NUPeko taldearen "Musuak" antzezlanaren lehen emanaldiaren irudi bat
Bost unibertsitatek parte hartuko dute, apirilaren 13tik 18ra, Nafarroako Unibertsitate Publikoko Unibertsitate Antzerkiaren VIII. Erakustaldian. NUPeko Unibertsitate Proiekziorako errektoreordetzak antolatu du lehiaketa, Iturramako Civivoxen egingo da eta sarrerak euro 1 balio du. Antzerki taldeak unibertsitate hauetakoak dira: Vigoko Unibertsitatea, Euskal Herriko Unibertsitatea, zeinak bi talderekin parte hartuko baitu, Burgosko Unibertsitatea, Lleidako Unibertsitatea eta Nafarroako Unibertsitate Publikoa. Lehiaketaren programa osoa NUPen web-orrialdean dago ikusgai.
NUPeko antzerki taldeak "Musuak" antzezlana aurkeztuko du. Carles Alberolak eta Roberto Garcíak idatzitako komedian giza harremanekin, ezinezko maitasunekin edo perfektuegiak diren bikoteekin lotutako hainbat eszena aurkezten zaizkie ikusleei. Eszena guztietan Camilo Sesto, Mocedades edota Mari Triniren abestiak abesten dira, egoera bakoitzaren erromantizismoa eta komikotasuna nabarmentzeko. Óscar Orzaizek zuzentzen du taldea, eta apirilaren 18an emango dio amaiera lehiaketari bi emanaldiren bidez. Emanaldiak 18:00etan eta 20:00etan hasiko dira.
Ourenseko (Vigoko Unibertsitatea) Unibertsitate Antzerki Gelaren Maricastaña taldeak emango dio hasiera erakustaldiari astelehenean, apirilak 13. Taldeak “III” eszenaratuko du, William Shakespeareren “Ricardo III.a” lanaren egokitzapen bat. Emanaldia 19:30ean hasiko da. Euskal Herriko Unibertsitateko Arabako campuseko T-Canto EHUKo Teatroa taldeak “Kolorea pentsatzen, soinua pentsatzen” antzeztuko du asteartean, ordu berean. Bestalde, Euskal Herriko Unibertsitateko Gipuzkoako campuseko antzerki taldeak "Antzerki menua: lehenengo platera: Cortazar unibertsoa. Bigarren platera: Intolerantzia". antzezlana eszenaratuko du asteazkenean, apirilak 15.
NUPeko Unibertsitate Antzerkiaren VIII. Erakustaldiaren programari jarraiki "Demokraziaren aurka" antzezlana jokatuko du ostegunean Burgosko Unibertsitateko Antzerki Gelako Talde Egonkorrak, eta ostiralean, berriz, "Georgia proiektua" antzezlana eszenaratuko du Lleidako Unibertsitateko Espai de Teatre-k. NUPeko antzerki taldeak emango dio amaiera larunbatean lehiaketari "Musuak" antzezlanaren bidez. Taldeak duela gutxi jokatu du lehen aldiz antzezlana.