Nafarroako Unibertsitate Publikoak Ateak Zabaltzeko Eguna egingo du aurten lehen aldiz larunbat honetan, martxoaren 24an, Arrosadiko campusean. Aurkezpen ekitaldi hauek hurrengo 2012-13 ikasturtean unibertsitatean sartu nahi duten Batxilergoko eta Lanbide Heziketako ikasleentzat dira. Lehen egun honetan xehetasunez aurkeztuko diren titulazioak Osasun Ikasketen Unibertsitate Eskolakoak, eta Ekonomia eta Enpresa Zientzien, Giza eta Gizarte Zientzien, eta Zientzia Juridikoen fakultateetakoak dira.

Parte-hartzaileek graduen ezaugarriak azaltzen diren hitzaldietara joan ondoren, bisita gidatua egiteko aukera izango dute Arrosadiko campusean zehar, kirol instalazioak eta Urkiak unibertsitate egoitza ikusteko. Horretaz gainera, Ikasleentzako Argibide Bulegoa (Ikasgelategiko 021. ikasgelan) irekita egongo da 10:00etatik 14:30era, aurreinskripzio, egoitza, beka eta abarrei buruzko galderei erantzuteko.

Egitaraua goizeko 10:00etan hasiko da Osasun Ikasketen Unibertsitate Eskolako graduen aurkezpenarekin, Osasun Zientzien eraikineko ekitaldi aretoan, Barañaingo etorbidean, z/g, eta Ekonomia eta Enpresa Zientzien Fakultateko graduen aurkezpenarekin, Ikasgelategiko 09. gelan.

Bestalde, Giza eta Gizarte Zientzien Fakultateak bi saiotan banatu du aurkezpena. Lehenbiziko saioan, goizeko 11:30ean Ikasgelategiko 012. gelan egingo den horretan, Gizarte Laneko eta Soziologia Aplikatuko graduei buruzko argibideak emango dituzte. Bigarren saioan Irakasletza Graduak aurkeztuko dira. Eguerdiko 12:30ean izango da, 09. ikasgelan. Azkenik, Zientzia Juridikoetako Graduak 11:30ean aurkeztuko dira, 013. ikasgelan.

Arrosadiko campusean Ateak Zabaltzeko bigarren Eguna hurrengo larunbatean, martxoaren 31n, egingo da eta, horretan, Telekomunikazio eta Industria Ingeniarien Goi Mailako Eskola Teknikoko eta Nekazaritza Ingeniarien Goi Mailako Eskola Teknikoko titulazioak aurkeztuko dira. Bi saioetarako egitarau osoa Nafarroako Unibertsitate Publikoaren webgune ofizialean dago kontsultatzeko (www.unavarra.es).

Aurreinskripzio Astea

Ateak Zabaltzeko egun hauek, orain bi aste Tuterako campusean egin zenaren moduan, Nafarroako Unibertsitate Publikoan 2012-13 ikasturterako Aurreinskripzio Astea abian jarri baino lehen izaten dira, eta aurten, apirilaren 18tik 20ra bitartean (biak barne) izango da. Aurreinskripzioa Interneten bidez egiteko aukera dago eta informazio guztia webgunean dago: www.unavarra.es