonei egokitutako urpeko igeriketako proiektu batean. Proiektu horren bidez entrenamendu ariketak egiteko egokitutako materialak prestatu dituzte. Ekimen horretan lagundu du Urpeko Jardueren Nafar Federazioak (UJNF (FNDAS)), zeinak dibertsitate funtzionala duten Foru Erkidegoko sei elkarte gonbidatu baititu, ikasleek diseinatutako tresnak proba ditzaten elkarteetako 32 kidek.
“Urpeko igeriketako jarduerak eginez desgaitasuna duten pertsonek igerilekuaz goza dezakete, non lurrean gainditzeko zailak diren mugikortasuna oztopoak hautsi baititzakete —azaldu du Tomás Ballesteros Egüés ekimenaren sustatzaile, Ingeniaritza Saileko irakasle eta Ergonomia irakasgaiaren arduradunak. Diseinu Mekanikoko Ingeniaritzako 4. ikasmailako ikasleei eskolak ematen dizkie—. Osasun Zientzien Fakultateko ikasleak —Erizaintzakoak Iruñean eta Fisioterapiakoak Tuteran— lankidetzan aritu dira Diseinu Mekanikoko Ingeniaritzakoekin bai entrenamendu fisikorako bai psikikorako baliagarriak liratekeen materialak garatzen”.
Material merkeak abiapuntu
Proiektu horren abiapuntua izan da Leire Tirapu Albisua Fisioterapia ikasleak "Hemiplegia duten gaixoei egokitutako urpeko igeriketari eta hidroterapiari" buruz egin duen gradu amaierako lana. Ana Insausti Serrano Osasun Zientzien Saileko irakaslea eta Osasun Zientzien Fakultateko dekanordea izan da Lanaren zuzendaria. Behin gaitzak eta konponbideak identifikatu ondoren, Diseinu Mekanikoko Ingeniaritzako sei ikaslek (Alfredo Iranzu Balbuena, Gonzalo Iranzu Balbuena, Adrián Jiménez Loygorri, Raquel Martínez Hoyos, Pedro Jesús Muerza Arto eta Judit Ostiz Poyo) ariketak egiteko beharrezkoak diren materialak diseinatu eta fabrikatu dituzte. Jada existitzen diren objektuak erabili dituzte horretarako, eta objektu horiei Ergonomia klasean garatutako berrikuntzak egokitu dizkiete. “Muga bakarra elementu merkeak erabiltzea zen”, esan du Tomás Ballesterosek. Hala, pilotak aldatu dituzte flotagarritasun ia neutroa izan dezaten, eta, imanak dituzten plater batzuen bidez, zenbait garaieratan jar daitezen. Horretarako arintasun ariketen kono bat edo urpeko panel bat (puzzle modura) aldatu dituzte.
Proiektuko hurrengo urratsa izan da dibertsitate funtzionala zuten pertsonek aipatu materialak probatzea. Hala gertatu da Berriozarko Kiroldegiko igerileku estalian. Han entrenatzen du Urpeko Jardueren Nafar Federazioak. Sei elkarte parte-hartzaileetako 32 kide joan dira hara. Hauek dira: ADEMNA (Nafarroako Esklerosi Anizkoitzaren Elkartea), ANA (Autismoaren Nafar Elkartea), Anfas, Ibili Elkartea, Cordovillako Infanta Elena Zentroa eta Iruñeko El Molino Hezkuntza Bereziko Ikastetxea. Saioetan, boluntario aritu dira Erizaintzako bi ikasle: Ana Ramos Ruiz eta Adriana Sagüés Curini.
Urpeko Jardueren Nafar Federazioak NUPeko Tuterako campuseko ikasleek diseinatutako materialen erabilerari buruzko eskuliburuak egiteko interesa du dibertsitate funtzionala duten pertsonekin lan egiten duten erakundeek erabil ditzaten.