Lehenagoko ikasturtetako Harrera-eguneko irudi bat
Nafarroako Unibertsitate Publikoak hasiera emango dio hurrengo astelehenean, irailaren 3an, 2012-13 ikasturteari, graduko lehen ikasmailako ia 1.760 ikasleei Harrera-eguna eskainiz. Graduko gainerako ikasleek asteartean, irailaren 4an, ekingo diote ikasturteari. Plan zaharreko titulazioetako 1. eta 2. zikloetako ikasleak astelehenean, irailaren 3an hasiko dira.
Graduko ikasle berrientzako Harrera-eguna Arrosadiko campusean eta Osasun Ikasketen Unibertsitate Eskolan garatuko da, horietan 16 Gradu emango baitira, eta, Tuterako campusean, non Fisioterapia eta Diseinu Mekanikoko Ingeniaritza Graduak emango baitira. Egun horretan titulazioaren araberako argibide-saioak izango dira, eta campusetan bisita gidatuak egingo dira.
Gradu ikasketetako irakaskuntza-egutegia seihilekoka dago antolatuta. Lehen seihilekoa udazkenekoa da. Astelehenean, irailaren 3an, hasiko da (1. ikasmailetakoentzat) eta asteartean, irailaren 4an (gainerako ikasmailetakoentzat), eta urtarrilaren 17ra arte iraungo du. Aldi horretan eskolak emango dira eta ebaluazio jarraitua egingo da. Ondoren, errekuperaziorako ebaluazio-aldia izango da, urtarrilaren 18tik 29ra.
Urtarrilaren 30etik otsailaren 13ra udazkeneko seihilekoko kalifikazioak emango dira, eta udazkeneko seihilekoko matrikula egingo da. Bigarren irakaskuntza eta ebaluazio jarraituko aldi hau otsailaren 14tik ekainaren 21era luzatuko da. Ondoren, ekainaren 22tik uztailaren 3ra, errekuperaziorako ebaluazio-aldia izango da.
Aldiz, lehen eta bigarren zikloetako titulazioetan (lizentziaturak, diplomaturak, goi mailako ingeniaritzak eta ingeniaritza teknikoak) lauhilekoen egitura mantentzen da. Titulazio hauen ikasketa planak iraungitzeko prozesuan daude. Lehenbiziko zikloa 2012ko irailaren 3an, astelehenean hasi, eta abenduaren 21ean bukatuko da. Lehen lauhileko honetako azterketa aldia urtarrilaren 10etik 26ra izango da. Bestalde, bigarren lauhilekoa 2013ko urtarrilaren 28tik maiatzaren 24ra bitartean emango da, eta azterketak maiatzaren 25etik ekainaren 8ra bitartean egingo dira. Azterketetarako aparteko deialdia ekainaren 21etik uztailaren 4ra izango da.
Graduko 1. mailarako hurrengo matrikula
Graduko 1. maila egiteko matrikula egiteko epea oraindik ez da bukatu. Irailaren 4an ezagutuko da onartutakoen hirugarren eta behin betiko zerrenda, eta beste matrikula-epe bat irekiko da, hurrengo egunean, irailaren 5ean. Nafarroako Unibertsitate Publikoak 1.760 ikaspostu eskaintzen ditu aurten hamazortzi gradu ikasketetako, eta ikaspostu horietatik 1.698 jadanik bete dira (% 96,4) bigarren matrikula-epean. Epe horretan, aurreinskripzio aurreratua, ohiko aurreinskripzioa eta ohiz kanpoko aurreinskripzioa egiteko eskaerak hartu ziren kontuan. Honako hauek dira itxaron-zerrendarik ez daukaten Gradu bakarrak: Informatika Ingeniaritza, Telekomunikazioen Teknologietako Ingeniaritza, Diseinu Mekanikoko Ingeniaritza (Tuterako campusa), Nekazaritzako Elikagaien eta Landa Ingurunearen Ingeniaritza eta Elikagaien Prozesuen eta Produktuen Berrikuntza.