Nafarroako Unibertsitate Publikoak simulatzaile bat sortu du Hautaprobetan matrikulatutako ikasleek sartzeko nota kalkulatzeko aukera izan dezaten. Aplikazio honetara NUPeko webgunetik (www.unavarra.es) sartzen da, eta bere helburua da ikasleek izan dezatela aukera jakiteko Hautaprobetako fase orokorrean edo aurkezten diren fase espezifikoko irakasgaietan zer nota lortu behar duten matrikulatu nahi duten unibertsitate titulazioaren arabera. NUPek, Nafarroako unibertsitate barrutiko ikasleen ardura duen erakundeak, ekainaren 6, 7 eta 8an egingo ditu Hautaprobak Arrosadiko eta Tuterako campusetan.

Duela bi urte indarra hartu zuen Unibertsitatean Sartzeko Probaren arautegiaren arabera, probek nahitaezko fase orokor bat eta borondatezko fase espezifiko bat dituzte, zeinak probaren lehen fasean lortutako kalifikazioa hobetzeko aukera eskaintzen baitie ikasleei, eta xedetzat baitauka jakintzak ebaluatzea egin nahi den jakintza-adarreko unibertsitate ikasketekin lotutako diziplina esparruetan.

Ikasleek fase espezifikoan Batxilergoko bigarren mailako hiru modalitate-irakasgaitako azterketak egiteko aukera dute. Azterketa bakoitzean lortutako emaitza haztatuko da irakasgaiaren eta unibertsitateak eskainitako titulazio bakoitzaren artean dagoen loturaren arabera. Aldi berean, titulazio horiek bost jakintza-arlotan multzokatuta daude: Arteak eta Giza Zientziak, Gizarte Zientziak eta Zientzia Juridikoak, Osasun Zientziak eta Ingeniaritza eta Arkitektura eta Zientziak. Ponderazio taula simulatzaile honen bidez kontsultatzen da.

NUPeko sortutako aplikazioaren bidez ikasleek Batxilergoan edo Lanbide Hezkuntzan, Hautaprobetako fase orokorrean (Batxilergoko ikasleek bakarrik) eta fase espezifikoan lortutako batez besteko notak simulazioz batzeko aukera dute. Azken kasu honetan, simulatzailearen bidez, gehienez ere Nafarroako Unibertsitate Publikoak eskainitako lau irakasgai eta beste hainbeste titulazio aukeratuko dira. Halaber, simulatzaileak titulazio desberdinetako atalase-notetarako estekak ditu. Nota horiek azken ikasturte honetakoak dira eta orientatzeko dira. Esteka horien bidez NUPeko aurreinskripzio eta matrikula prozesuaren berri ematen da, halaber.