Virseda (ezk.) eta Pintor errektoreordeak, Bigarren Hezkuntzako irakasleei egindako aurkezpenean.

2013-2014 ikasturtean Gradu ikasketak Nafarroako Unibertsitate Publikoan hasi nahi dituztenek ekainean egingo dute aurreinskripzioa aurten. Arrazoi ekonomikoak direla-eta, kendu egin da azken urteotan apirilean egiten zen aurreinskripzio aurreratuaren astea.

Nafarroako Unibertsitate Publikoak 2013-2014 ikasturterako daukan irakaskuntza-eskaintzaren aurkezpenean jakinarazi zien informazioa Nafarroako Bigarren Hezkuntzako ikastetxeetako zuzendari, irakasle eta orientatzaileei. Lan-saio hartan parte hartu zuten Paloma Vírseda Chamorro (Ikasleak) eta Jesús María Pintor Borobiak (Irakaskuntza).

Orain arte, Nafarroako Unibertsitate Publikoak aurreinskripzio aurreratua egiteko aste bat antolatzen zuen urtero apirilean, irailean Gradu ikasketak hasteko asmoa zutenen eskaerak jasotzeko. Aurreinskripzio horrek ikaspostu bat lortzerakoan ohiko inskripzioarekiko lehentasunik ezartzen ez bazuen ere –Espainiako unibertsitate publiko guztietarako arautegiak xedatutakoaren arabera ekainean egiten da ohiko inskpripzioa– , etorkizuneko unibertsitate ikasleen orientazioa aurrerapenez jakiteko modua ematen zuen. Baldintza batzuk bete behar dira onartua izateko. Esaterako, Unibertsitatean Sartzeko Probak gainditzea Batxilergoaren bidea aukeratu dutenentzat. Proba horiek (Hautaprobak deitzen direnak) ekain hasieran egiten dira.

Aurreinskripzio aurreratua kudeatzen duen aplikazio informatikoaren kostu ekonomiko handia dela-eta, Unibertsitateak apirileko aurreinskripzio aurreratua kendu du eta ekaineko ohiko inskripzioak lehen bezala jarraituko du (eta uztailean, ohiz kanpokoak) Nafarroako Unibertsitate Publikoan Gradu titulu bat egin nahi dutenentzat.

Hain zuzen, dauden Gradu titulazioak ezagutarazteko, Nafarroako Unibertsitate Publikoak Ateak Zabaltzeko hiru egun antolatu ditu hurrengo udaberrirako: bat, Tuterako campusean, apirilaren 13an, larunbatean; eta bi, Iruñeko campusean, apirilaren 20 eta 27an, biak larunbatean. Egun horietan orientazio-hitzaldiak emango dira 2013-2014 ikasturtean emango diren 18 Graduei eta bi Gradu bikoitzei buruz. Hurrengo ikasturtean unibertsitatean ikasi nahi dutenei zuzenduak daude egunak.

Bi campusetako Ateak Zabaltzeko Egunak

Ikastegi eta titulazioek antolatu dituzte Ateak Zabaltzeko Egunak, eta bai etorkizuneko unibertsitateko ikasle eta bai gurasoek parte hartzen ahalko dute. Halaber, ikasketei buruzko informazio-hitzaldiak eta unibertsitateko instalazioetara bisitak egiten dira egun horietan, bereziki laborategi eta lantegietara, ingeniaritzen eta osasun arloko ikasketei dagokienez. Halaber, horretarako interesa daukatenek kirol instalazioak eta Urkiak Unibertsitate Egoitza ere ikusi ahalko dituzte.

Zehazki, apirilaren 13an, larunbatean, Tuterako campuseko ekitaldiak (Tarazonako etorbidea, z/g) Erriberako hiriburuan ematen diren bi titulazio hauek ezagutzeko interesdunak hartuko ditu: Fisioterapia eta Diseinu Mekanikoko Ingeniaritza.

Egun hauek aste bat geroago edukiko dute segida, apirilaren 20an, Iruñeko campusean. Egun hartan titulazio hauei buruzko informazio-saioak izango dira: Osasun Ikasketen Unibertsitate Eskolako titulazioei buruz (Erizaintza eta Fisioterapia), Zientzia Juridikoen Fakultateko titulazioei buruz (Zuzenbidea, Lan Harremanak eta Giza Baliabidea eta Zuzenbideko eta Enpresen Administrazio eta Zuzendaritzako gradu bikoitza), Giza eta Gizarte Zientzien Fakultatekoei buruz (Haur Hezkuntzako irakaslea, Lehen Hezkuntzako irakaslea, Gizarte Lana eta Soziologia Aplikatua) eta Ekonomia eta Enpresa Zientzien Fakultatekoei buruz (Ekonomia, Enpresen Administrazio eta Zuzendaritza, Zuzenbidea eta Enpresen Administrazio eta Zuzendaritzaren gradu bikoitza, Ekonomia eta Enpresen Administrazio eta Zuzendaritzaren nazioarteko programa elebidunak, eta Ekonomia eta Enpresen Administrazio eta Zuzendaritzaren Gradu bikoitz eta elebiduna).

Halaber, apirilaren 27n, larunbatean, informazio-saioak izango dira beste titulazio hauei buruz: Nekazaritza Ingeniaritzako Goi Mailako Eskola Teknikoko graduei buruz (Nekazaritzako Elikagaien eta Landa Ingurunearen Ingeniaritza eta Elikagaien Prozesuen eta Produktuen Berrikuntza), eta Telekomunikazio eta Industria Ingeniarien Goi Mailako Eskola Teknikokoei buruz (Ingeniaritza Mekanikoa, Ingeniaritza Elektriko eta Elektronikoa, Ingeniaritza Mekanikoaren Diseinua, Telekomunikazio Teknologien Ingeniaritza eta Ingeniaritza Informatikoa).