Nafarroako Unibertsitate Publikoak 2014-15 ikasturterako aurreinskripzioa egiteko beste epe bat ireki du ikaspostuak bete gabe dituzten Gradu titulazioetarako. Eskaerak eskabide baten bidez aurkeztu behar dira Arrosadiko campuseko Administrazio eta Kudeaketa eraikinean, heldu den irailaren 4ra bitartean, eta onartuen zerrenda hilaren 10ean jakinaraziko da.

Ikaspostuak bete gabe dituzten titulazioak honako hauek dira: Telekomunikazio Teknologietako Ingeniaritzako Gradua, Diseinu Mekanikoko Ingeniaritza Gradua (Tuterako campusa), Nekazaritzako Elikagaien eta Landa Ingurunearen Ingeniaritzako Gradua, Ingeniaritza Informatikoko Gradua eta Ingeniaritza Elektriko eta Elektronikoko Gradua. Interesa dutenek aukera dute eskabidean gehienez ere lau aukera jartzeko, lehentasun hurrenkeran.

Orain eskaintzen diren ikaspostuak heldu den ikasturteko gradu titulazioetako matrikulazio prozesuan kokatzen dira. Sarbide nota nahikoa izan ez dutelako, beste titulazio batzuetan ikasposturik lortu ez duten ikasleei zuzenduta daude. Gainera, deialdi honetan irekitzen den beste aukera bat da itxaron-zerrenda bat sortzea, azken orduko hutsak sor daitezkeen titulazioetan sartu ahal izateko.

Onartutakoen zerrenda irailaren 10ean jakinaraziko da, eta matrikula hilabete beraren 11 eta 12an egin behar da. Graduei, aurkeztu beharreko dokumentazioari eta emateko epeei buruzko informazio guztia kontsultatzeko dago Unibertsitatearen webgunean.